ẔWA 20

Jesús žebane' ḻo yeḻa' got

(Mt. 28:1‑10; Mr. 16:1‑8; Lk. 24:1‑12)

1 Kate' ba nak zildo' ža nežw, na' ne nak choḻ, wyéj Lia Madlen žoa'a yežw ban', na' bḻe'ele' ba bkwas yej blag da' bsejwn gan žo'o no benne' ḻo yežw ban'. 2 Naž taría taría beyéj Lian' gan zoa Smon Bedw, na' zoaḻen yetó benne' wsedle ḻe', bennen' Jesusen' nži'ile' ḻe', na' gože' ḻégake':

—¡Bebéjgake' X̱anžon' ḻo yežw ban', na' bi nnezlto' gan wló'ogake' Ḻe'!

3 Naž bžoj Bedon' ḻen yetó benne' wsedlen', na' jake' žoa'a yežw ban'. 4 Tẕen wzá'ḻe'egake', san yetóen' taríaže wzé'e ka Bedon', na' zga'ale' ḻe' bžine' žoa'a yežw ban'. 5 Byechwe', na' bwie' ḻo yežw ban', na' bḻe'ele' láže'do' ka' da' bchéḻgaken' Jesusen', da' ka' zej nnitan' ga na', san bi wyoé'e ḻo yežw ban'. 6 Wdé na' bḻa' Smon Bedon' x̱kóže'le benne' wsedlen', na' wyoé'e ḻe' ḻo yežw ban', na' bḻe'ele' láže'do' ka' zej nnitan' ga na'. 7 Ḻezka' bḻe'ele' láže'don' da' bchéḻgaken' yichj Jesusen', na' bi žé'ḻenen yezika' láže'do' ka', san cheḻa'ale ndoben. 8 Naž wyó'o benne' wsedlen', bennen' bžine' zga'ale' žoa'a yežw ban', na' bḻe'ele' kan naken, na' bejḻi'e da' wnná Jesusen'. 9 Ka' goken, dan' bi na' chejni'ile' da' nyejw ḻe'e yiche la'y kan žon byenen gaken che Jesusen', da' ẕnnan yebane' ḻo yeḻa' got. 10 Naž žopte benne' wsedle ka' beyéjgake' lížgake'.

Ẕḻoe'e ḻaw Jesús ḻaw Lia Madlen

(Mr. 16:9‑11)

11 Bga'n Lia kwitle yežw ban', na' ẕbeže'. Kate' ne ẕbeže', byechwe', na' bwie' ḻo yežw ban'. 12 Bḻe'ele' chope wbás che ya'abá che Dios nníta'gake' ga na', na' zej nakwe' laže' chich. Žé'gake' ga na', toe' yichjle yežw ban', na' yetóe' x̱ní'ale yežw ban' gan wló'ogake' Jesusen'. 13 Wbás che ya'abá ka' belyi'e ḻe', na' wnnágake':

—Nó'ledo', ¿biẕ chen' ẕbežo'?

Lian' gože' ḻégake':

—Dan' beká'agake' X̱ana', na' bi nnezla' gan wló'ogake' Ḻe'.

14 Kate' beyóž wnné' ki, bwie' x̱kóže'le', na' bḻe'ele' Jesusen', zoe' ga na', san bi gókbe'ele' cha' Jesusen'. 15 Naž Jesusen' gože' ḻe':

—Nó'ledo', ¿biẕ chen' ẕbežo'? ¿Noẕ benne' žeyiljo'?

Dan' žekle Lian' nake' Ḻe' benne' žape chi'e yežlyón', na' gože' Ḻe':

—Benne', cha' le' bebejo'-ne', bḻoe'el neda' gan wló'o-ne', na' neda' yeyoá'a-ne'.

16 Naž Jesusen' gože' ḻe':

—Lia.

Naž byechj Lian', na' ḻen diža' hebreo gože' Ḻe':

—Raboní.

Diža' hebreo ni ẕnnan: “Benne' Wsedle chia'.”

17 Jesusen' gože' ḻe':

—Bi kano' neda', dan' bi na' yeyepa' gan zoa X̱a'. Na'a, wyéj gan zej nnita' benne' ljéža'do' ka', na' gož-gake': “Ki wnná Jesusen': yeyepa' gan zoa X̱a', na' ḻezka' nake' X̱ale. Nake' Dios chia', na' Dios chele.”

18 Naž wyéj Lia Madlen', na' bejzenle' benne' wsedle ka' che Jesusen' ba beḻe'ele' X̱anžon', na' kan nak dan' wnné'.

Ẕḻoe'e ḻaw Jesús ḻawgak benne' wsedle chie' ka'

(Mt. 28:16‑20; Mr. 16:14‑18; Lk. 24:36‑49)

19 Kate' ba goḻe ža na', da' naken ža nežw, zej ndobe benne' wsedle ka' che Jesusen', na' nyejw yo'o gan nníta'gake' dan' ẕžébegake' benne' judío wnná bia' ka'. Naž bḻoe'e ḻaw Jesusen' gachje ḻáwe'le gan nníta'gake', na' gože' ḻégake':

—Ga'n ži yichj ḻáẕdo'le.

20 Kate' beyóž gože' ḻégake' da' ni, bḻoe'ele' ḻégake' ne'e, na' ḻe'el sine'e. Naž bebégekle benne' wsedle chie' ka' dan' žeḻé'egekle' X̱anžon'. 21 Naž Jesusen' gože' ḻégake' da' yoble, na' wnné':

—Ga'n ži yichj ḻáẕdo'le. Kan ben X̱a', bseḻe'e neda', ḻezka' žseḻa'a ḻe'e chjenle x̱china'.

22 Kate' beyóž wnné' da' ni, blobe' ḻáwgake', na' gože' ḻégake':

—Le si' ḻo na'le Dios Be' La'y. 23 No benne' yenít ḻawle, bennen' ben doḻa', ba yo'o yeḻa' ženít ḻaw chie', na' no benne' bi yenít ḻawle ḻe', ga'n doḻa' da' nbaga' benne' wen doḻan'.

Bi žejḻé' Mas bebán Jesús

24 Mas bi wzóaḻene' ḻégake' katen' Jesusen' bedjwíe' ḻégake'. Nak Masen' to benne' chežinnoe' ka', na' ḻezka' lie' Benne' Kwach. 25 Wdé na' yezika' benne' wsedle ka' belyi'e Masen', na' wnnágake':

—Ba bḻe'elto' X̱anžon'.

Masen' gože' ḻégake':

—Cha' bi ḻe'ela' ne'e gan bdin bdidjwn', na' wdía' x̱ben na'a gan bdin bdidjwn', na' wdía' na'a ḻe'el sine'e gan bdin yag ntochen', bi chejḻi'a.

26 Kate' ba gok yex̱ono' ža, benne' wsedle chie' ka' zej ndobe' da' yoble ḻo yo'on', na' zoaḻen Masen' ḻégake'. Ḻa'kze nyejw yo'o gan nníta'gake', bḻoe'e ḻaw Jesusen' gachje ḻáwe'le gan nníta'gake', na' gože' ḻégake':

—Ga'n ži yichj ḻáẕdo'le.

27 Naž Jesusen' gože' Masen', na' wnné':

—Bde x̱ben no'o nga, na' bwia na'a nga. Bde no'o ḻe'el sina'a nga, na' biž gak chope ḻažo'o, san bejḻé' chia'.

28 Naž bechebe Masen', na' gože' Ḻe':

—X̱ána'do', na' Dios chia'.

29 Jesusen' gože' ḻe':

—Mas, dan' bḻe'elo' neda', žejḻi'o. Ba nez ẕen gaken chegak benne' ka' chejḻé'gake' chia' ḻa'kze bi ḻé'egekle' neda'.

Da' žénele gon da' nyejw ḻe'e yiche ni

30 Ben Jesusen' da' zanže yeḻa' wak ẕen ka' ḻawgak benne' wsedle chie' ka', da' ka' bi zej nyejwn ḻe'e yiche ni. 31 Da' ki bzoja' ḻe'e yiche nich chejḻe'le nak Jesusen' Benne' Criston', Bennen' bseḻa' Dios, na' nake' Ẕi'nkze Dios, na' kate' chejḻe'le chie', gata' yeḻa' nban da' zejlí kanne chele dan' žejḻe'le chie' Ḻe'.

<- ẔWA 19 ẔWA 21 ->