Apocalipsis 19

1 Ornu blazh de nu ndeꞌ, orzeꞌ güeña̱ nu ye zaab tiꞌ tub nac mbecy zigy rniiy gal gyibaa. Orzeꞌ na dey:

¡Rlagy ñi gyabic den gyel mbecy ni Ñgyoozh!

Mi zeꞌ nac mi biñ nu rboo mbañ.

Nac mi biñ lily,

nunu nac mi biñ fert,

2 Gun mi zeꞌ ri beem nu mod nu seꞌñ,

nunu ri beem nu mod nu rishli.

Orzeꞌ bi mniim nu cha biñ congal nu dzi gya bzu zeꞌ lo cashtig,

biñ congal nu mnu dela mbecy nu yuꞌ gyishlombecy nu nac gyel che̱ꞌ nim.

Orzeꞌ Ñgyoozh briic mi cashtig ni biñ congal zeꞌ

nu nac nu bicy mi nu gut de yu nu ricy coz nu mniim.

3 Gazeꞌ nu brugyiꞌ rnii gaꞌ dey. Orzeꞌ na dey:

―¡Rlagy ñi gyabic den gyel mbecy ni Ñgyoozh! Orzeꞌ dzeeñ nu driib nu pca gyi gyedz nu gya bzu zeꞌ rila wayecañ nu grib ñi ―na de mbecy zigy.

4 Orzeꞌ de gal zu tap yu bel, gal nu tapaꞌ de mbecy mbañ zeꞌ gusab tiily dey gal lo yu la. Orzeꞌ brugyiꞌ driib zily dey Ñgyoozh, biñ nu zub lo yashily lugaar zeꞌ nu riib ic mi. Orzeꞌ na dey:

―¡Laab ni gac ñii! ¡Rlagy ñi nu gyabic den gyel mbecy ni Ñgyoozh! ―na dey.

5 Orzeꞌ güeña̱ nu zaab tiꞌ rnii gashtal zeꞌ nu riib ic Ñgyoozh. Orzeꞌ rniiñ:

Gyabic der gyel mbecy ni Ñgyoozh nin,

de ru mbecy nu ricy coz nu rniim,

gal nu de ru mbecy nu rca lagy lom.

Gyabic der gyel mbecy nim, tant de mbecy gush tant de mbecy feñ,

rniiñ.

Fandang ni biñ nu nac Shily

6 Gazeꞌ nu güeña̱ nu zaab tiꞌ gal nu zaab tiꞌ tub nac mbecy zigy ornu rniiy. Güeña̱ nu rzigy gal nu rzigy zeꞌ nu yet nis ily. Rzigy gal nu rac nu yet guzii. Gazeꞌ nu güeña̱ nu rnii mbecy. Orzeꞌ nay:

Rlagy ñi nu gyabic den gyel mbecy ni Ñgyoozh.

Gun Ñgyoozh Shuaan den, biñ nu gac gyicy dela coz, mi zeꞌ nac mi rey.

7 Orzeꞌ rlagy ñi nu gyet lagy na nunu zu cyit lagy na.

Nunu rlagy ñi nu gyabic den gyel mbecy nim nu dzi lily nam.

Gun bi pshuub dzi nu chelaa biñ nu nac Shily.

Nunu biñ mñaa nu chelaam bi zu lily mi.

8 Nunu bi guud negy nu bya nu lino nu gzum.

Ndeꞌ negy cacy, nunu ryal rabee loñ.

Gun negy zeꞌ yaruuñ de coz nap nu ricy de mbecy ni Ñgyoozh,

na dey.

9 Orzeꞌ mnii tub anc lo̱. Orzeꞌ nay:

―Pcaa coz nu ya̱ ne̱e̱: “Dzi ni mbecy benu bredz dey yu chay lo fandang ni biñ nu nac Shily” ―nay.

Orzeꞌ gazeꞌ nu na gaꞌy:

―De nii riidz rishli ni Ñgyoozh ―nay.

10 Orzeꞌ ya̱ bzu tiba̱ yeñ gyiꞌ anc zeꞌ nu riib zilya̱ yu. Orzeꞌ yu zeꞌ nay:

―Cueꞌ ni gyicy ru lo̱. Gun ya̱ naca̱ losaꞌr nu nac ru moz ni Ñgyoozh nu deꞌ zir de losaꞌr, de yu nu ricy paa nu de riidz nu mnii Jesuuz, sinu briib zily Ñgyoozh ―na anc zeꞌ rab yu ya̱.

Gun de riidz nu mnii Jesuuz, laab ndeꞌ riidz nu briic Espiriit Yon ni de mbecy nu mnii por cuen ni Ñgyoozh.

Mbecy nu riib cuay cacy

11 Gazeꞌ nu bzaaca̱ gyibaa nu byaal ñi. Orzeꞌ bruu zac tub cuay cacy. Ich cuay zeꞌ riib tub mbecy nu la Biñ nu Ricy Paa nunu Biñ nu Rishli Rnii. Gun mi zeꞌ riib ic mi mod nu seꞌñ. Nunu zuub mi gyiꞌ gyel yuu mod nu seꞌñ. 12 Orzeꞌ urlom ryal ñi gal nu ryal lyush gyi. Nunu toom ri zañ coron. Ca tub nu la ich mi. Nunu ni tub la mbecy wagad lagy yu lac rniiñ. Tub zi la ub mi rad lagy mi. 13 Nunu dutuub la negy nu zum taꞌ reñ mi. Orzeꞌ mi zeꞌ lam Riidz ni Ñgyoozh. 14 Orzeꞌ ich mi zeꞌ yad ca de soldad nu yuꞌ gyibaa. Negy nu zu dey, ndeꞌ negy lino cacy. Nunu laabaꞌ cuay cacy riib dey. 15 Orzeꞌ ruꞌm briib tub mandzicy riꞌñ. Orzeꞌ nu mandzicy zeꞌ gyicy mi gan mbecy ni dela nasyoong. Orzeꞌ dzi ta gyub ic mi dey. Orzeꞌ gal nu rshi̱i̱ mbecy urbyay, ni mod gri beem ni mbecy. Orzeꞌ gyicy mi nu goꞌ dey ñup nu yuꞌ nañ taz zeꞌ. Ñup zeꞌ, ndeꞌ yaruuñ cashtig nu cuic Ñgyoozh, biñ nu gac gyicy dela coz. Cuic mi ñii par nu tantaꞌ rzi lagy mi. 16 Orzeꞌ lo negy nu zum gal nu lo cuiigy mi taꞌ letr nu rniiñ: “Biñ nu nac rey ni de yu nu nac rey nunu biñ nu nac Shuaan de yu nu nac shuaan”, rniiñ.

17 Gazeꞌ nu bzaaca̱ tub anc nu zu lo doo güidz. Orzeꞌ ye la rbish tiy. Orzeꞌ nay rab yu de chigyiñ nu zaab lo bi:

―¡Da der, gyatublaazh ru nu gow der coz ily nu cuic Ñgyoozh, 18 gun orzeꞌ gow der beel de rey, gow der beel de jeneraal, gow der beel de soldad balient, gow der beel cuay, gow der beel yu nu riib ma, gow der beel dela mbecy, mas mbecy nu sac shuaan, mas yu nu zu shuaan, mas yu feñ o yu gush! ―nay.

19 Gazeꞌ nu bzaaca̱ bañ dañ, gal nu de rey nu yuꞌ gyishlombecy, gal nu de soldad ni dey bi yuꞌ tublaazh dey nu chucooy nu biñ nu riib cuay zeꞌ gal nu de soldad nim. 20 Orzeꞌ bdub dey bañ dañ zeꞌ, gal nu mbecy fals nu mnii por cuen ni Ñgyoozh zeꞌ, yu nu bicy nusuriidz lo rgüii la bañ dañ zeꞌ. Nu nac nusuriidz nu bicy yu zeꞌ, orzeꞌ bguuy de yu nu pca beey ni bañ dañ zeꞌ, de yu nu briib zily nab ma. Orzeꞌ gua nu dey de yu zeꞌ pres. Orzeꞌ pshet lag dey bañ dañ zeꞌ, gal nu mbecy fals nu mnii por cuen ni Ñgyoozh zeꞌ gyel nu rca gyi nu asufre. 21 Orzeꞌ dela soldad ni dey gut yu nu nac mandzicy nu driib ruꞌ biñ nu riib cuay zeꞌ. Orzeꞌ de chigyiñ bdow gyel la ma beel dey.

<- Apocalipsis 18 Apocalipsis 20 ->