Apocalipsis 10

Angl beꞌnnenꞌ noꞌx yich daꞌon ndobenꞌ

1 Naꞌ breꞌraꞌ ye to angl beꞌnn nak war betjeꞌ yebánꞌ, naꞌ nechje bej, naꞌ zo to bchit yichjeꞌn, naꞌ lloaꞌraweꞌn naken llaktit ka llak will, naꞌ nieꞌ kaꞌ naken ka bdop da llaꞌlnninne. 2 Naꞌ noꞌxeꞌ to yich daꞌo da ba bseꞌseꞌ. Naꞌ le bzoate chlaꞌ nieꞌ chaꞌwenꞌ lo nisdaꞌon, naꞌ danꞌ ye chlaꞌ rbese naꞌ, bzoeꞌn rao yellrio. 3 Naꞌll besieꞌ zillj kwis, ka llosiaꞌ banꞌ nziꞌi bell yiꞌxe. Naꞌ ka besieꞌ naꞌ, bnne yiꞌ wziꞌo gall ras, naꞌ toto yiꞌ wziꞌo kaꞌ benen ke ga bnne akeꞌ. 4 Bayoll gok kaꞌ, gokraꞌllaꞌ wzojaꞌ diꞌll kaꞌ benraꞌ chak bnne yiꞌ wziꞌo kaꞌ, kat benraꞌ bne to beꞌnne zo yebánꞌ nadaꞌ:

—Bi wzojoꞌ diꞌllenꞌ benroꞌ chak bnne wziꞌo kaꞌ, bkwaꞌchen lo raꞌlldaꞌo.

5 Naꞌll le bliste naꞌa anglenꞌ yebáre, beꞌnnenꞌ nzoa chlaꞌ nieꞌ chaꞌwe lo nisdaꞌon, naꞌ ye chlaꞌn rao yellrio. 6 Naꞌll bneꞌe, da li wak kanꞌ bne Dios beꞌnnenꞌ zo ke chnare, beꞌnnenꞌ ben yebá, naꞌ yeolol da llia leꞌ yebá naꞌ, naꞌ beneꞌ yellrio, naꞌ yeolol da zjaniꞌt rawe naꞌ, beneꞌ nisdaꞌo, naꞌ yeolol ba llaꞌa lo nisdaꞌo, naꞌ da zjaniꞌt loe naꞌ. Naꞌ bneꞌe:

—Bill llere Diosenꞌ goneꞌ bi da kaꞌ lleꞌnreꞌ goneꞌ naꞌ. 7 Kate llin lla wkwell angl wgallenꞌ trompet keꞌen, kanaꞌllenꞌ gak danꞌ ba bne Diosenꞌ gak, kanꞌ ba golleꞌ beꞌnn kaꞌ beꞌe xtiꞌlleꞌn, danꞌ nono bnneze kanaꞌ.

8 Naꞌll da yobre bnne beꞌnnenꞌ zo yebánꞌ nadaꞌ, bneꞌe:

—Byej jaxhiꞌi yich daꞌon noꞌx angl beꞌnnenꞌ zellá naꞌ, beꞌnnenꞌ nzoa chlaꞌ nieꞌn rao nisdaꞌon, naꞌ ye chlaꞌn rao yellrio.

9 Naꞌll byaꞌa ganꞌ ze anglenꞌ jannabaꞌ yichenꞌ. Naꞌll goll anglenꞌ nadaꞌ:

—Beꞌxen bdaon. Naꞌ lo lloaꞌo naꞌ, gakroꞌn xhix ka blliꞌndaꞌo ke beser, naꞌ lo leꞌo naꞌ, yeyaken zlaꞌ.

10 Naꞌll beꞌxaꞌ yichenꞌ noꞌx anglenꞌ bdawaꞌn. Naꞌ lo lloaꞌ naꞌ, gokraꞌn xhix ka blliꞌndaꞌo ke beser, bixha ka bllinen lo liaꞌ naꞌ, bayaken zlaꞌ. 11 Naꞌll goll anglenꞌ nadaꞌ:

—Llayaꞌl weꞌo xtiꞌll Diosenꞌ da yobre, naꞌ chixjweꞌroꞌ kanꞌ gak ke zan yell daꞌo kaꞌ, naꞌ ke yell xhen kaꞌ, naꞌ ke beꞌnn nne wde wdere diꞌll da de yellrio ni, naꞌ ke zan beꞌnn wnebiaꞌ ak.

<- Apocalipsis 9 Apocalipsis 11 ->