Apocalipsis 14

Da' gosoḻ beṉe' ca' to gayoa tapeyon mil gosonxene' Diosen'

1 Na' gwṉa'a na' ble'eda' Jesucristw ben' zaca'lebde' ca xila' dao' be gosot beṉe' gualaž c̱heto' ṉec̱he xtoḻa'gaquen', zeche' ḻo ya'a Sión len to gayoa tapeyon mil beṉe' yoble. Na' zjanyoj la Jesucriston' len la X̱e' Diosen' ḻoxgagaque'. 2 Na' benda' chesoḻ beṉe' zan beṉe' že' yaban'. Nenen ca chsiž ga zjadechgua yegw zan na' ca nen cate' chašjw chtin. Na' nenen ca nen cate' beṉe' zan chosogoḻe' arpan' to ši'ize. 3 Na' gosoḻe' to da' cobe lao Diosen' na' lao beṉe' ca' tap zjažia x̱il na' lao beṉe' blao ca' tapechoa gan' chi' Diosen' chnabi'e. Noch no beṉe' yoble goc goḻ ḻen, con beṉe' ca' to gayoa tapeyon mil na'ze gosac bososede' dan' gosoḻen' cont gosonxene' Diosen', ḻegacze' bebej Criston' ḻo na' Satanásen' šlac ṉe' nite' yežlion'. 4 Beṉe' ca' gosoḻen' zjanaque' beṉe' bi gosata'lene' no'ol bi nac xo'olgaque', na' gosapchgua cuingaque' cont gosac lažda'ogaquen' xilaže' len Diosen'. Na' zja'acteze' len Jesucriston' gate'teze zeje' chosozenague' c̱he', ḻe bebeje' ḻegaque' ḻo na' Satanásen' cont zjanaque' ḻo ne'e na' ḻo na' Diosen'. Da'nan' zjazaca'lebde' ca to tlacw coseš da' bnežjw beṉe' Israel gualaž c̱heto' ca' ḻo na' Diosen'. 5 Gwbat goso'e diža' güenḻaže' na' bibi doḻa' zjanape' lao Diosen' ben' chi'e chnabi'e.

Da' gosena šoṉe angl

6 Nach ble'eda' yeto angl ḻe'e yaban' chde' ḻo be'. Na' gwdix̱jue'ede' diža' güen c̱he Diosen' da' bi te c̱hen len beṉe' že' yežlion', len beṉe' zjanac to to nación, to to yež, to to diaža, na' beṉe' chesac gwde gwdele diža' da' de yežlion'. 7 Gwṉe' zižje gože' ḻegaque':

―Ḻe žeb Diosen' na' ḻe gonxene', ḻe ba bžin hor gone' yeḻa' justis c̱he beṉac̱h. Ḻe gonxen Dios ben' ben yaban', yežlion', nisdao' na' ga chal nis.

8 Yeto angl za' cožen' gwne':

―Bac̱h bžin ža cuiayi' ciuda Babilonia da' nac da' blao. Bac̱h bžin ža cuiayi' ciuda c̱he beṉe' ca' bosozoe' Diosen' ca'ale na' gosebede' da' nac yeḻa' zto', ḻe ba gosego'oyeḻe' beṉe' že' yogo' nación cont chesone' güedenag len Diosen'.

9 Nach yeto angl zej cože' beṉe' gwchopa' be'e diža' zižje gwne':

―Note'teze beṉe' chesonxen bež x̱igüen' len ḻ gua'a ḻsaca' c̱heba' na' cheso'e latje chesezoa señw c̱he beža' ḻoxgagaque' o taca'gaque', 10 Diosen' ba nžie' bia' yesesaca'zi'chgua beṉe' ca'. Yesezaca'zi'e gan' chaḻa' yi' len azufre lao angl c̱he Diosen' na' lao ben' zaca'lebde' ca xila' dao' ben' gosot beṉe' Israel ṉec̱he xtoḻa'gaque'. 11 Toḻi tocaṉe c̱has žen c̱he yi' gan' yesezaca'zi'en. Na' beṉe' ca' chesonxen bežen' len ḻ gua'a ḻsaca' c̱heban', na' beṉe' zjazoa señw c̱he bežen' ḻoxgagaque' o taca'gaque', bi gac yesyezi'laže' len da' yesezaca'zi'en ṉe chel ṉe lagüe ža. 12 Da'nan' chonen byen soac̱hac̱h chio' ba gwlej Diosen' cont naccho ḻo ne'en, gwyo gwc̱hejcho len bi da' chac c̱hecho, chio' chzenagcho c̱he da' non Diosen' mandadw goncho na' bi chbejyic̱hjcho dan' chejnilaže'cho Jesúsen'.

13 Nach benda' to beṉe' zoa yaban' gwne':

―Bzoj da' nga: “Mbalaz beṉe' ca' ṉe' chesejnilaže' X̱ancho Jesucriston' žinte ža yesate'. Can' chac ṉa'a na' can' gac bate'teze.”

Na' Spiritw c̱he Diosen' žan:

―Da' ḻi ṉite' mbalaz, ḻe yesyezi'laže' len xšingaquen', na' gacbia' yogo' da' güen da' ba gosone'.

Yotob Diosen' beṉe' bi chosozenague' c̱he' cont yesezaca'zi'e

14 Nach gwṉa'a da' yoble na' ble'eda' to bejw šiš ḻe'e yaban' na' cože' bejon' chi' to beṉe' nac ca to beṉac̱h. Na' zoa to corona de oro yic̱hjen' na' nox̱e' to da' nzi' hoz da' nḻachgua. 15 Na' yeto angl bchoj ḻo' gan' chesonxene' Diosen' yaban' na' gwṉe' zižje gože' ben' chi' cože' bejon':

―Ba bžin hor yotobo' coseš c̱he uvas dan' de yežlion', ḻe ba golen.

16 Nach ben' chi' cože' bejon' nox̱e' hoz botobe' cosešen'.

17 Nach bezchoj yeto angl ḻo' gan' chesonxene' Diosen' yaban' na' ḻecze nox̱e' yeto hoz da' nḻachgua. 18 Na' ḻecze bezchoj yetoe' ben' yo'o ḻo ne'e yi' da' chaḻa' ḻo mes gan' chesonxene' Diosen'. Na' angl nga gwṉe' zižje boḻ güiže' angl gwchopa' ben' ḻecze nox̱e' hoz, gože'ne':

―Ba güe uvas da' žia ḻo yežlion'. Bec̱hoguen len hoz c̱hion' dan' nḻachgua cont yotobchon.

19 Nach anglen' bec̱hogue' uvas da' žia yežlion' len hoz dan' nox̱en' na' botoben' bzaḻen' to ḻo' ša' xen ga yesesien' cont choj x̱isen'. Zeje diža', Diosen' botobe' beṉe' ca' bi bosozenag c̱he' na' gwlo'e ḻegaque' ga yesezaca'zi'e. 20 Na' gan' gosezaca'zi'en naquen cho'a ciudan', na' ḻo' ša' xen gan' gwlo'e uvasen' belalje chen zil da' nac xc̱hengaque', bežinen ca sibe to xc̱hega' cabayw, na' bžiljon šoṉe gayoa mil metr.

<- Apocalipsis 13 Apocalipsis 15 ->