Apocalipsis 11

C̱hope beṉe' goso'e xtiža' Diosen'

1 Nach anglen' beṉe' neda' to ya ca nac da' chosoc̱hine' cate' chosochix̱e' yo'o, na' gože'nda':

―Gwyej jachix̱e yodao' blao na' mes gan' chosozeye' bi da' chosozeye' cate' chesonxene' Diosen', na' gwlabo' baḻ beṉe' že' chesonxene' ḻe'. 2 Perw bi gwchix̱o' chyo'on, ḻe ba naquen ḻo na' beṉe' bi zjanac beṉe' Israel beṉe' bi chesejnilaže' Diosen' cont yesone' nacteze chesaclaže' ḻo ciuda c̱he Dios lao c̱hopeyon bio'. 3 Na' seḻa' c̱hope beṉe' yeso'e xtiža', na' yesaze' lache' gasj ca to beṉe' chegüine' na' yeseyix̱jue'ede' xtižan' lao to mil c̱hop gayoa gayon ža.

4 Beṉe' ca' c̱hope zjazaca'lebe' ca yag olivos ca' c̱hope na' ca candeler ca' c̱hope da' zjazoa lao Diosen' ben' nac X̱an yežlio. 5 Na' še no chaclaže' gonxi'e ḻegaque', choj yi' cho'a beṉe' ca' yeso'e xtižan' na' gwzeyen beṉe' chgue'ede' ḻegaque'. Can' gac yesat note'teze beṉe' chende' gonxi'e beṉe' ca' c̱hope. 6 Na' beṉe' ca' yeseyix̱jue'ede' xtižan', gac ḻo na'gaque' yesone' cont bi gac yejw šlac yeso'e xtižan', na' gac ḻo na'gaque' yesone' cont nisen' yeyaquen chen, na' bate'teze yesaclaže', yesone' gac bite'tezechle da' yesežaglao beṉe' že' yežlion'. 7 Perw cate' yeyož yeso'e xtižan', nach choj ḻo' gabiḻ gan' nac yechw zitjwchgua to bež x̱igüe' ṉizba' ḻegaque' na' gotteba' ḻegaque'. 8 Na' beṉe' ca' že'na' yosyocua'aṉe' cuerp c̱hegaquen' gan' chesetoḻen ḻa cay c̱he ciuda blaon' gan' gosote' X̱ancho Jesucriston'. Ciudan' zaca'leben ca ciuda Sodoma na' ca nación Egipto. 9 Na' šoṉe ža yo gašje beṉe' za'ac zan yež na' zan nación, beṉe' zjanac zan diaža, beṉe' chesac gwde gwdele diža' da' de ḻo yežlion', yeseṉe'e beṉe' guat ca' na' bi yeso'e latje yesegaše'. 10 Beṉe' ca' že' yežlion' yesyebede' da' gosat beṉe' ca' c̱hope, na' yosonežjo ḻježe' bi da' yosonežjo ḻježe' da' chesyebede' dan' bich nita' beṉe' ca' yeso'e xtiža' Diosen' len ḻegaque', ḻe ḻeca zed chesacden'. 11 Na' ble'edaogüeda' gwde šoṉe ža yogašje Diosen' bosbane' beṉe' ca' c̱hope na' gosezeche' da' yoble. Na' yogo' beṉe' besele'e ḻegaque' besežebchgüe'. 12 Nach beṉe' ca' gosoe' xtiža' Diosen' gosende' gož Diosen' ḻegaque' zižje:

―Ḻe yeda, ḻe yeyep nga.

Nach beṉe' ca' chesegue'e ḻegaque' besele'ede' besyeyepe' yaban' to ḻo' bejw. 13 Šlac chesyeyepen' ḻeca gwxo' na' gwžiayi' late' ciudan', na' gaže mil beṉe' gosat caten' gwxon'. Na' beṉe' ca' besyega'aṉ besežebchgüe' na' gosonxene' Dios ben' zoa yaba.

14 Ba gwde yeḻa' zi' gwchopen' na' za' gac da' gwyoṉe.

Can' goc cate' angl gaže bcueže' trompeta c̱hen'

15 Nach angl beṉe' gažen' bcuež trompeta c̱hen' na' benda' baḻ beṉe' ca' že' yaban' goseṉe' zižje, gosene':

Doxen yeḻa' chnabia' c̱he yežlion'

bac̱h naquen ḻo na' X̱ancho Diosen' na' ḻo na' Cristo ben' gwleje' cont chnabi'e.

Na' Diosen' zoacze' chnabi'e toḻi tocaṉe.

16 Nach beṉe' blao ca' tapechoa ben' zjachi' cue'ej cuit Diosen', jasechaze' cosc̱ho'ale ḻo yon' gosonxene' Diosen', 17 gosene':

Chonto' yeḻa' chox̱clen c̱hio' X̱anto',

ḻe naco' Dios ben' nap yeḻa' guac xen.

Ba zoaczo' cate' biṉa' x̱e yežlion',

na' soaczo' toḻi tocaṉe.

Na' ba gwzolao chnabi'o len yeḻa' guac xen c̱hion' cont gac can' chazlažo' doxen.

18 Beṉe' nación ca' že' yežlion' beseže'e le',

perw ba bžin ža gono' yesezaca'zi'e.

Ba bžin ža c̱hoglaguo' c̱he yogo' beṉe' ca' ba gosat še noe' nap doḻa'.

Na' gono' cont beṉe' güen xšino' ca' beṉe' ca' goso'e xtižon' yesenite' mbalaz,

len yogo' beṉe' gwlejo' cont zjanaque' ḻo nao', beṉe' gosonxen le'.

Con yogo' beṉe' gosonxen le' yesenite' mba, beṉe' gole len beṉe' xcuide'.

Ḻecze ba bžin ža yesebiayi' beṉe' ca' bosožiayi' ḻjež beṉac̱he' yežlion'.

19 Nach byaljo gan' chesonxene' Diosen' yaban' na' ble'eda' caj gan' že' yej ca' gan' nyoj da' ca' gož Diosen' beṉe' Israel gualaž c̱heto' ca' yesone' cont gaclene' ḻegaque'. Na' šlac gwṉa'a, gwyep yes, gocchgua sšag, gošj gwtin, gwxo' na' gwche'chgua yej.

<- Apocalipsis 10 Apocalipsis 12 ->