HECHOS 25

Güeyzo zho Pabl lo gobernador Fest

1 Zeeṉe goc tsoṉ ngbidz bdziṉ Fest Cesarea pcaania me guieḻgobernador, laa me briee güey me Jerusalén.

2 Grë zha pxoz non ni grë zha ne rnabey lo meṉguiedz Israel, zeeṉe bin zho laa Fest bdziṉ Jerusalén lëëlëd güey zho lo me güeyxob zho xdemand Pabl; ni 3 bnab zho lo me cxeeḻ me Pabl Jerusalén. Laa zho rnab miṉ co sac laa zho bnediidzle, nëz tsiesoblan zho, yquiambëz zho ted Pabl gut zho Pabl. 4-5 Per bdeete Fest diidz, rëb me laa Pabl nole ladzguiib ga, teḻ zha ne zrieelo tsie, ga glisqui zho teḻ pe nac falt ne rquiaqui zho Pabl; beṉque zlase dze laa me gbiire guey nëz co dzigo zac tsienaḻ zho zhits me.

6 Ndziibsraa ti zhmal blëz me Jerusalén ga, dzigo laa me biire zey Cesarea. Zna dze bdziṉ me biinigazh liu co güey me yulow, bnabey me gocredz Pabl. 7 Laa grë zha Israel ndxiele ga, wbig zho lo Pabl ndal grë falt nroob ne rcaadzdoḻ zho me, per loxaque diidzsew, guieṉd zha glu zho ne nlipaa goca. 8 Dzigo pquiab Pabl rëb Pabl:

―Grëtaa miṉe rquiaqui zho naa i, ni tiba nlid. Wlaltaa gard quits naa xley no, gard quitnie naa xyadoo no, niicle gardgaa gacntseeb naa lo zhiwxtis zha Roma.

9 ―¿Pe racladzdgaa luu tsie luu Jerusalén? ―rëb Fest―. Ga gbiire yquiaadiag naa xtiḻ to i zeeṉa glu dieṉ chopaa rap doḻ.

Sca rëb me, sac racladz me dieṉ zha guiaṉnziuu me lo grë zha Israel. 10 Dzigo rëbchaa Pabl:

―¡Gad naa! ¡Nod pe nac ga naa ga, to rieguiaḻ guṉ guieḻwxtis rii! Beṉque naṉ wen luu gaṉle peet falt nzëëbd naa lo zha Israel. 11 Teḻ niaca miṉe nli ziyuṉ naa pe guieḻntseeb ne raguiaḻ naa guet naa, maase guet naa. Per na naṉpaa naa ni ti ncuaaṉe rquiaqui zho naa i nlid, ¿pe nac dzigo cho co naa ladznia zho gut zho naa? Laa naa racladz, mazd goḻneedz diidz tibaque ga naa lo zhiwxtis nroob ne, meṉ ne zob Roma.

12 Dzigo bzodiidz Fest grë me meṉ rac ne nacnie me dziin; blozhse ga rëbchaa me lo Pabl:

―Guieṉd rson sca. ¡Teḻ lo César racladz luu tsie luu, na maase tsie luu!

Gocredz Pabl lo Agrip

13 Zeeṉe goc bla zhmala, laa rey Agrip grop wnaa ne lë Berenis bdziṉ Cesarea ga güeyquiaabdiuzh me Fest. 14 Nzianlaa ngbidz blëz me ga, dzigo bzodiidz Fest lo me laa Pabl sca no ladzguiib ga, rëb Fest:

―Leṉ dze ne bii nac Wech dziin biab ti mgui ladzguiib nu, 15 laa leṉ dze ne bia naa Jerusalén biaad grë zhipxoz non zha Israel, grë zha non ne rnabey lo zho, biaad-xob zho xdemand me lo naa ga, rnab zho lo naa gnabey naa guet me. 16 Dzigo rep naa lo zho led scad ruṉ zha Roma guieḻwxtis, ib none gacredz me gnee me chop lan xtiidz me lo grë zha ne rzoob xdemand me, ga glu teḻne nli miṉe rquiaqui zho me togo nlidgaaw; 17 nacne biaad zho nu. Zna dze blanso zho, biinigazh liu co bnabey naa gocredz me. 18 Tibaque ni naa bod no pe ti falt nroob ne rquiaqui zho me, per zeeṉe biaad zho yulow goṉ naa 19 lëë gdib teḻ zha nac grë ncuaaṉe rliladz zho miṉ co rlisqui zho, ni rlisqui zho pe nacne zienaḻ me zhiwseed ti mgui lë Jesús, gutle meṉ co ni laa me rnee mban me.

20 ’Zeeṉe goṉ naa grë ncuaaṉ co rquiaqui zho me nli rieṉd naa zha guṉ naa, dzigo rep naa lo me, teḻne racladzgaa me zac tsie me Jerusalén ga dieṉ zha guiaaṉ lo xtiḻ zho. 21 Per bnëd me, leḻ bnab me tsie me lo César; gane niina laa me bii no i, nieeda gne naa lo César dieṉ pa hor grieelo cxeḻ naa me nëz co.

22 Dzigo rëb rey Agrip:

―Racladz naa goṉ tebaa zha yquiaadiag naa dieṉ zha nac xtiidz mgui co.

―Na zho gaṉle ―rëb Fest―, gzhegazh gnabey naa gacredz me.

23 Biini liu, ti lni nroob ne rac laa Agrip ni Berenis bdziṉ leṉ yu ne rac guieḻwxtis ga, grë zha non ne rnabey lo meṉguiib, grë zha non lo meṉguiedz, naḻ zho zhits me. Dzigo bnabey Fest gocredz Pabl, zeeṉe laa Pabl bdziṉ 24 laa Fest psilo bnee, rëb me:

―Niina ne laa luu ziaad nu rey Agrip, scagaa to ne nac to meṉ ne ndxiegrë ne nu nadze, goḻwi gaṉle lëë meṉ rii nagoṉ rlëëniedox zha Israel, racladz zho guet me; zigtaa Jerusaléna zigtagaa nuw ziyaadnab zho lo naa gnabey naa guet me. 25 Saṉgue naa goṉle naa rapd me falt, par guiab ne rieguiaḻ guet me; per laa me bnab tsie me lo César, na laa naa no cxeḻ me nëz co.

26 ’Nli rieṉd naa dieṉ pe nac diidz ne cxeḻ naa lo César, ne squi lega ncuaaṉe nlid rquiaqui zho me. Miṉ co nagoṉ bnabey naa gocredz me lo to nu, ni laga laa luu ziaadgaa nu rey Agrip, bzhiguieḻ pquiaadiag gaṉle zha rzë xtiidz me; zeeṉa togo zdziel naa pe nac diidz ne cxeḻ naa gaḻ dze ne laa me tsie nëz co. 27 ¡Sac nonguieḻd ga guṉ naa teḻne sobdoo me cxeḻ naa me, ni teḻ cxeḻd naa diidz dieṉ pe nac xfalt me!

<- HECHOS 24 HECHOS 26 ->