Hebreos 8

Jesucristo neca uleꞌya enu máse neca equie liñibe

1 Luye nú uniꞌlaꞌahua, lunú máse neca equie necane nú Jesucristo neca uleꞌya enu máse neca equie liꞌinu enu nzucula cueꞌtse Diose enu chiquiꞌ rnibiyaꞌ chube liñibe. 2 Zeꞌe necalanu uleꞌya, liñi indu nú neli urecheꞌ Diose, nu la necane indu nú urecheꞌ bee bene.

3 Ye bee uleꞌya enu máse neca equie, riñaꞌ nú rriꞌibeella neca nú rdeteꞌ beella uꞌna lu Diose nu riñibeella nañi xi neca uꞌna lunu leꞌca scua Jesucristo, liꞌinu enu neca uleꞌya enu máse neca equie luaꞌahua nuꞌ tucu nú udeteꞌnu lu Diose. 4 Tunu nzuscaꞌ Jesucristo lu iliulabe quieꞌ niꞌ lá acanu uleꞌya, xne nucuaꞌa bee uleꞌya enu rdeteꞌ uꞌna lu Diose tucu nú rnibiyaꞌ leyꞌ Moisés. 5 Pero bee uleꞌya quieꞌ, rriꞌitsia beella tucu ejemplu nú reca liñibe. Nediyaꞌahua nú scua necane xne chenu nze recheꞌ Moisés indu uni Diose lulla: “Ubiꞌya nzeꞌcacuru para nú recheꞌlu indu quieꞌ tucu nú ulubela lulu equie dañi Sinaí.”

6 Pero máse neca equie nú rriꞌi Jesucristo enu neca uleꞌya enu máse neca equie luaꞌahua, nu equie cuendaꞌ inziu cuqui nú uxaꞌlanu máse neca nzeꞌca para nú riña bee bene lu Diose liñibe.

7 Xne tunu equie cuendaꞌ ley ariꞌi bene ana ahuañi nzeꞌca bene lu Diose la quiꞌñiaꞌ nú achuꞌu stucu inziu cuqui che. 8 Pero ulañiꞌ Diose nú lá riꞌi nzeꞌca bee bene che uninu:

Liꞌá nia nú riña bee bichia nú chuꞌu tucu inziu cuqui para bee bene Israel,

cuna bee bene Judá.

9 Pero inziu cuqui cuaꞌ lacane tucu nú neca ley

nú utsaꞌnaa lubee beneꞌhua enu udetela,

chenu uhua beella Egipto;

nu lunú né zucuꞌbeella nú rnia enzeꞌe utsana arquia beella, uni Diose.

10 Nu leꞌca uni Diose:

Scua utsaꞌnalá nú xi zeca bee bene chenu riña bichia zeꞌe.

Tsaꞌnaa ley elliebacuꞌ beella nu riꞌá nú quiene liñi arquiꞌbeella.

Che acaa Dioseꞌbeella,

nu liꞌibeella aca beella bee benea.

11 Che bichia zeꞌe la quiꞌña nú zeteꞌ bee bene saꞌ bene.

Niꞌ bee bichilla para nú chulubeella liꞌá enu neca Diose,

xne yebeella chulubeella liꞌá,

desde bee enu meꞌ hasta bee bene enu unguxu.

12 Nu liꞌá riꞌá perdona ye beenu necha neca uriꞌi beella,

nu lecaꞌ xunga elluꞌcuꞌ arquia ye dula nú uriꞌi beella.

13 Chenu uni Diose nú xaꞌlanu inziu cuquicuaꞌ uninu scua xne la zibiaꞌ inziu uxu nú riña bee bene lunu nu beenú la zibiaꞌ la leaꞌ nú nitilu bee enzeꞌe.

<- Hebreos 7 Hebreos 9 ->