Link to home pageLanguagesLink to all Bible versions on this site
2
Jesús mile' ngubixlo nits, ngoke vin

1 Chon ngubizh nzha di ngok kure', nguio tu jwandang yezh Caná kwa'n ña'n lazh men Galilea. No ze' nzo xna' Jesús, 2 mbaino nu lo Jesús no lo rë men che'n Me ngwane bixa' par ngwa jwandang ze'. 3 No or milox vin kwa'n kiyo rë men lo jwandang ze', orze' nzhab xna' Jesús lo Me:

―Milox kwa'n kiyo rë men re'.

4 Orze' nzhab Jesús:

―Lë' go una', ¿chon kine go kuba' lon? Gat gal or da.

5 Orze' nzhab xna' Jesús lo rë xa' nizhin ye'n lo rë men:

―Bile' go rë kwa'n ne Jesús lo go.

6 Ze' nzhin xo'p re ke kwa'n nzho nits kwa'n nizen rë men Israel par nzhak nambe bixa' lo Dios. No kad tu rë re re' nzhuwei'ye pas tu gayo' litr nits. 7 Orze' nzhab Jesús lo rë xa' nizhin ye'n lo men:

―Bichizhë go rë re ba' di nits.
Orze' michizhë ro' bixa' rëi, 8 orze' nzhab Jesús lo bixa':
―Nal wala' go che'pe lo xa' kwa'n nzo kile' mandad lo jwandang ba', par le' xa' prebe.
Orze' ngwala' bixa'i. 9 Orze' mile' xa' nile' mandad lo jwandang re' preb che'p nits kwa'n ngubixlo ngok vin re', per nanet xa' re' plo nguro' vin re', nab tsa rë xa' nizhin ye'n lo men nane kure'. Orze' ngurezh xa' nile' mandad lo jwandang re' miyi' xa' nzhak jwandang che'n re', 10 par nzhab xa':
―Rë men galo laka vin wen nzho bixa', no or nilox niza' bixa'i go men, orze' nigo' bixa' vin korrient; per lu se, lult laka ngulo'l vin kwa'n más wen.

11 Kure' galo laka yalnazhon kwa'n mile' Jesús yezh Caná kwa'n ña'n lazh men Galilea, par milu' Me xmod nak yalnazhon che'n Me; kuze' haxta nu rë men che'n Jesús ngwayila bixa' Me más.

12 Dispwés di kure', orze' nzha Jesús kun xna' Me, kun rë wech Me mbaino kun rë men che'n Me, par yezh Capernaúm; ze' mia'n bixa' pla ra' ngubizh.

Jesús ngulo'tin rë xa' nile' xbi' lo luwe che'n yado'
(Mt. 21:12-13; Mr. 11:15-18; Lc. 19:45-46)

13 No lë' lani Pask che'n men Israel nzhazhin la, par tsila bixa' yë'l kwa'n mile' Dios ngut dox nayax men egipto; lani ze' nzha Jesús par yezh Jerusalén. 14 No or mizhin Me le'n yado' ro ze', une Me, ze' nzhin rë xa' nile' xbi' lo luwe che'n yado', nito bixa' ma: ngo'na, mbëkxi'la, mbaino paloma; no rë xa' nichi'l dimi che'n rë men zit. 15 Or une Jesús kure', orze' mizuxkwa' Me tu bins kun do' par ngulo'tin Me rë men re' al tich kun rë ma che'n bixa'; no zhaga' miche'ch Me dimi che'n rë xa' nichi'l dimi re', no haxta rë mes che'n bixa' michixche Me. 16 No lo rë xa' nito palom ze' nzhab Me:

―¡Gulo'tin go rë kure'! ¡Nale't go lizh Xuza nela plo nzhak xbi' ga'!

17 Orze' mitsila rë men che'n Me rë widi'zh kwa'n nzobni' lo Yech che'n Dios kwa'n nzhab se': “Niyi'xian da por kwa'n kile' men kun lizhal; lë'da gat por lë'i.” 18 Orze' pla men Israel xa' nak zhi'n, mina'bdi'zh lo Jesús, nzhab bixa':

―¿Kwan tu kwa'n nazhon le'l lo no par ne no, walika kinul kwa'n par le'l mandad, par le'l rë kure'?

19 Orze' nzhab Jesús:

―Bichil go yado' re', no zixchon ngubizh lë'da zuxkwa' skai xtu wëlt.

20 Orze' nzhab rë men Israel ze':

―Por cho' bixo'p li'n nguiuxkwa' yado' re', mbaino lu ne, ¡chon tsa ngubizh kuxkwa'le xtu wëlt!

21 Per yado' kwa'n midi'zh Jesús lo rë men Israel ze' nak yub kwerp che'n Me. 22 Kuze', or nguruban Jesús, mitsila rë men che'n Me widi'zh re', no ngwayila bixa' kwa'n nzobni' lo Yech che'n Dios no rë kwa'n midi'zh Jesús.

Jesús nane xmod nak rë men

23 No or nzo Jesús yezh Jerusalén dub kiyak lani Pask che'n rë men Israel, nayax men ngwayila widi'zh che'n Me porke une bixa' rë señ nazhon kwa'n mile' Jesús ze'. 24 Per nangayilat Jesús rë men ze', porke nane Me xmod nak rë men. 25 Gat naki'nt Me cho gab xmod nak tu men lo Me, porke lë' Jesús ya nane la cho xigab nile' rë men.

<- San Juan 1San Juan 3 ->