Hechos 28

Bidzujṉ Pabl lo yuj ni laa Malta ni ṟe' lo nisdoo

1 Che bidzujṉnu lo yuj ni tre' lo nisdoo, biembeenu yujga najc ni laa Malta. 2 Gucnäj rebejṉ ro'c nuure, gule'creni guiboo bahuiireni nuure sa'csi cayacnaḻduxh, cayajbza nisguij. 3 Ca' Pabl te dääz yajg, sale'cnini lo guiboo, chela biriyäḻ te bäḻ nialajz neṉ yajgga. Saa gudauya'ni ṉaa Pabl. 4 Che bahuii rebeṉ Malta li najl bäḻ nialajzga cayauya' ṉaa Pabl, gusloj cayäjbreni lo sa'reni:

―Pet rugu'tni bejṉ ni'c mase bejnni gaan lo nisdoo siguijxni xtojḻni, sejtni ṉaj.

5 Gubijb Pabl ṉaani dxejcti bitejb bäḻga lo guiboo. Xhet gujcdi ṉaa Pabl. 6 Dxejc rebeṉ ro'c cabäjz fiireni la sisiäguij ṉaa Pabl o laa sejtni. Xchero bidxelojreni. Che bahuiireni xhet gujcdini, gusloj bejnreni ste'ca xhigab, räjpreni lo sa'reni:

―Pet dios najcni.

7 Gajxh ro'c naga' xyuj te dade' ni laa Publio ni najc xcubernadoor Malta. Biojia'nnu rolijzni choṉ dxej. Huenduxh gujc dade'ga, baniidxni guiraa ni biquiinnu. 8 Naga' xtad Publio cayacxhuuni, yu'ni xliaa, cayajczani yobrejn. Huihuii Pablni. Guredx-gunab Pabl lo Dios, dxejc batzuub Pabl ṉaani yejcni, basiacgajcnini. 9 Che gucbee rebeṉguejdxga abasiajcni beṉ racxhuuga, bidzuṉnäjreni beṉ racxhuu lo Pabl, basiajc Pabl guiraareni. 10 Ni'c banidx-xliaareni xhidalduxh xhicos, luxh che biriinu ro'c, baniidxreni guiralii recos ni biquiinnu neṉ barcw.

Bidzujṉ Pabl guedx Roma

11 Agujc choṉ bäii yu'nu ro'c che biu'nu neṉ te barcw ni siääd Alejandría. Lagajc ro'c bateed barcwga rebäinajḻ che rsiäb beduxh. Yejc barcwga caj tiop figuur xten tiop biuux ni laa Cástor näjza Pólux, rexingancua'ch dios ni laa Zeus. 12 Biriinu Malta sonnu neṉ barcw nez guedx Siracusa. Ro'c bia'nnu choṉ dxej. 13 Dxejcti biusacnu neṉ barcw, sonnu lo nisdoo cheni bidzuṉlinu guejdx ni laa Regio. Che bara yääl, gubi' te bej birii lad sur. Biusacnu neṉ barcw. Bara yääl bidzuṉnu guedx Puteoli. 14 Ro'c bidxaagnu gaii xpejṉ Jesucrist. Najreni loonu:

―Coḻjiannäj nuunu ―najreni.

Bia'nnu ro'c gajdz dxej. Dxejc biriinu guejdxga, ni'nu sonnu nez guedx Roma. 15 Che gucbee rexpejṉ Jesucrist ni yu' guedx Roma siopsaanu nez Roma, biäädreni guedx Foro de Apio näjza stee guejdx ni laa Tres Tabernas, ro'c bidxaagreni nuure. Che bahuii Pabl lojreni, guzutijp lastooni, badeedni xquixtios lo Dios. 16 Che biu'nu guedx Roma, bateed capitán repres ladzṉaa comandant, niluxh basaanni cualaa Pabl te yu' cadro cuääzni. Tejtis soldaad biannäj Pabl.

Baluii Pabl xtidx Dios lo rebeṉ Roma

17 Che gudejd choṉ dxej, gurejdx Pabl reni rnibee lo rexpejṉ Israel. Che bidxaag sa'reni cadro yu' Pabl, räjpni lojreni:

―Guejbtu rexamigwä, resa'ä, xhetliidi nani xhet laadi benä lo rexpejṉ Israel, dizana nibälazä xleii toMoisés. Niluxh basäureni narä neṉ latzguiib guedx Jerusalén, dxejcti bateedreni narä ladzṉaa reroman. 18 Che biejn diajgreni xtidxä, rlajz reguxhtis roman nusḻaa narä sa'csi xhet benädi te nugu'treni narä. 19 Niluxh naaddi rexpejṉ Israel gusḻaareni narä, gunabätis lojpac ṟeii César jiädle'creni quej ni cabe'creni xcuentä. Niluxh narä xhet xquejdi rexpejṉ Israel cue'cä. 20 Ni'cni guredxä la'tu te fiä lojtu, te guininää́ la'tu, sa'csi rililazä lagajc si'c rililajz xpejṉ Israel sibaṉsac rebeṉgut, ni'c nalibä cadeṉre.

21 Dxejcti räjpreni lojni:

―Nicla tej guijtz gajd reguxhtis xten reguedx Judea guxhaḻ loonu xcuentlu, gajdza rexpejṉnu ni bidzujṉ ree jiädsa'n diidx xhet laadi bejnlu. 22 Rlajznu jiejn diajgnu xtiidxlu, don xhi naalu, sa'csi racbeenu xhidajl lajt rniyajreni redidxcoob xten Jesucrist ―räjpreni.

23 Guletireni te dxej guidxagsa'reni. Che bidzujṉ dxejga, bidxagsa' xhidalduxh bejṉ neṉ yu' cadro rbäjz Pabl. Guideb dxej basule' Pabl xtidx Dios lojreni. Basule'ni xho rnibee Dios lojreni. Con rediidx ni caj lo xleii toMoisés näjza diidx ni bacuaa reniguii nani gunii xtidx Dios basule'ni Jesús najc Crist nani galooli cabäjz rebeṉ Israel jiääd. 24 Yu' reni huililajz xtidx Pabl, yu'za reni di nililajz xtiidxni. 25 Sa'csi di niajcdi niujnreni tejsi xhigab gusloj siireni. Ganiddoo räjp Pabl lojreni:

―Guliica naj toIsaías che badeed Sprit Dxan xten Dios rediidxre guniini, räjpni lo rextadgoldoonu:

26 Huij, gunii lo rebejṉre, scree gojz lojreni:

Siejn diajgtu xtidxä, niluxh ditu gacbeeni.

Suhuiitu nani runä luxh ditu gumbee xhini'c ruhuiitu.

27 Agucnajd lastoo rebejṉre sa'csi di rlajzreni chalilajzreni xtidxä.

Direni cuadiajg xtidxä sa'csi di rlajzreni jiejn diajgreni diidx ni guliipac.

Rusäuzareni balojreni te di fiireni, te di lajzreni chalii.

Ni'cni direni gusiechlajzreni te gusaan gunreni dojḻ te gudzucaj Dios xtojḻreni.

28 Räjp Pabl lojreni:

―Coḻgacbee. N̲ajli sisiule' xtidx Dios lo rebeṉzijt ni di gac xpejṉ Israel te gusiejch lajzreni, te gudzucaj Dios xtojḻreni. Rniliä́pac lojtu, sililajzreni rextidx Dios.

29 Che gulujx gunii Pabl rediidxga lojreni, ensilaareni gusloj cadxagdijḻ sa'reni laḻ ni sääreni.

30 Tiop ijz guläjz Pabl guejdxga neṉ yu' ni cualaani. Biuni guiralii rebejṉ ni biääd rolijzni. 31 Lo guiraa rebejṉga basule'ni xho rnibee Dios lojreni. Bijzani diidx xcuent redzuun nani bejn Jesucrist. Di lastooni nidxejb, rutza badxojndi guniini.