Los Hechos 23

1 Pablo gunné̱'e̱ benne' xu'u lawe' blau ca', na' guzre̱' le̱':

―Le'e, bi bicha', ca naca xúgute̱ da ba be̱na' neda', zua zri xichaj lázrdawa' lau Dios.

2 Nadxa Ananías, bxruze blau, gunná bé'ene̱' benne' zaj ze̱' na' xelegape̱' dxu'a Pablo. 3 Na' Pablo beche̱be̱':

―Dios güe̱'e̱ lue', benne' dxun láweze da xrlátaje. Dxe'u na' chee̱ guchi'u chia' neda' ca dxenná bea da nadxixruj bea Dios. ¿Bizr chee̱ na' dxunu' da dxedábaga da bdxixruje̱', dxenná be'enu' xelu'e̱ neda'?

4 Benne' ca' zaj zre̱'e̱ na' gulé̱'e̱ Pablo:

―¿Caní schanni' dxennáu' chee̱ bxruze blau chee̱ Dios?

5 Pablo gunné̱':

―Le'e, bi bicha', quebe gunezda' che benne' nigá naque̱' bxruze blau lawe' da dxenná lu xiche chee̱ Dios: Quebe nneu' schanni' chee̱ benne' dxenná be'e̱ lázriu'.

6 Nadxa guque bé'ene̱' Pablo bal-le̱' benne' xu'u lawe' zaj naque̱' benne' saduceo ca', na' xebal-le̱' zaj naque̱' benne' fariseo ca', na' gunné̱' zizraj:

―Le'e, bi bicha', neda' naca' fariseo, ne xrtia' zaj naue̱' fariseo ca', na' dxuchí'ale ca naca chia' lawe' da dxebeza lazra' xelexebán benne' gate.

7 Gate gunná Pablo da nigá, na' benne' fariseo ca', ne benne' saduceo ca' gulezú lawe̱' dxulutil-la ljwezre̱' dizra', na' gulaca chupa la'a ca naca benne' ca'. 8 Ca'an guca lawe' da dxelenná saduceo ca' quebe xelexebán benne' gate, ne quebe nu chilá' gubáz chee̱ xabáa ca', ne quebe nu chilá' bénne'du xu'u bénneache, san benne' fariseo ca' dxeléajle̱'e̱ dxata' xúgute̱ da ca'. 9 Xúgute̱' gulebezre xe̱'e̱, na' gulezé̱ bal-la benne' dxuluxuzájle̱'e̱ da nadxixruj bea na, benne' zaj naque̱' fariseo, na' gulenné̱':

―Benne' nigá quebe bi da cale̱la ne gune̱'. Che nu bénnedu xu'u bénneache, u tu gubáz chee̱ xabáa ba gunné̱' le̱', quebe dxal-la' nne̱dxu chee̱ Dios.

10 Na' bulutíl-lale̱'e̱ ljwezre̱' dizra', na' benne' na' dxenná be'e̱ lu wedil-la bzrebe̱' xele̱l-le̱' Pablo xuluzúzruje̱' le̱'. Chee̱ le̱ na' gunná bé'ene̱' benne' dxjaca wedil-la xelexebéaje̱' le̱' láwela benne' ca', ne xelexeché'e̱ le̱' lu xu'u na' naga zaj zra' benne' dxjaque̱' wedil-la.

11 Xe̱la xula, Xránadxu ble'e lawe̱' Pablo, na' guzre̱' le̱':

―Be̱n dipa lazru', Pablo, lawe' da ca bchálajquezu' chia' Jerusalén nigá, ca'an dxál-la'queze guchálaju' chia' lu xe̱zre Roma.

Zaj nun benne' judío ca xelune̱' xelútie̱' Pablo

12 Zra xula bal-la benne' judío ca' belune̱' tuze dizra' xelútie̱' Pablo. Gulenné̱':

―Dios cu'e̱ dxi'u de' che bi xi'aj gágudxu, ne quebe ne gútedxu Pablo.

13 Nadé chua benne' biu ca' zaj nache̱be lazre̱' xelune̱' da nigá. 14 Benne' caní xjaque̱' lau benne' xíchaje̱ ca' chee̱ bxruze ca', ne benne' gula sina ca', na' gulenné̱':

―Netu' ba guche̱be lázrentu' lau Dios cu'e̱ netu' de' che bi gáguntu', ne quebe ne gútentu' Pablo. 15 Na'a, le'e, ne xezícadxa benne' xu'u lawe' blau ca' dxal-la' nábale benne' dxenná be'e̱ lu wedil-la xedajlegüe̱'e̱ Pablo wxre zila laule le'e, xe̱le bénnea' dxaca lázrele guché̱be xánnele Pablo, na' netu' se̱ cuásantu' gútentu' le̱' québela ne xide̱' nigá.

16 Zri'ine bi zan Pablo benbe' ca naca da nigá, na' guxíajbe' naga zua Pablo cheajé̱zrebe' le̱'. 17 Nadxa Pablo gunné̱' tu benne' xu'u lu ne̱'e̱ benne' ca' dxjaque̱' wedil-la, na' guzre̱' le̱':

―Guché̱' bi cuide' nigá lau benne' xíchaje̱ chiu' lawe' da de̱ da dxal-la' xe̱be' le̱'.

18 Na' benne' na' xu'u lu ne̱'e̱ benne' ca' dxjaque̱' wedil-la guché̱'e̱-be' lau xrane̱', na' guzre̱' le̱':

―Pablo, bénnea' nadxéaje̱' gunné̱' neda', na' gunabe̱' xedajgu'a bi cuide' nigá naga zu' lawe' da de̱ da dxal-la' xe̱be' lue'.

19 Benne' xíchaje̱ na' guqué̱'e̱ na' bi cuide' na', na' guché̱'e̱-be' chalá'ala, ne bche̱be̱'-be':

―¿Bi dxaca lazru' xu'u neda'?

20 Na' gunná bi cuide' na', gúzrebe' le̱':

―Benne' judío ca' ba zaj nune̱' tuze dizra' xelenabe̱' lue' che̱'u Pablo wxre zila lau benne' xu'u lawe' blau ca', xelenné̱' dxelaca lazre̱' xuluche̱be xánnie̱' le̱'. 21 Quebe chéajle̱'u chee̱ benne' ca' lawe' da nadé chua benne' ca' xelebeze̱' le̱' bagácheze, ne ba guleche̱be lazre̱' lau Dios Le̱' cu'e̱ benne' ca' de' che bi xele'aj xelawe̱', ne quebe ne xelútie̱' Pablo. Na'a ba zaj zue̱' dxelebeze̱' xrtizru'.

22 Nadxa benne' xíchaje̱ na' bze̱' bi cuide' na' dizra', na' guzre̱'-be' quebe nu xe̱be' ba xeajé̱zrebe' le̱' caní.

Dxelesel-le̱' Pablo lau Félix, benne' xu'u lu ne̱'e̱ xe̱zr la xu na'

23 Benne' xíchaje̱ na' gunné̱' chupa benne' chee̱', benne' xu'u lu ne̱'e̱ benne' ca' dxjaque̱' wedil-la, na' gunná bé'ene̱' le̱' xulucueze̱' chupa gaxúa benne' dxjaque̱' wedil-la, benne' sa'aca ni'e̱, ne ga xun chi benne' dxjaque̱' wedil-la, benne' xelebía bzrina', ne chupa gaxúa benne' dxjaque̱' wedil-la, benne' xelu'e̱ xia tunna, chee̱ chjaque̱' lu xe̱zre Cesarea dxedá' ga chizrela. 24 La gázqueze gunná bé'ene̱' xulucueze̱' bzrina' cuía Pablo, ne gunná bé'ene̱' xeleché̱'e̱ le̱' cháwedau' lau Félix, benne' xu'u lu ne̱'e̱ xe̱zr la xu na' waláz chee̱ Roma. 25 Gusel-le̱' tu xiche da belúa benne' dxjaque̱' wedil-la. Caní naxúaj na:

26 Neda' Claudio, dxugapa' lue' diuzre Félix, benne' xu'u lu na'u xe̱zr la xu nigá. 27 Benne' judío ca' gule̱l-le̱' benne' nigá ná'tega na'a chee̱ xelútie̱' le̱'. Gate gunezda' neda' nababe̱' Roma, na' guxíajle̱na' benne' chia' ca', benne' dxjaque̱' wedil-la, xeajselá' le̱'. 28 Guca lazra' nezda' bi dxelagu zria le̱', na' guche̱'a le̱' lau benne' xu'u lawe' ca' chee̱ judío ca'. 29 Na' gunezda' dxelagu zria le̱' da naca chee̱ da nadxixruj bea chee̱ judío ca', san quebe naca na chee̱ xelútie̱' le̱', ne chee̱ chu'e̱ lizre xia. 30 Gate benda' ca ba zaj nun judío ca' chee̱ xelútie̱' le̱', na' dxusel-la' le̱' naga zu', ne ba gucha' benne' ca' dxelagu zria le̱' waca xelawe̱' le̱' zria lau lue'. Gaca xrlátaje chiu'.

31 Nadxa benne' dxjaque̱' wedil-la belune̱' ca gunná be'e benne' xíchaje̱ chee̱', na' beleché̱'e̱ Pablo chizrela, na' belezrine̱' xe̱zre Antípatris. 32 Zra xula benne' dxjaca wedil-la, benne' ca' dxeledá' ní'aze, belexezrine̱' Jerusalén, na' benne' dxjaque̱' wedil-la zaj zrie̱' bzrina' beleché̱'e̱ Pablo naga dxal-la' zrine̱'. 33 Gate belezrine̱' xe̱zre Cesarea, na' bulunézruje̱' benne' xu'u lu ne̱'e̱ xe̱zr la xu na' xiche na', ne buludée̱' Pablo lu ne̱'e̱. 34 Ca bexuzre blabe̱' xiche na', na' benne' xu'u lu ne̱'e̱ xe̱zr la xu na' bche̱be̱' ga benne' Pablo. Gate benne̱' naque̱' benne' chee̱ xe̱zre nababa Cilicia, 35 na' guzre̱' le̱':

―Guchi'a chee̱ da dxaca chiu' gate xelelá' benne' ca' dxelagu zria lue'.

Nadxa gunná bé'ene̱' cha benne' dxjaca wedil-la xuluxúe̱' Pablo naga zua xu'u lawe' chee̱ Herodes.

<- Los Hechos 22 Los Hechos 24 ->