1 Timoteo 6

1 Benne' zaj nada'u dxal-la' xelápale̱'e̱ ba lá'ana xrane̱' ca' chee̱ quebe nu nne̱ schanni' chee̱ Dios, ne chee̱ da dxusé̱dedxu. 2 Che benne' zaj nada'u, zaj zra' xrane̱' ca' dxeleajlí lazre̱' Cristo, quebe dxal-la' xuluzúe̱' le̱' chalá'ala lawe' da zaj naque̱' benne' biche̱', san dxal-la' xelune̱' zrin da nácadxa xrlátaje chee̱ xrane̱' ca' dxelezi'e̱ ba neza zrin na', lawe' da dxeleajlí lazre̱' Cristo, ne zaj naque̱' benne' biche̱' zaj nazri'ine̱'. Bzéajni'i benne' ca' da nigá ne bsizre le̱'.

Da cale̱la da dxuluse̱de benne', ne xel-la gunní'a li

3 Che nu benne' dxusé̱dene̱' da zaj naca cale̱la da quebe zaj naca na tuze ca da bse̱de Xránadxu Jesucristo, ne ca da dxuse̱de da dxéajle̱dxu chee̱ Dios, 4 benne' nigá dxucá'ana szren cuine̱', ne quebe bi nézene̱'. Dxezá lázrele̱'e̱ gutil-le̱' benne' dizra' ca naca chee̱ tu tu dizra' ca'. Benne' dxelún caní:

Dxelaque̱' benne' xre lazre', ne dxeledil-le̱',

ne dxulucháchale̱ ljwezre̱',

ne dxeléquene̱' dxun le sa' ljwezre̱' da cale̱la,

5 ne tu lize dxulutil-la dizra' ljwezre̱',

ne zaj naque̱' benne' zaj nazrinnaj lu xichaj lázrdawe̱',

ne quebe zaj nunbe'e̱ da li.

Dxeléquene̱' zrin dxundxu chee̱ Cristo naca na tu da waca xuluchínene̱' chee̱ xelaque̱' benne' gunní'a. Quebe gunu' tuze benne' caní. 6 Da li da zéajle̱dxu chee̱ Cristo naca na tu da gunní'a zren, na' caní nácaqueze chee̱ tuze bénnea' dxezaca ba lazre̱' ca da nape̱'. 7 Quebe bi núadxu gate gúlajdxu lu xe̱zr la xu nigá, ne quebe bi xexúadxu gate xezá'adxu nigá, 8 san che de̱ da gágudxu, ne zra lánadxu, dxal-la' xezaca ba lázredxu nen da ca'. 9 Benne' ca' dxelaca lazre̱' xelaque̱' gunní'a, cheajlecházie̱' lu na' da xriwe̱', na' cheajlechu'e̱ lu xralaj chee̱ le̱ na, chee̱ xelezá lazre̱' da xálaze, da dxulucá'ana ditaj na bénneache, ne dxelegú'u na bénneache lu da ba xa' naga xelebía xi'e̱. 10 Benne' nazri'ine̱' dumí dxune̱' xúgute̱ da cale̱la, na' zaj zra' bal-la benne' gulezá lazre̱' na, na' bulusane̱' xel-la dxeleajlí lazre' chee̱', na' ba gulezí' lataj xel-la dxudía lu lázrdawe̱'.

Da dxusizre Pablo Timoteo

11 Lue', we̱n zrin chee̱ Dios, gucuasa lu da caní. Be̱n da naca xlátaje̱, ne bzua cuinu' lu na' Dios, ne guxeajlí lazre' Cristo, ne bzri'i Le̱', ne guca zren lazre', ne dxexruj lazre'. 12 Gudíl-lale̱ da xriwe̱', guchínenu' xel-la dxeajlí lazre' chiu'. Be̱xru tipa xel-la nabán da chadía chacanna lawe' da bláwizra Dios lue' chee̱ gapu' da nigá, na' ba blé'enu' ca dxeajlí lazru' Cristo láwela zane' benne' dxelexeche̱be̱' chee̱ na. 13 Na'a, lau Dios, Bénnea' nuzúe̱' xel-la nabán chee̱ xúgute̱ da naca ban, ne lau Jesucristo, Bénnea' cá'anqueze blé'ene̱' da naque̱', ne beche̱be̱' chee̱ na lau Poncio Pilato, dxenné̱ xueda' lue'. 14 Guzú' dizra' ca da dxapa' lue', ne quebe gucha'u na. Dxal-la' gunu' na chee̱ quebe nu seque' bi nne̱ chiu' ca zrin zra xelá' Xránadxu Jesucristo. 15 Ca zrin zra chee̱ na Dios sel-le̱' Le̱'. Naque̱' Dios tu licha', na' Benne' Lá'azxa dxenná be'e̱. Naque̱' Wenná bea, Benne' dxenná be'ene̱' wenná bea ca', ne naque̱' Xrana xúgute̱ benne' zaj naque̱' xrana bénneache. 16 Tuze Dios quebe gatie̱', ne zue̱' lu xel-la naxaní' naga quebe nu seque' cheaj. Netú bénneache quebe ne lé'ene̱' Le̱', ne quebe nu gaca le'e Le̱'. Chee̱ Le̱' naca xel-la ba lá'ana, ne xel-la dxenná bea chadía chacanna. ¡Ca'an gaca na!

17 Gunné̱ xue benne' zaj naque̱' gunní'a lu xe̱zr la xu nigá chee̱ quebe xulucá'ana szren cuine̱', ne quebe xuluxrén lazre̱' xel-la gunní'a chee̱', lawe' da quebe naca na da chadía chacanna. Dxal-la' xuluxrén lazre̱' Dios ban, Bénnea' dxúnnale̱'e̱ dxi'u xúgute̱ da dxechínedxu chee̱ sidxu da ba neza. 18 Gunné̱ xue benne' caní xelune̱' da xrlátaje, ne xelaque̱' benne' gunní'a lu da xrlátaje da xelune̱', ne bi xulunézruje̱' benne' xache' ca', ne xulunézrujle̱'e̱ na. 19 Caní gaca, xelezrué'ene̱' xel-la gunní'a da gaca na tu da guzúa chacha na le̱' lu zra da za za', ne xelape̱' xel-la nabán da zeajlí canna.

20 Lue', Timoteo, bxue xanne da nuzúa Dios lu na'u. Quebe guzé̱ nagu' dizra' xálaze chee̱ xe̱zr la xu nigá, da na' dxelenná bal-la benne' naca na xel-la sina. Da nigá naca na da we̱n lazre'. 21 Bal-la benne' gulezí'e̱ na, na' bulusane̱' xel-la dxeleajlí lazre' chee̱'. Dxenábeda' Dios gune̱' da chawe' chiu'. ¡Ca'an gaca na!