Marcos 8

Jesús mndaa kuu ndow thap mil zha

(Mt. 15:32‑39)

1 Ne lee re wiza mkaltaa naroob zha, ne napt zha kuu wu zha. Tsa mrez Jesús re zha kuu ngeteed lo Jesús, ne nzhab Jesús lo re zha:

2 ―Nlat leettsoon nen re zha ree, tak ndaʼa tson wiz nzi reʼaa nzhee, ne terka wu zha. 3 Os leen taalʼn zha liz zha ne wut zha, cha layaal zha net, tak thiban zha ndyaad tith.

4 Tsa lee re zha kuu ngeteed lo Jesús, mkab lo Jesús ne nzhab:

―¿Per xomod taaʼaa loww naroob men thib ta yubiz, taxal nzhee, ta yent cho nak?

5 Tsa mnaabdiz Jesús lo re zha, ne nzhab Jesús:

―¿Plal pan nap goo?

Tsa nzhab re zha:

―Gaze.

6 Tsa mnabee Jesús lo re men tob zha lo yu, ne mzhen Jesús re gaz pan ne ngwalo mndaa Jesús texkix lo Diox, mtsow rol Jesús pan ne mndaa Jesús pan lo re zha kuu ngeteed lo Jesús, ne lee re zha mdide lo re men. 7 Noga nap re zha chop tson mbel; ne mndaa Jesús texkix lo Diox por re mbela ne mnabee Jesús mdid zha maa. 8 Reta zha ndow asta mze leettsoo zha, ne mtse zha gaz chekwit ngoo re kuu byu kuu mrozhoob. 9 Ne teeka thap mil zha ndow, tsaraa mchaats Jesús re zha ndya zha laz zha. 10 Tsaraa lee Jesús kon re zha kuu ngeteed lo Jesús, mke re zha leen kano ne ndya zha yezlyu kuu le Dalmanuta.

Lee re fariseo mnaab thib seny lo Jesús

(Mt. 16:1‑4; Lc. 12:54‑56)

11 Tsa mzin re fariseo ne mndelo zha mbyodiz zha kon Jesús, tak nlaaz zha ne zha naa chu wli kuu ni Jesús. Tsa nzhab re zha lo Jesús:

―Tsow thib kwaa kuu beeta Diox tak tsow, tsa ne nee lee Diox mtaala.

12 Jesús mndii leettsoo ne nzhab:

―¿Chebee naab re men ree thib seny kuu gagt tsow re men? Wlipaa na kuu nin lo goo, neeka thib kuu thoz tsowtʼn lo re men nal tyemp ree.

13 Tsa mlaa Jesús re men, ne mre Jesús mndaab leen kano ne ndya re zha tedib lad roo nitdoo.

Re kuu mloo re fariseo nak taxal lebadur

(Mt. 16:5‑12)

14 Ne mtelaazt re zha kuu ngeteed lo Jesús gagwe zha kuu wu zha, thibka zha ne tsaka pan. 15 Ne leettsa nda re zha leen kano, tsa nzhab Jesús lo re zha:

―Bkenap goo goo lo lebadur chaan re fariseo ne lo lebadur chaan rey Herodes.

16 Ora lee re zha mndelo nzhab lo altaa:

―Tbaa ne zha, tak mtelaaztaa gagweʼaa pan.

17 Jesús myeen kuu ngetediz re zha, tsa mnaabdiz Jesús lo re zha, ne nzhab Jesús:

―¿Chebee mbez goo napt goo pan? ¿Chu bee ter yen gooy? ¿Chu thitanax mkow yek goo par yen gooy? 18 ¿Nap goo ngutlo goo ne nyenite lo goo, nap goo nza goo ne nzhont gooy? ¿Chu thitanax ntelaazt goo? 19 Leettsa mtsow rolʼn pan ndow thib gaay mil mbyi, ¿plal chekwite mrozhoob?

―Tsiibchope ―nzhab re zha.

20 ―Ne leettsa mtsow rolʼn pan ndow thib thap mil mbyi, ¿plal chekwite mrozhoob?

―Gaze ―nzhab re zha.

21 Tsa nzhab Jesús:

―¿Chu terka yen gooy?

Jesús mtegwe thib zha syeg

22 Leettsa mzin re zha yez kuu le Betsaida, tsa lee thiban zha ndyaadno thib mbyi syeg lo Jesús, ne nzhab re zha lo Jesús:

―Tsow yalwen bxoob yaaʼa dits mbyi ree, tsa gwe mbyi.

23 Tsa mzhen Jesús yaa syeg ne mloo Jesús zha thib lad roo yez, ne mtenit Jesús lo zha kon nzuk, ne mxoob Jesús yaa Jesús yek zha, oraaka mnaabdiz Jesús lo zha, ne nzhab Jesús:

―¿Chu nyeniʼa loʼa?

24 Lee syeg mndelo mwii ne nzhab:

―Nloo re zha lon, taxal ya nloo zha.

25 Tsa mre Jesús mdiinn ngutlo syeg, ¡ora lee syeg mwii, tak mgweʼa ngutlo zha ne reta kuu mloo lo zha! 26 Tsa mtaal Jesús zha liz zha, ne nzhab Jesús lo zha:

―Ridta leen yez.

Pey nzhab lee Jesús nak Crist, Zha Kuu Ne Diox Yaad

(Mt. 16:13‑20; Lc. 9:18‑21)

27 Leettsa lee Jesús ne re zha kuu ngeteed lo Jesús, ngwa re ranch chaan yezlyu kuu le Cesarea-Filipo. Ne or ndo re zha net, tsa mnaabdiz Jesús lo re zha kuu ngeteed lo Jesús, ne nzhab Jesús:

―¿Cho nakʼn ni re men?

28 Lee re zha nzhab:

―Thib net zha mbez lee lu nak Juan kuu mtsowleyy, tedib net zha mbez lee lu nak profet Lí zha ndala, ne lee tedib net zha ni lee lu nak thib re profet.

29 ―Lee re goo, ¿cho nakʼn ndak goo?

Pey mkab ne nzhab:

―Lu nak Crist Kuu Mtaal Diox Nabee.

30 Per lee Jesús mnabee lo re zha ne nzhab:

―Neeka thib lo zha gabt goo koree.

Jesús mndaa kwent naa xomod gath Jesús

(Mt. 16:21‑28; Lc. 9:22‑27)

31 Jesús mndelo mloo lo re zha kuu ngeteed lo Jesús, ne nzhab Jesús lo re zha:

―Na nak xgann mbyi, Kuu Mzin Ngok Men, ne ndoblo ridʼn yalti, ne neeka kayaat re zha gol na neeka re ngwleyy kuu nabee lo re ngwleyy, neeka re maestr chaan ley. Ne kuth re zha na, per leettsa tsaal tson wiz lee na roban.

32 Nambi nzhab Jesús koree. Tsa mloo Pey Jesús thib lad, ne mndelo mkox Jesús lo Pey. 33 Per lee Jesús mtsere lo mwii lo re zha kuu ngeteed lo Jesús, ne mkox Pey lo Jesús ne nzhab Jesús:

―¡Beche lon, lu nak taxal Maxuuy! Ntsowta xgab taxal ntsow Diox xgab; lu ntsow xgab taxal ntsow re men xgab.

34 Tsa mrez Jesús re zha kuu ngeteed lo Jesús ne re men, ne nzhab Jesús:

―Os lee thib goo nlaaz teke ditsʼn, ndoblo laa goo reta kuu nap goo, ne reta kuu nzo yek goo tsow goo, ne ndoblo thib ko goo leettsoo goo gath goo, tak nyelaaz goo na. 35 Os lee thib zha nzeb zha gath zha, tak nyelaaz zha na, tsowt zhaʼa gan yalnaban kuu thitanax. Per lee zha kuu nzebt gath, tak nyelaaz zha na, zhaʼa tetsow gan yalnaban kuu thitanax. 36 Per kwan tsow zha gan keno zha reta kwaa nzo yezlyu ree, ne tsowt zha gan yalnaban yibaa. 37 Neeka thib kwaa gagt taa zha lo Diox, par tsow zha gan yalnaban kuu thitanax yibaa. 38 Os lee thib zha nthoy zha ne zha na ne xkizʼn xid re men tyemp ree, re men kuu thitanax mlaa Diox ne thitanax went nak, noga na Kuu Mzin Ngok Men, tethoyʼn nen zhaʼa, leettsa bretabʼn kon xni chaan Xutʼn ne kon re mandad Xutʼn kuu nayon.

<- Marcos 7 Marcos 9 ->