Lucas 13

Ndoblo tsee men mod went kuu nak men

1 Ne leeka thib re wiza, ngwa chop tson zha nzhab lo Jesús, lee Pilat mbeth chop tson zha yezlyu Galilea, ne mchuuxnit Pilat ren re zhaʼa kon ren re maa kuu mndaa re zhaʼa lo Diox.

2 Tsa nzhab Jesús lo re zha:

―¿Kwan ntsow goo xgab? ¿Chu ntsow goo xgab tata mzhaak re zhaʼa, tak masraa falt ndab zha nake tedib net re zha yezlyu Galilea? 3 Per lee na ni lo goo, nagte tata; ne os lee goo laat goo re mod went kuu nak goo, ne yelaazt goo Diox, noga goo tath goo. 4 Ne, ¿kwan ntsow goo xgab? Leettsa mla thib yuu naro dits re tsiinbtson zha, thib ta le Siloé ne nguth re zha, ¿chu ntsow goo xgab masraa ndab re zhaʼa falt nake re zha yez Jerusalén? 5 Bren ganin lo goo, nagte tata; os lee goo laat goo re mod went kuu nak goo, ne yelaazt goo Diox, noga goo gath.

Kwent nanzee chaan ya ig kuu ndaat xle

6 Tsa lee Jesús nzhab tedib kwent nanzee lo re zha, ne nzhab Jesús:

―Thib mbyi mkeno thib xann ya ig lo yu zha ta nzhann zha luts ub. Ne ngwa zha ngwakwaan zha ig lo ya, per neeka thib ig mzalt lo zha. 7 Tsa nzhab zha lo zha kuu nkenap yu zha: “Wii, ndaʼa tson liin thibka nyalʼn nyaadkwaan na xle lo ya ree, per neeka thib welt nzaltʼn xle lo ya. Bgay tak ntetsaay yu da.” 8 Per lee zha kuu nke tsiin lo zha, nzhab: “Zha Nabee, btaane tedib liin, nal teleen yu xanne ne gon bewgwe, 9 ne os leey taay xle ya wene, per os leey taate xle tsa ga nay”.

Jesús mtegwe thib ngot wiz kuu ndroxkwan re zha Israel

10 Jesús mloo lo re men ta nkaltaa zha nteed zha xkiiz Diox wiz kuu ndroxkwan zha. 11 Ne tya ndo thib ngot kuu ndaʼa tsiinbtson liin ndakti lo thib mbi went, kuu ndaat diiz li dits ngot. 12 Ne leettsa mwii Jesús zha, tsa mrez Jesús zha, ne nzhab Jesús lo zha:

―Mgweʼa lu lo yiz went kuu mzhaaka.

13 Ne mxoob Jesús yaa Jesús dits zha, ne oraaka lee dits zha mli, ne mndelo zha mbil zha lo Diox. 14 Tsa lee zha kuu nabee ta nkaltaa re zha nzhool zha lo Diox, mkezhyan zha, tak lee Jesús mtegwe thib ngot wiz kuu ndroxkwan re zha, tsa nzhab zhaʼa lo re men:

―Xoop wiz nke men tsin thib sman ne tsow men re kwaa, tsa ndoblo goo yaad goo tsa tegwe zha goo. Per yaadt goo wiz kuu ndroxkwanaa.

15 Tsa lee Jesús mkab ne nzhab:

―¡Zha nkedi nak goo, zhaa kuu mbez goo ne zhaa kuu ntsow goo! ¿Chu nxagt goo ngon goo o burr goo, wiz kuu ndroxkwanaa, ne nyano goo maa nzhuu maa nit? 16 Ne lee ngot ree, nak zha raz chaan Abraham, ne ndaʼa tsiinbtson liin naliib zha lo Maxuuy, ne ¿chu ndoblot laa ngot nal wiz kuu ndroxkwanaa?

17 Leettsa ngwalo nzhab Jesús kona, reta zha kuu nayii ne Jesús mthoy zha, per lee re men kwathoz naley ngoo leettsoo mwii re kuu thoz kuu mtsow Jesús.

Kwent nanzee chaan mbiz mostaz

(Mt. 13:31‑33; Mr. 4:30‑32)

18 Tsa lee Jesús nzhab lo re men:

―Nal leen ta tedib kwent nanzee lo goo, chaan ta nabee Diox. 19 Leey nak taxal thib mbiz mostaz kuu ngonn thib mbyi lo yu mbyi. Mlene, mzhene ne ngoke thib ya, tsa lee re min mdexkwaa lyaat lo re zhite.

20 Noga nzhab Jesús:

―Nal lee na ta tedib kwent nanzee lo goo, tsa ne goo xomod nak ta nabee Diox. 21 Leey nak taxal lebadur kuu mloo thib ngot leen tson medid arin, tsa tsowe yezhoob koob.

Pwert naya

(Mt. 7:13‑14, 21‑23)

22 Ne leettsa ndo Jesús net nda Jesús Jerusalén, tsa mloo Jesús lo re zha kuu nzo re yez ne lo re zha kuu nzo re ranch ta ndriid Jesús. 23 Tsa lee thib zha mnaabdiz lo Jesús, ne nzhab:

―Zha Nabee, ¿chu lut zha nak zha kuu tsow gan yalnaban kuu thitanax?

Tsa lee Jesús mkab ne nzhab:

24 ―Bxek goo tsa tetsow goo gan tab goo roo pwert kuu naya, tak wlipaa na nin lo goo, kwathoz zha kwaan zha tab zha, per tsowt zha gan tab zha.

25 ’Ne leettsa lee zha kuu nak chaan yuu yeteli tow roo yuu, tsa lee re goo kuu yaan lee teez goo roo yuu, ne gab goo: “Zha Nabee, xaal roo yuu lo nee”. Tsa lee Zha Nabee kab lo goo ne ne: “Nlebeetʼn goo, ne neeka netʼn naa cho nak goo”. 26 Tsa lee re goo telo ne lon: “Ndow nee kon lu ne ngwii nee kon lu, ne lu mloo lo re tawlaz nee re net”. 27 Per lee na ni lo re goo tedib welt: “Nlebeetʼn goo, neeka netʼn naa cho zha goo; beche goo lon, zha kuu ntsow kuu went”. 28 Ne tsa gonn goo ne tub keley goo, or wii goo Abraham, Isaac, Kob ne reta profet, re zha kuu nzo yibaa ta nabee Diox, ne lee re goo yaan lee. 29 Tak kwathoz re zha kuu nzo dib naxta lo yezlyu, yaad tob roo mes leen yibaa ta nabee Diox. 30 Ne nzo chop tson goo kuu nataagt nal, gak nataak tsya; ne lee re goo kuu nataak nal, lee tsya gak goo zha nataagt.

Mlat leettsoo Jesús mne Jesús zha yez Jerusalén

(Mt. 23:37‑39)

31 Ne lee chop tson fariseo mbig lo Jesús, ne nzhab:

―Broo nzhee ne tyee, tak lee rey Herodes nlaaz kutha.

32 Lee Jesús mkab ne nzhab:

―Gwa goo ne guz goo lo mbeeta: “Naltseree ne yee gon re mbi fyer, ne tegwen re mbyiz, ne lee wiz yelo luuzhʼn rtsin na”. 33 Per ndoblo ndaka na xnetʼn, naltseree yee ne wiz. Tak ndoblot gath thib profet ta nagt Jerusalén.

34 ’¡Men Jerusalén, men Jerusalén, goo kuu nzhuth re profet ne nkee ke yek re zha kuu ntaal Diox lo goo! ¡Tyen welt ngwalazʼn gathopʼn re zhiinn goo, taxal nthop ngid re bich ngid xann xiil ngid, per mzhyalt goo! 35 Wii goo, lee ta nzo goo yaan wan; ne wlipaa na nin lo goo, bret raa goo wii goo na, asta leettsa tsin wiz kuu gab goo: “¡Kwathoz wen nak zha kuu ndyaad kon yalnabee chaan Zha Nabee!”

<- Lucas 12 Lucas 14 ->