Hechos 2

Mkayaa re zha Mbi Nayon

1 Or mzin wiz kuu nyoo ani kuu le Pentecostés, reta zha kuu nyelaaz Jesús mkaltaa ne thibka mrin re zha. 2 Ne cha ngoo thib bi kuu mroo lobee, taxal bi chaan thib mbi thoz, kuu mndez dita leen yuu ta nzi re zha. 3 Tsa mloo taxal loz bel, kuu mraats mlaal mla yek kadta thib re zha. 4 Ne reta zha mkayaa Mbi Nayon, ne mndelo re zha mndediz zhaapaa zhaapaa diiz, kuu nlaaz Mbi Nayon tediz zha.

5 Ne re wiza lee re zha Israel kuu ndyaad gol lo Diox kuu nzi Jerusalén, re zha kuu ndyaad reta ta lo yezlyu. 6 Or mbin re zha biʼa, kwaro zha mzin tya tsa naa kwan ngok, ne neeka net re zha naa kwan tsow zha xgab, tak kadta thib re zha nzhon zha ndediz re zhaʼa mer xkiiz zha. 7 Kwathoz mzegey leettsoo re zha, ne mndelo zha mnaabdiz zha lo altaa zha, ne nzhab zha:

―¿Chu nagt zha Galilea re zha kuu ngetediz ree? 8 ¿Chebee nzhonaa ndediz zha mer xkiizaa? 9 Nzhee nzi reʼaa kuu ndyaad re yezlyu ree, Partia, Media, Elam, Mesopotamia, Judea, Capadocia, Ponto, Asia, 10 Frigia, Panfilia, Egipto, Libia kuu nzi gax Cirene ne noga zha Roma kuu nzo tree. Re zha kuu nak zha Israel ne re zha kuu ngok zha Israel, tak nyelaaz zha re kuu nyelaaz re zha Israel. 11 Ne noga nzi zha yezlyu Creta ne zha yezlyu Arabia nzhee. Per retalee ngeyon re kuu thoz kuu ntsow Diox, tak ngeyonaa ndediz re zha mer xkiizaa.

12 Kwathoz mzegey leettsoo re zha, ne neeka net zha naa kwan tsow zha xgab, ne naabdiz zha lo altaa zha, ne mbez zha:

―¿Kwan koree?

13 Per lee tedib net zha mzhizno zha re zha Jesús, ne mbez zha:

―¡Nduz re zha baa!

Kuu nzhab Pey lo re men

14 Tsa ngwateli Pey kon re tsiibthib apóstl, ne nex nzhab Pey:

―Reta goo zha Israel, ne reta goo kuu nzo yez Jerusalén. Bne goo koree, ne wen bin goo kuu nin lo goo. 15 Nduzt re zha ree taxal ntsow goo xgab, tak til nal penta nzhak las nueve. 16 Sinke nal ngeyak kuu nzhab profet Joél, leettsa nzhab profet:

17 Diox nzhab:

“Thib wiz leen taal Mbi Nayon da leettsoo reta men lo yezlyu.

Ne lee re xgann goo ne re rtsaap goo,

taa kwent kuu gapʼn lo zha,

kwaro kuu yibaa loo lo re xgann goo kuu mndyeen,

ne lee re zha gol kwaro kuu tsaa leettsoo zha.

18 Ne re wiza taalʼn Mbi Nayon da lo reta zha kuu ntsow rtsin na,

lo zha byi ne lo zha got,

tsa taa zha kwent xkizʼn,

ne gab zha re kuu nlazʼn gapʼn lo re zha da.

19 Lee lobee tsowʼn re kuu thoz,

kuu tetsegey leettsoo re men wii men,

lee lo yezlyu loo ren, bel, xkow ne tsen.

20 Lee lo wiz kow ne lee lo mbee loo taxal ren,

leettsa terka tsin wiz ro kuu yaad Zha Nabee.

21 Ne reta zha kuu naab lo Zha Nabee,

tetsow zha gan yalnaban kuu thitanax.” [Joél 2:28-32]

22 ’Men Israel, kenza goo kuu nin lo goo nal, wen ne goo lee Jesús zha Nazaret, nak thib mbyi kuu mtaal Diox lo re goo, ne mtsow Jesús kwaro re milagr ne re kuu thoz kuu mzegey leettsooʼaa. Tbaa mloo Diox lee Diox mtaal Jesús. 23 Ne ndala neʼa Diox naa kwan tsowno goo Jesús. Mzhen goo Jesús ne mndaa goo Jesús lo re zha went, tsa mbeth zha Jesús lo kruz. 24 Per lee Diox mteroban Jesús, ne mtelaa Diox Jesús lo yalguth, tak gagt nabee yalguth lo Jesús. 25 Ne leettsa mteth rey David Jesús, nzhab David:

Ngwiin lee Zha Nabee lon thibka ndo kon na,

lee zha ndo lad ban lon, tsa thibka ney ndon.

26 Kona naley nzo leettsoon, ne kwathoz lazʼn nzhoolʼn lo zha.

Tak neʼa na yent kwan takʼn or gathʼn,

27 tak laata yalnaban da leen baa ta nzo re zha nguth,

ne neeka laata yetsaa kwerp mosa, kuu mndaat falt.

28 Mlooʼa lu net kuu ndaa yalnaban lon,

ne lu ntsow naley nzo leettsoon, tak ndoʼa lon. [Sal. 16:8-11]

29 ’Wets taa goo diiz nin koree lo goo. Lee teyaa David zha ndala, nguth David ne mkaats zha David, ne lee baa David ndobka xidaa asta wiz naltseree. 30 Per David ngok profet lo re men, ne wen mne David lee Diox nzhab lo David, lo raz David yaad Crist, zha kuu tob ta mndob David mnabee David. 31 Ne mni David taxal thib zha kuu mwiiʼa re kuu gak: Lee yalnaban chaan Zha Kuu Mtaal Diox Nabee, yaanta ta nzo re zha nguth, ne neeka kwerp zha yetsaat. 32 Ne lee Diox mteroban Jesús ne retalee ney. 33 Ne leettsa mroban Jesús tsa ndya Jesús ndob lad ban lo Diox, ne mkayaa Jesús Mbi Nayon kuu nzhab Xutaa lo Jesús desde ner, ne lee nal mtaala Jesús Mbi Nayona lo yezlyu ree, ne Mbi Nayona mtsow kuu ngewii goo ne ngeyon goo nal. 34 Ne ngwat David yibaa. Per leeka David nzhab:

Lee Diox Kuu Nabee, nzhab lo Zha Nabee lon:

“Btob lad ban lon,

35 asta yelo tsin re zha kuu nayii neʼa, xann niiʼa,

tsa tobxub zha loʼa”. [Sal. 110:1]

36 ’Kona retalee zha Israel ndoblo ne: Lee Jesús zha mkee re goo lo kruz, Diox mtsow nak Jesús Zha Nabee, ne lee Jesús nak Crist Kuu Mtaal Diox Nabee.

37 Or mbin re zha kuu mkaltaa tya koree, kwathoz nabil ngoo leettsoo re zha, tsa mnaabdiz zha lo Pey ne lo re apóstl, ne nzhab zha:

―Wets, ¿kwan ndoblo nee tsow nee?

38 Tsa lee Pey mkab lo re zha, ne nzhab:

―Btsee goo mod nak goo, ne gokleyy kadta thib goo kon le Jesucrist, tsa tuyy Diox re falt goo, ne taa Diox Mbi Nayon lo goo. 39 Tak lee kuu mne Diox taa Diox nak par re goo, par re zhiinn goo ne par re zha ndo tith, leey nak chaan reta zha kuu nlaaz Diox kwez Diox.

40 Kon re diiz ree ne kon tedib net diiz mni Pey lo re zha ne mteni Pey re zha, ne nzhab Pey:

―¡Broo goo lo re zha kuu ntsow kuu went!

41 Ne tata, lee re zha kuu ngwalaaz kuu nzhab Pey, ngokleyy zha, ne wiza mla teeka tson mil re zha xid re zha kuu nyelaaz Jesús. 42 Reta zha kuu ngwalaaz Jesús, ntsow zha kuu mbez re apóstl, ne thibka nak xgab re zha, ne nzhow re zha rtsee chaan Zha Nabee, noga nkaltaa re zha naab zha lo Diox.

Tenzhee ngoo re zha kuu ngwalaaz Jesús ner

43 Ne reta men kwathoz mzegey leettsoo, por re milagr ne re kuu thoz kuu mtsow re apóstl. 44 Ne reta zha kuu ngwalaaz Jesús thibka ngok xgab re zha, ne ngiid zha re kuu nap zha lo re altaa zha kuu ndechey. 45 Ntho re zha kuu nap zha, ne nyadno zha temi ne ngiid zhay lo re zha taxalta ndeche zhay. 46 Ne gandata wiz nkaltaa re zha lee gwodoo, nkaltaa zha liz re altaa zha ne thibka nzhow re zha, ne kwathoz naley nzo leettsoo re zha, ne kwathoz nke leettsoo zha altaa zha. 47 Ne nzhool re zha lo Diox, ne dita yez nyow leettsoo naa xa nak re zha, ne kad wiz lee Zha Nabee ntsow ayud re zha, tsa nyoo raa zha kuu nyelaaz xkiiz zha, ne ntuyy Diox falt chaan re zhaʼa.

<- Hechos 1 Hechos 3 ->