ROMANOS 9

Diox mcui mèn che'n nación Israel par yòo mèna loo cón che'n Diox, ne.

1 Com le' daa ndxela'sque' loo Crist, ¿lé'?, ngue tan cuent co' nac lìcpe' loo gu'. Ingue quedìiden gu'. Tac Xpii Natú' co' nzo loon no co' nzo le'n lezon, Xpii Natú' ndli par nden'en le'n lezon lìcque' nac di's co' ngue toodizen loo gu' nalle'. 2 Anze'f nxi lezon. No ndxetub thìb yalnè tín' le'n lezon por cón che'n mèn nación Israel. 3 Por tant nque' lezon ñèen mèn co' nac mèn nacionpe' daa, co' nac mèn nación Israel, mèn co' nac mèn gulàaz daa, más quee lezon ngàc daa mèndèe loo Diox, co' nee di's, mèn ye'rsin' loo Diox par ryo xà'en loo cón che'n Crist par tetìi Diox daa thidtene par bel'que' tataa mod lyá' mèn nacionpe' daa loo con' ryes. 4 Mèna nac bin che'n thìb mbi' co' ngro' lèe Israel co' ngòc mbi' co' mbloj msi' biz no bin co' nac mèn nación Israel nalle'. Mèn co' ngòc bin mbi'a, Diox mblo cuent ngòc mèna xal xin'pe' Diox. Ngòo Diox làth mèna. Gunèe mèna con' roo no con' xèn co' nac Diox. Mbli Diox par mbyan' no mèna thìb conveñ. Mnibe' Diox loo Moisés xo'f Moisés thìb ley loo mèna. Mnibe' Diox loo mèna xá mod li mèna sirv loo Diox le'n templ mèn. No mtan' Diox di's co' mcàbgòn Diox li Diox co' nac con' ndac loo mèna. 5 Nac mèn nación Israel nalle' bin che'n mbi' co' ngro' lèe Israel co' mbloj msi' bin co' nac xudgool na', bin co' ngòc mèn nación Israel yiloa. Làth bin mèna ngóol Crist xal ndxáal chol mèn. Crista nac yubpe' Diox loo ryethe con'. Por cona, gab na' di's roo no di's xèn no di's natú' cón che'n Crist loo mèn le'n lín' co' ntlo, no le'n lín' co' ndxelo, no le'n lín' co' ne'lith node. Taandxè' gàca.

6 Inacta le' con' co' mcàbgòn Diox li Diox loo mbi' co' ngro' lèe Israel ne'gàcte. Ndxe'leque', más huen gab na' iryede mèn co' nac bin mbi' co' ngro' lèe Israel, lìcque', nacpe' mèn nación Israel. 7 Lomisque' ne, iryede bin Abraham ngo Diox cuent nac binpe' Abraham. Ndxe'leque', Diox ndxab loo Abraham: Por cón che'n bin Isaac daa go cuent le' lùu mbli bin. 8 Con'a nee di's le' mèn co' nac chol bin mbi' co' lèe Israel ndxè', inpor con'ade ngo Diox cuent nac mèn co' nac bin che'n mbi' co' ngro' lèe Israel xin' Diox. Ndxe'leque', Diox ngo cuent nac mèn nación Israel xin'pe' Diox, mèn co' ngóol xalque' mcàbgòn Diox loo Abraham li Diox loo Abraham par que no Abraham bin. 9 Tac di's co' mcàbgòn Diox loo Abraham li Diox loo Abraham taandxè' mbez:

Co'se' gàc huiz co' mnibe'en loo lezon, axta syare', zin huiz gal neen máa gu'. Huiza, lin par hue' xin' Sar par tyan Sar thìb xgan' Sar.

10 Iante xal ngòca loo Abraham no loo Sar ngue tan cuenta loo gu'. Ndxe'leque', ryop xgan' Rebec co' ngòc cuach, thidte Isaac ngòc xud myen'. Ngòc Isaac xudgool na', ne. 11-13 Per co'se' ne' ne' tar gáal ryop hues myen' xgan' Isaac, ne' ne' tar li myen' con' ndac no ne' ne' tar li myen' con' ye'rsin', Diox ndxab loo Rebec:

Yé' huize', mbed ndlyo gàc moz co' li sirv loo mbed co' nac mbed bluz.

Thidte nac di's co' ngue niin loo gu' ndxè' xalque' mbez di's co' ndub loo libr co' nac xti's Diox tedib lugar co'te' ndub di's co' ndxab Diox:

Anze'f nque' lezon Cob. Ngudloon no lezon Cob. Per por part cón che'n Esaú, nzo xyàn lezon ñèen Esaú.

Por cona, non na' le' Diox ndxàp derech cui Diox mèn xal neete lezo' Diox par yòo mèn loo cón che'n Diox. Yende chó mport nzo lezo' Diox con' ndli mèn, aa guneei ¿ché' nac mèn mèn huen o ché' nac mèn mèn ye'rsin'? co'se' cui Diox mèn par yòo mèn loo cón che'n Diox.

14 ¿Cón gab na' cón che'n con' mbli Diox, sya? ¿Ché' tab na' no ché' ndli na' cuent nac Diox thìb Diox co' indlide con' nalì no con' nambìi co'se' mbli Diox con'a, cà'? Yende xàa. Nec thìb mod no nec tedib mod ne'gabte na' tataa, ¿lé'? 15 Tac Diox ndxab loo Moisés tedib vez:

Lyat lezon ñèen mèn co' lyazen lyat lezon ñèen. No anze'f nazín' gàc mèn co' lyazen gàc nazín' mèna loon.

16 Por cona, yende mod gab mèn le' Diox ndlyat lezo' ñèe Diox mèn ante xal neete lezo' mèn. Ne' ne' gab mèn ante ndlyat lezo' Diox ñèe Diox mèn por con' ndac co' ndli mèn. Ndxe'leque', Diox ndlyat lezo' ñèe Diox mèn ante xalte ñibe' lezo' Diox lyat lezo' Diox ñèe Diox mèn. 17 Ndub di's loo libr co' nac xti's Diox co' mbez le' Diox ndxab loo Faraón co' ngòc rey loo mèn nación Egipt:

Na mbli ngòc lùu rey par lu'en loo mèn cón che'n ryethe con' roo no con' xèn co' nzo la's niin no con' co' nzo la's yan por cón che'n con' co' mblin lool. No mblin ngòc con'a lool par tataa mod mxyo'f lèe mxyo'f xti's daa loo mèn dib athu loo izlyo' por cón che'n con' mblin lool.

18 Por cona, non na' no nanee na' le' loo mèn co' ndlya's Diox lyat lezo' Diox ñèe Diox, loo mèna ndlyatque' lezo' Diox ñèe Diox. No loo mèn co' ndlya's Diox teyez Diox lezo' mèn, loo mèna nteyezque' Diox lezo' mèna par ndxàc mèna mèn naad no mèn nguud.

19 Per thìb descuid ñee gu' loon: Chele'i tataa nac loo cón che'n Diox, ¿chonon nque dol Diox mèn cón che'n xtol mèn, sya? Mastale' lya's gu' ñèe gu' con' loon: per ¿chó gác cà di's cón che'n co' nee lezo' Diox li Diox, à'? Yende xàa, ey. Bìn gu' di's co' ngue niin loo gu' ndxè': 20 ¡Aa mèn izlyo'! ¿Máa yob yéc gu', na? ¿Chó nac gu' par gol' di's gu' con Diox, à'? ¿Ché' tab thìb yàat yòo loo thìb mbi' co' ntoxcua' yàat yòo: ¿Chonon taandxè' mtoxcua' lùu daa, à'? Yende xàa. 21 ¿Chó ñibe' loo Diox par li Diox con' ndlya's mèn, à'? Bli gu' xtùuz cón che'n thìb mbi' co' ntoxcua' yàat con ben. ¿Ché' yende mod toxcua' mbi' thìb yàat co' li zin' mbi' cusin xal nee lezo' mbi'? No ¿ché' yende mod toxcua' mbi' thìb yàat co' li sirv loo mbi' xal thìb vacin? Nzoque' mod toxcua' mbi'i xal lya's mbi'i, ¿lé'? Ale'que' Diox con mèn, ¿lé'? ¿Chó ñibe' loo Diox?

22 ¿Ché' tác na' ñii yèe ñii tìi na' cón che'n Diox co'se' leque yub Diox mcha'la's gunèe Diox mèn, mèn co' ndlya's Diox tyactìi no gàc yalquìi loo mèn? Mastale' mblya's Diox ngli Diox ngàc con'a loo mèn par nglu' Diox cón che'n con' roo con' xèn co' nzo la's ya' Diox no co' nzo la's nii Diox, per ndxe'leque', lugar de ngli Diox con'a, le'le' mxec yèe Diox gunèe Diox mèn. Ne'ngàcte yalquìi loo mèna par ntelux Diox mèn nalle'. Thìba con'a.

Le' tediba na, lìcque', teluxque' Diox mèna yiloa. Por cona, yende mod ñii yèe ñii tìi na' cón che'n con' ngue li Diox, ¿lé'? 23 Mbli Diox ne'ngàcte yalquìi loo mèn. Ndxe'leque', mblyat lezo' Diox gunèe Diox taamas mèn, co' nee di's nac na', par lu' Diox loo na' cón che'n con' roo con' xèn co' nzo la's nii Diox no con' co' nzo la's ya' Diox. Más de cona, Diox mblo' xà' na' loo cón che'n xab izlyo' par mbli nable' Diox na' par gàca loo na' yòo ban no na' Diox par gàc con' roo con' xèn loo na' co'te' nzo Diox loo bé'. 24 Gu' nonque' no nda'que' gu' cuent le' Diox mcui ndxep na' no mblo' xà' Diox ndxep na', co' nee di's, ndxep mèn co' nac mèn nación Israel, no ndxep mèn co' inacte mèn nación Israel, par ngòo na' loo cón che'n Diox por cón che'n Crist. 25 Ndxàca loo mèn nalle' xal ndub di's loo libr co' mque' Ose ye's co' nac xti's Diox. Di'sa mbez taandxè':

Mèn co' inacte mèn nacionpe' daa, mèna mcuin no mblo' xà'en mèna par gàc mèna mèn nacionpe' daa. No mèn co' yende chó nque' lezo' ñèe xal thìb xa'got co' yende chó nque' lezo' ñèe, mèna nque' lezon ñèen.

26 Leque loo libr co' nac libr che'n Ose co' mque' Ose ye's, libr co' nac xti's Diox, loo libra ndub di's co' guniique' Diox cón che'n mèn co' inacte mèn nación Israel. Ndxab Diox: Gu' co' inacte mèn nacionpe' daa, per mastale' inacte gu' mèn nacionpe' daa, yiloa gàc gu' xin'pe' daa, daa co' nac Diox co' naban thidtene.

27 Per cón che'n mèn nación Israel, Sayi co' mde'th di's co' ndxab Diox, Sayi mde'th di's cón che'n mèna taandxè':

Mastale' mèn co' nac bin mbi' co' ngro' lèe Israel yas yàl xal yux co' nziri' ro níttó', ante ndxep bin mbi'a gàc mèn co' lyá' loo con' ryes.

28 Tad Diox lique' ryethe con' mcàbgòn Tad Diox li Tad Diox loo mèn loo izlyo' no, chàa, li Tad Diox con'a loo mèn. 29 Ngòca loo mèn nación Israel xal mde'th Sayi di's co' ndxab Diox ndoore'. Ndxab Sayi:

Chele' Tad co' nac Tad che'n angl co' nzo loo bé' co' nac solndad che'n Tad ne'nda'de lugar li na' bin, ngàc na' xal mèn ciuda Sodom no ngàc na' xal mèn ciuda Gomor co' mtelux Diox póla.

Mèn nación Israel ne'ndalte ngola's cón che'n di's ndac che'n Diox.

30 Lomisque' ne, ndlyazen niin thìb con' loo gu': ¿Xá nee gu'? ¿Cón gab na' cón che'n con' co' mbli Diox loo mèn co' inacte mèn nación Israel, mèn co' nac mèn co' ne'ñeede no mèn co' ne'gònte xá mod ndyal Diox par yòo mèn loo cón che'n Diox par gàc mèn mèn nalì no mèn nambìi loo Diox? Per ndxe'leque', mèna ngòc mèn nalì no mèn nambìi loo Diox ante por ngola's mèna loo Diox por cón che'n Tad Jesucrist. 31 Per ndxe'leque', cón che'n mèn nación Israel co' mdoo lezo' tolo li preb ndubdi's xal ñibe' ley co' mxo'f Moisés loo mèn, mèna ne'ngácte ndubdi's con' co' mnibe' ley co' mxo'f Moisés loo mèna par gàc mèna mèn nalì no mèn nambìi loo Diox. 32 ¿Chonon tataa ngòca loo mèn nación Israel, à'? Ngòca tataa loo mèn nación Israel tac ne'ncua'nte mèna mod gàc mèna mèn nalì no mèn nambìi loo Diox por cón che'n Tad Jesucrist. Ndxe'leque', mblya's mèn nación Israel gàc mèna mèn nalì no mèn nambìi loo Diox ante por mbli mèna preb ndubdi's mèna loo ley co' mxo'f Moisés loo mèna. Por ne'nglide mèn nación Israel cas loo Tad Jesucrist, por cona, ngòca loo mèn nación Israel xal mèn co' ndxezi'f ndxega's loo thìb quèe co' nca' no co' ncà loo mèn ned nda mèn por ngòc mèn nación Israel mèn naxèn loo cón che'n Diox. 33 Peser nibdi's gu' loon ¿Chonon tataa ngòca loo mèn nación Israel? Tataa ngòca loo mèn nación Israel xal ndub di's loo libr co' nac xti's Diox co' mbez taandxè':

Hui' gu' nexa. Daa tel' thìb mbi' loo mèn ciuda Jerusalén co' gàc loo mèna xal thìb quèe co' nca' ned ndyee mèn loo mèn ciuda Jerusalén. Mèn co' ante yila's loo mbi' co' ngòc xal quèea, mèna ne'yitacte lezo' loo cón che'n Diox. Ne' ne' xi lezo' mèn cón che'n mbi'a yiloa.

<- ROMANOS 8 ROMANOS 10 ->