SAN JUAN 13

Gudiibi Jesús ñee ca discípulu sti'

1 Ca'ru uzulú saa pascua, peru maca nanna Jesús ma bidxiña hora iree ndaani guidxilayú ri', ibigueta ra nuu Bixhoze. Ne cásica bizulú gunaxhii be ca xpinni be ni nuu ndaani guidxilayú zaqueca nadxii be laaca dede yanna ra ma chi iluxe xhiiña be.

2 Dede ora cayó xhi cabe, maca biuu binidxaba ndaani ladxidó' Judas Iscariote, xiiñi Simón, para utoo laabe. 3 Nanna be ma gudixhe Bixhoze be irá xixé cosa lu ná be ne nanna be ra nuu Bixhoze be biree be ne ra nuu Bixhoze be che be. 4 Biasa be lu endaró xhi que, ulee be xhaba be ne ucuaa be ti toalla bixhii be ndaani be. 5 Ne ucuaa be ti bandeja udaa be nisa ndaani', ne bizulú gudiibi be ñee ca discípulu stibe ne bicuiidxi né be ni toalla xi' ndaani be que.

6 Ora bidxiña be ra nuu Simón Pedru na rabi laabe:

―Señor, lii sica qui'bi lu ñee la?

7 Para rabi be laa:

―Nagasi cadi cayene lu ni cayune ri', peru ziene lu ni.

8 ―Co', na Pedru. ―Qué ziuu dxi qui'bi lu ñee'.

Bigueta rabi be laa:

―Pa qué quibe ñee lu la? cadi xpinne lii.

9 Oraque na Simón Pedru:

―Señor, cadi ñee sia' qui'bi lu' sínuque ne naya ne ique'.

10 Para rabi be laa:

―Ni ma bia'ri la? ma nayá. Ma cadi naquiiñe guia'ri ru paxaraa sínuque ñee si. Laatu la? ma nayá tu, neca cadi irá tu.

11 Nanna be tu chi utoo laabe. Nga runi uní' be: “Cadi irá tu nayá tu.”

12 Biluxe udiibi si be ñee ca', ucuaa be xhaba be, bigueta be ruaa mexa que ne rabi be laaca':

―Ñee biene tu ni bine laatu ca la? 13 Laatu rabi tu naa Maistru ne Señor, ne jneza runi tu purti nga nga naca'. 14 Inque naa, naca Señor ne Maistru stitu ne gudiibe ñee tu la? lágaxa laatu qué qui'bi saa tu ñee tu. 15 Purti ma bilué laatu xi guni tu, ti casi bine laatu ca, zacaca guni tu. 16 Ne gabe ca' laatu, qué risaca ti mozo jma que xpixuaana'. Zaqueca ni rie mandadu, qué risaca jma que ni biseenda laa. 17 Pa nanna tu ca nga ne guni tu cani la? dichoso de laatu.

18 Cadi cuzeete irá tu, purti runebia'ya cani ulié', peru cayaca ni sicarí ti iree ni casi cá lu Xqui'chi Dios: “Ni gudó ne naa pan beda aca nanala'dxi naa.” 19 Cayabe ca' ni laatu yanna laga ca'ru aca ni, ti ora ma uca ni la? guni cre tu dxandí naca ni gudxe laatu naca ca. 20 Gabe ca' laatu, ni icaa stiidxa cani useenda la? cacaa stiidxa', ne ni icaa stiidxa la? cacaa stiidxa ni biseenda naa.

Ra bizeete Jesús zutoo Judas laa

(Mt. 26.20-25; Mr. 14.17-21; Lc. 22.21-23)

21 Casi biluxe uní' Jesús uyuu yuuba ladxidó' ne na:

―Gabe ca' laatu, tobi de laatu chi utoo naa.

22 Biiya dxí saa ca discípulu lú ca'. Qué ganna ca tu cuzeete be. 23 Bia'si pe ladxidó' be naguixhe ique dxa discípulu nadxii be que. 24 Oraque bi'ni Simón Pedru seña discípulu que inaba diidxa tu cuzeete be. 25 Para na discípulu ni naguixhe ique ladxidó' be que rabi laabe:

―Tu laabe ya', Señor.

26 Oraque na be:

―Ni udiee laa pan ni ugadxe ca la? nga nga laabe.

Para bigadxe be pan que ne bidii be ni Judas Iscariote, xiiñi Simón. 27 Casi ucuaa Judas ni bidii be laa que, uyuu binidxaba ndaani ladxidó', ne óraque rabi be laa:

―Ni chi gunu ca la? bi'ni ca ni nagueenda.

28 Peru nin tobi de cani nuu ruaa mexa que qué ñene xiñee gudxi be Judas zaqué. 29 Nuu de laaca zácaxa gudxi be Judas chi sí xiixa ni cayaadxa para saa que o udii xiixa ca pobre, purti laa naaze bolsa vueltu. 30 Ucuaa si Judas pan que, biree ze'. Ne bia'si ma huaxhinni ngue.

Laganaxhii saa

31 Biree si be, na Jesús:

―Yanna ma bidxiña hora ihuinni pabiá' risaca Hombre Biseenda Dios ne pur laa zahuinni pabiá' risaca Dios. 32 Ne pa isaca Dios pur laabe la? laca zuni Dios pur isaca be de laasi be, ne mápeca chi aca ni. 33 Xiiñe huiine ca', ma sti ratu si nuaa nia laatu. Zuyubi tu naa, peru chi tidxe laatu casi gudxe ca judíu chiqué, ra chaa qué zanda che tu. 34 Chi tixhe ca' xiixa nacubi guni tu, ganaxhii saa tu cásica huayanaxhiee laatu. Zacá laganaxhii saa. 35 Pa ganaxhii saa tu zacá la? zanna binni xpinne laatu.

Na Jesús zaní' Pedru qué runibiá' laa

(Mt. 26.31-35; Mr. 14.27-31; Lc. 22.31-34)

36 Oraque na Simón Pedru rabi laabe:

―Paraa cheu' ya, Señor.

Para rabi be laa:

―Ra chaa la? qué zanda chi nandu naa nagasi peru ziuu dxi cheu'.

37 ―Xiñee qué zanda chi nanda lii nagasi, Señor, na Pedru. ―Dede xpida zudiee pur lii.

38 ―Dede xpida lu zudiiu pur naa nou' la? na Jesús. ―Gabe ca' lii, chonna tiru zaníu' qué runibióu' naa, ante guunda gallu.

<- SAN JUAN 12 SAN JUAN 14 ->