1 Làniana bilá' te' attu ángel poderoso nna radi bi dèsdeba ỹiabara'. Dá' bi le' bía nna dàa ttu betta'yà'a dèsdeba ttu lado iqquia bi hàsta attu lado. Lo bi nna rudani'ą ti' tabá ubitsa. Ca nì'a bi nna uccua cą tì'a chùppa pilari pero nu de yí'. 2 Dèni bi ttu rollo ìttsi xcuichu to' yàlia. Nì'a bi lado bàni nna bedu bi ą lo indatò' ỹenia. Nì'a bi lado yatti nna bedu bi ą lo yúbitsi. 3 Hua yù ri'u ti'iỹa iditsa tse' ribetsi ttu león tuxu. Ą'hua ángel ỹenia nna de repente tabá guretsiyà'a bi iditsa ni. Lania taá nna biyeni te' becàbi gàtsi ca ídiu' tì'a gàtsi tsi'i. 4 De chi gùnne ca idiu'á nna, inte' nna gudulúa' rudí'a' lo ìttsi nu ra cą. Pero biyeni tabá te' rinne ttu enne' dèsdeba ỹiabara' nna rèe: Lu' nna bittu gúdia lu' tì' ra ca idiu'ą' porqui'ni labí ná qui'ni ca enne' nna ccá cą saber nu gùnne cą.

5-6 Làniana ángel enne' l·lía lo indatù'ą' nna lo yúbitsią' nna, guchìtha ná' bàni bi nna bedu bi Tata Dios por testigo porqui'ni lèe nna baníe tulidàba para siempre, lèe ènni'a beni itute ỹiabara' ą'hua iyate nu té lì'į, beni huée itute yétsiloyu nna ca indatò' ỹeni ą'hua iyate nu yù'u lè'e quį nna ra bi: Labiru itsá reyàtsa i'yu tsáa. 7 Porqui'ni ca enne' gutsé'e tiempo antigua nna beni cabi Tata Dios adorar nna gùnne cabi parte qui'e lani ca enni'a. Lèe nna gutixà'anie cabi ca cosa nu chì' da'la ti'iỹa gunie, pero labí gutelíni ca enne' hàstaba annana. Pero ángel nu cca gàtsia nna, canchu chi gucuetsi bi trompeta, lania taá nna ccá cumplir itute tì'a gutixà'ani'e ca enne' canu gutsé'e tiempo antigua. Ą' ra ángelia.

8 Làniana enne' biyeni te' gùnnie dèsdeba ỹiabara' nna gunènie inte' Juan attu nna rèe: Lu' nna huía ru'a lo ángel enne' l·lía lo indatù'ą' nna lo yúbitsią' nna. Gùỹi' rollo ìttsì yalia nu yù'u le' ná' bíą'. 9 Inte' Juan nna hua'á tabá' làti du ángelia nna gunábania' bi rollo ìttsì tú'a. Ángelia nna ra tè bi inte': Gùỹi' bá ą, go tè lu' ą. Canchu chi ro lu' ą nna éttianì lu' ą tì' tabá ỹìxi, pero canchu chi gutàbi lu' ą nna eyacca tabą́ il·lá'.

10 Làniana guỹi'á' rollo ìttsì tú'a nu yù'u le' ná' ángelia nna gutó tè ya' ą. De chi ro ya' ą nna bettia tabá te' ą tì' tabá ỹìxi, pero bitola nna gùri'ą il·lá' lí'a'. 11 Làniana beni tè bi inte' mandar nna ra bi: Lu' nna caduel·la' tsía lu' nna inne lu' parte Tata Dios attu vuelta mensaje nu cca qui' iỹetse' ca yétsi nna ca raza canu rinne dialecto nna, ca enne' rigú'ubia' nna.

<- APOCALIPSIS 9APOCALIPSIS 11 ->