Abram Yoom Lot Yoom Andokbiwen

1 Abram yoom ye wonong yoom Lot yoom yi yiribman korem be Idyip ambibkin domonde ari wene Keenan ambibkin yaa winiwen. 2 Abram kuu yiribman yemoon ye karub, sibiyiib naningkodiib buromakauiib od yeman silva yemooniib gold yemooniib boon. 3 Kwane angkon dobere dobere wene Betel kere Ai kere anukbed kombon be doboroon yaa ika monoon. 4 Menekore, bot wuube dingkan nengke agedmo keroone baeb kuu Yariman God yaa koni yeman ye bon wuubekore, kurikuriyiib kubiyiib God yaa konoon.|U

Andowoon 13:5-18

5 Lot, ye kuu Abram yoom winiwenman, ye kangkon ye nimadanayiib deme karuwiib sibiyiib naningkodiib buromakauwiib. 6 Abram ye dingkan kawiib Lot ye dingkan kawiib kuu yemoon keroon kowe, kereek kirod dowan keroona yi ayoob ibmo dobiri yiminban keroon. 7 Kwane, Abram ye dingkan kab oonidaniib Lot ye dingkan kab oonidaniib arud weng dakmiwen. (Kuyaron kuu Keenandaniib Perisdaniib Keenan ambibkin aom doriib.)

8 Kwani kowe, Abrambed Lot yaa yedmoon, “Eb kuu ne daman kowe nub kuu wengbaraub, nub deme karub kangkon wengbaraib. 9 Okad kumundin kemaombed nub dewenebi kuu yiminaa. Kwani kowe, nub kibikee andokbem. Eb dowaken an angka wene dobarande meenewen kuyaa wenebko, ne kuu wiwi angka wene dobarako. Eb dowaken wiwi angka wene dobarande meenewen kuyaa wenebko, ne kuu an angka wene dobarako.” andoon.

10 Kwane, Lot kuu indob kankoone darobe wedmoon kuu kankubunen yiri yaningko Yoodenbed wene kambong Soar yimin ok yemoon wedmoon, kukuu Yariman ye yongbon Iden areb Idyip okad areb. (Kuyaron kuu God kuu Sodom tauniib Gomora tauniib monmarindo.) 11 Kwane kuyaambed, Abram yoom Lot yoom kwane andokbiiwe, Lot kuu Yooden kankubunen yiri kangka angkanoon. 12 Kwane, Abram kuu Keenan bid ari doboroona, Lot kuu wene Sodom taun dia kankubunen yiri doboroon. 13 Sodomdan kuu Yariman ye murubia ari miin arewa kame ambarakmi darewoob kamembirimaib.

Abram Hebron Aom Wonoon

14 Lot wonoona kuye yoman Yarimanbed Abram yaa yedmenoon, “Ebbed doreeb kuyaambed indob kankoone kangka kere kaom kere kuri kere kari kere okad korem ongme wedme. 15 Okad korem ke wedmeeb kee eb yoom eb yob yoom yaa kondaniin, aron korem. 16 Nembed eb yob yemoon bangkabdaniin kuu karub ma kimingke dorinban, ingkud korem kimingkindeban areb. 17 Keenan okad korem kee eb yaa kabdaniin kowe, wene okad korem kee yimin yimin yaa dewene dore wedme.” andoon. 18 Kwanandoone, Abrambed Hebron aom wene Mamre ye at kubun keedbon dia wene kombon yenbe doboroon. Kwane, Yariman yaa meeni yeman ye bon botbed wuuboon.|H

<- Andowoon 12Andowoon 14 ->