Hibrani 3

Si Isa langkew amban si Musa

1 Meˈ kapungtinaˈihanku masandel pu Almasihin, kaˈam isab bakas tapeneˈ weˈ Tuhanin hinangne meˈ aˈane. Pikilun bi pasal si Isa. Pinapitu iye weˈ Tuhanin si kite bi duk tahinang iye Imam Nakuraˈ āgamaten bi. 2 Pineneˈ iye weˈ Tuhanin ngahinang inin duk matuyuˈ teˈed iye si hinangnen. Kuweˈ iye si Musahin, peggeˈ si Musa matuyuˈ teˈed isab si hinangne si lumaˈ Tuhanin, hātinen hinangnen magnakuraˈ si meˈ aˈa Tuhanin. 3 Saguwaˈ kuweˈ aˈa ngahinang lumaˈin binantu amban lumaˈ hininangnen, damikkiyan si Isa pataˈ pe teˈed pinahadje amban si Musa. 4 Toˈo, kēmon lumaˈ niyaˈ aˈa ngahinangne, saguwaˈ Tuhanin mangahinang kēmon-kēmonin. 5 Si Musa daraˈakan iye, duk matuyuˈ teˈed iye maghinang si lumaˈ Tuhanin, duk pinalataˈ weˈ ne sabab meˈ bissā binissā Tuhan si pasōnganin. 6 Saguwaˈ Almasi, Anak Tuhanin iye, duk matuyuˈ teˈed iye magbayaˈ si lumaˈ Tuhanin. Kite bi hep lumaˈ Tuhan pagbayaˈan Almasihin bang patetegte teˈed sandelten pu Almasi duk bang sinna teˈed kite ngase-ngase si meˈ janjiˈnen.

Humali meˈ aˈa Tuhanin

7 Hangkan hep subey teˈed pikilte bi bakas tasulat dem kitab pinaˈin Niyawa Sutsihin. Paˈinne,

“Bang takalebi suwala Tuhanin missā ellew inin, 8 daˈa kaˈam magtuwas atey kuweˈ meˈ kapapuˈanbi masaley gaˈi ngatu nuhut Tuhanin. Masa miyaˈan laˈi si lahat makagindew-gindew sinuleyan weˈ de Tuhanin bang niyaˈ ke tahinangne si siye. 9 Sinuleyan ku weˈ de, paˈin Tuhanin, bang tahaˈ ke pasensiyakun si siye bu dem ampatpūˈ tahun takitede meˈ hinanganku mabalakatanin. 10 Hangkan hep ku astel si meˈ aˈa miyaˈan duk paˈinku, ‘Meˈ aˈa inin luwal ne hadja paseddili pamikilden duk gaˈi siye ngatu nuhut meˈ pangandaˈakanku siyehin.’ 11 Astel ku si siye hangkan ngajanjiˈ ku, paˈinku, ‘Asal gaˈi teˈed siye umasek dem lahat sōng pamahalihanku siˈ siyehin,’ paˈin Tuhanin.”

12 Meˈ pagkasiku masandel pu Almasihin, subey kaˈam pahatul-hatul teˈed kaw niyaˈ kaˈam luˈu laˈatan pagateybin, duk gaˈi kahagad duk tayikutanbi ne Tuhan maˈellumin. 13 Iye subey hinangbi supaya gaˈ niyaˈ kaˈam kaˈakkalan weˈ duse duk supaya gaˈi ujud ngatuwas ateybin, subey kaˈam magasig-inasig ateybin ellew-ellew, pādpād gaˈ pe magtamanan ellew inēnan “Ellew Inin.” 14 Peggeˈ kite bi kēmon magsaweˈ duk Almasi bang pahagette teˈed sandelte si iyehin amban tagnaˈannen sampay si katapusannen.

15 Iye inin paˈin kitabin,

“Bang takalebi suwala Tuhanin ellew inin, daˈa patuwasun bi ateybin kuweˈ meˈ kapapuˈanbin masaley gaˈi teˈed ngatu nuhut Tuhanin.”

16 Sine teˈ meˈ aˈa makakale suwala Tuhanin, saguwaˈ gaˈi siye ngatu nuhut Tuhanin, bang dumaˈin meˈ aˈa bakas binoˈo weˈ si Musa paluwas amban lahat Misilin. 17 Sine teˈ meˈ aˈa kaˈastelan weˈ Tuhanin dem ampatpūˈ tahunin, bang dumaˈin meˈ aˈa magduse si iyehin hangkan matey siye laˈi si lahat makagindew-gindew. 18 Duk sabab sine teˈ binissā Tuhanin sakaliˈ iye ngajanjiˈ, paˈinne, “Asal gaˈi teˈed siye umasek dem lahat pamahalihanku siˈ siyehin?” Siye meˈ aˈa manggaˈi mangatu nuhut iyehin. 19 Tahātite weˈ hangkan siye gaˈ umasek dem lahat miyaˈan, peggeˈ gaˈ siye kahagad.

<- Hibrani 2 Hibrani 4 ->