Link to home pageLanguagesLink to all Bible versions on this site
3
Jesús lamá'ataca caja yáte'ela a'amitacó rijló yucuna marí:
(Mt 12.9-14; Lc 6.6-11)

1 E apú huatána'acaje huacajé piño Jesús mujlúca'ari nahuacáca'alo ñacarelana chojé. Re apú i'imari najhua'até. Caja riyáte'ela a'amitaró rijló i'imacá. 2 Re caja ajopana i'imaño. Necá quejíla'año Jesús, namácaloje méqueca rila'acá penaje. Rilamá'ataquela ricá huatána'acaje huacajé, nemajla rinacu: “Pu'uhuaré la'ajeri ricá” que. 3 E Jesús quemari riyáte'ela a'amitarojlo:

—Pácho'o majó huajimajo.

4 E rimá ajopánajlo:

—¿Meque iná la'acá huatána'acaje huacajé? ¿Meque chi Tupana puráca'alo lana'aquéjami quemacá rinacu? ¿E chi palani iná la'acá palá ca'ajná, chapú ca'ajná huatána'acaje huacajé? ¿E chi palani iná i'imatacá ina'uqué capichácajo liyá ca'ajná, nacapichátacana ca'ajná huatána'acaje huacajé? —que rimacá najló.
E'iyonaja uncá na'ajipalá rijló. 5 Raú riyacá'o nachaje yuríque'ela. Camu'ují ripechu la'acó najhua'até, ijnú nahuátacale ina'uqué mu'ují hue'epícana. E rimá riyáte'ela a'amitarojlo:
—Piya'atá nojló piyáte'ela.
Riya'ataca rijló ricá aú ja ripala'ó. Ripa'ó rapumí chuhuá júpimi ri'imacá que caja. 6 Raú fariséona naquiyana jácho'oño nahuacáca'alo ñacarelana chiyá, napura'acóloje Herodes hua'atéjena hua'até Jesús nócana nacú penaje. Ritejmo'ótacale ina'uqué huatána'acaje huacajé chona nahuata rinócana.
Cajrú ina'uqué jahuacaco caesa turenajo yucuna marí:

7 E caja Jesús i'ijnari ra'apiyatéjena hua'até ají que caesa turenajo. Cajrú huani ina'uqué i'ijnaño rijhua'até. Ne'iyajena i'imaño Galilea eyájena. Ajopana i'imaño Judea eyájena. 8 Ajopana piño i'imaño Jerusalén eyájena. Ajopana piño i'imaño Idumea eyájena. Ajopana piño i'imaño Jordán pa'anajo pumitá eyájena. Ajopana piño i'imaño Tiro eyájena. Ajopana piño i'imaño Sidón eyájena. Iqui'iruna huani ne'emacá. Necá i'ijnaño ramaje, nema'acale piyuque nacaje Jesús la'acare yucuna. 9 Cajrú huani nahuacaco Jesús nacojé. Aú rimá ra'apiyatéjenajlo:

—Iji'ichá nojló jita, ina'uqué majra'acá piyá nucá.
—Je —que.

10 Caja ritejmo'óta cajrú natámina i'imacá. Aú ajopana natámina jara'añó rinacojé, nasápacaloje rinacu penaje, natejmo'ocóloje raú penaje. 11 Ajopana e'iyá jiñana pechu i'imaño. Jiñana pechu amaca aú Jesús, ina'uqué ne'emacárena e'iyá tára'aqueño ne'erúpachi aú rijimaje. Nahuíyo'oco nemájica rijló:

—Picá Tupana I'irí.

12 Aú Jesús huacára'ari necá caphí, ne'emacá piyá riyucuna ajopánajlo.

Jesús a'acá iyamá iphata ji'imaji nacojé quele achiñana ra'apiyatéjena penaje yucuna marí:
(Mt 10.1-4; Lc 6.12-16)

13 Eyá Jesús i'ijnari yenuri i'ihuátaje. Reyá i'imajemi rihuá'a ina'uquejlo rihuátacarenajlo. Aú ne'ejná rejo. 14 Iyamá iphata ji'imaji nacojé quele achiñana ne'emacá. E rimá najló:

—Chuhua icá i'imajeño no'opiyatéjena. Nuhuacára'aje icá Tupana yucuna i'imajé ajopana, ajopánajlo que penaje. 15 Nupechu aú ica'ajé jiñana pechu ajopana ina'uqué e'iyayá —que rimacá najló.

16 Marí quele ne'emacá ra'acárena ra'apiyatéjena penaje: Simón. Rapiyaca rií, ra'á rií Pedro. 17 Apú i'imari Santiago, re'ehué Juan hua'até. Zebedeo yaní ne'emacá. Jesús a'arí neí Boanerges. “Ina'uqué catejmúruna pichaní que catejmuca”, que quemacana neí napura'acó chu. 18 Ajopana piño i'imaño: Andrés, Felipe, Bartolomé, Mateo, Tomás, Santiago, quele. Apú Santiago ri'imacá; Alfeo i'irí ri'imacá. Ajopana piño i'imaño: Tadeo, Simón, quele. Simón i'imari cananista naquiyana. 19 Eyá caja penaje Judas Iscariote. Nenoca Jesús huacajé, ricá huá'ari ripinana Jesús i'imacá ejo, napatacáloje ricá penaje. Marí quele ne'emacá ri'ihuapacárena rijluhua ne'iyayá, ne'emacáloje ra'apiyatéjena penaje.

Ina'uqué naquiyana quemaño Jesús nacú: “Jiñá pechu i'imacare e'iyá ricá.” Riyucuna marí:
(Mt 12.22-32; Lc 11.14-23; 12.10)

20 Ejomi Jesús i'ijnari pají chojé ra'apiyatéjena hua'até. Richape piño cajrú ina'uqué jahuacaco rejé Jesús chaje. Nanacojé uncá meño'ojó Jesús, ra'apiyatéjena, quele ajñalaño na'ajnehuá. 21 Riyucuna iphari rejena nacú. Aú ne'ejná ripa'ataje. Yucu i'imá rehuá: “Caja rehuíji'icho.” 22 Tupana puráca'alo nacú jehuíña'atajeño naquiyana, Jerusalén eyájena ne'emacá, quemaño Jesús nacú marí que:

—Jiñana huacára'ajeri ií Beelzebú. Jesús e'iyá ripechu. Ñaquele rihuacára'a ajopana jiñana pechu jácho'oco ina'uqué e'iyayá.

23 E Jesús huá'ari najló, ne'ejnacáloje rahua'ajé penaje. E ri'imá yucu najló, rehuíña'atacaloje necá raú penaje. Rimá najló:

—¿Meque la'ajé chi jiñana huacára'ajeri, Satanás, ca'acajla rinaquiyana ina'uqué e'iyayá? 24 Ajopana huacára'ajeri hua'atéjena nócaquelo pajhua'atéchaca, nacapichátajla pecohuácaca raú. 25 Ñaqué caja iná ejena nócaquelo pajhua'atéchaca, nacapichátajla caja pecohuácaca raú. 26 Ñaqué caja ricá Jiñá Chi'ináricanajlo. Jiñana pechu rijhua'atéjena necá. Rica'aquela necá ina'uqué e'iyayá, rila'ájla chapú ricó raú. Uncá meque rila'alajla rejomi, uncale rijhua'atéjena i'imalajla raú. 27 Uncá meño'ojó ina'uqué matejmuru mujlúca'ala catejmuni ina'uqué ñacaré chojé rinane ña'ajé riliyá. Apú richaje catejmuca ipháquela rinacu, ricá jepo'otárijla ricá. Quéchami rijña'atácajla rinane riliyá.
Marí que Jesús i'imacá yucu najló, nahue'epícaloje raú richá'ataca Jiñá Chi'ináricana penaje. Rimá piño najló:

28 —Tupana amaro ina'uqué chaje piyuqueja pu'uhuaré nala'acare liyá, namanaicho nala'acare liyá hua'ató. Pu'uhuaré nemacare nacú liyá hua'ató ramó nachaje. 29 Eyá pu'uhuaré nemacare Tupana Pechu nacú, ricaja calé uncá ramálajo nachaje riliyá. Caja queja ne'emajica hua'ajini huani. Uncá nachaje amácano i'imalaje.

30 Marí que Jesús quemacá najló, Tupana puráca'alo nacú jehuíña'atajeño pura'acole pu'uhuaré rinacu. Tupana Pechu i'imacare re'iyá aú rica'á jiñana pechu ina'uqué e'iyayá. E'iyonaja nemá rinacu: “Jiñá pechu i'imacare re'iyá, aú rica'á necá ne'iyayá.”

Jesús jaló i'ijnacá rijmerénami hua'até Jesús amaje yucuna marí:
(Mt 12.46-50; Lc 8.19-21)

31 Pachu Jesús i'imari cajrú ina'uqué hua'até. E Jesús jaló, rijmerénami, quele i'ijnaño rejo ramaje. Iphaño pají cópeje. E nemá apujlo:

—Pimá rijló, ri'ijnachi majó.
—Je —que.

32 Cajrú ina'uqué yá'año Jesús hua'até pachu. E nemá rijló:

—Piyacá'o, paló iphíchayo pají cópeje pijmerénami hua'até. Nahuata pijhua'até pura'acano.

33 Rimá najló:

—¿Mecajena chi necá nojena, noló, quele?

34 E riyacá'o rahua'á yá'acaño tujlá que chaje. Rimá najló:

—Iyacá'o. Mariruna ina'uqué noló, nojena que i'imacaño necá nojló. 35 Tupana huátaca que la'acaño, necá nojena que nojló. No'ohué que, no'ohueló que, noló que nojló necá —que Jesús quemacá najló.

<- SAN MARCOS 2SAN MARCOS 4 ->