24
Pilung ni ga’
1 Fayleng nge urngin ban’en ni bay riy e fen SOMOL ,
but’ nge urngin e girdi’ ni be par u daken e suwon.
2 I sunumeg nga daken fa yungi day nib to’ar ni bay u tan e but’,
me filath e def riy u t’ay e rigur.
3 Mini’ e bay mat’wun ni nge yan nga daken e burey rok SOMOL ? [a]
I mini’ e ra yag ni nge yan ngalan e Tempel rok nib thothup?
4 Pi’in machalbog e ngongol rorad nge leam rorad,
nda rir tedfan e pi liyos
ara rmicheged ban’en miyad thilyeg.[~2~]
5 SOMOL e bayi fal’eg wa’athrad me mat’aw nagrad ngak;
I Got e bayi yog ni bfel’ e rorad.
6 Aram e pi girdi’ nra yib ngak Got,
ni yad ra yib nga p’eowchen e Got rok Jakob.
7 Mbinged mban e pi garog nge mus nga rogon,
mbinged fapi mab nike kakrom,
nge yib fare pilung ni ga’ ngalan e yoror!
8 I mini’ e re pilung ni ga’ nem?
Ir SOMOL , ni fa’anem nrib gel,
I ir fare SOMOL , nma gel ko mael!
9 Mbinged mban e pi garog nge mus nga rogon,
mbinged fapi mab nike kakrom,
nge yib fare pilung ni ga’ ngalan e yoror!
10 I mini’ e re pilung ni ga’ nem?