JOSHUA 10

Pi Amorite nra waergad

1 Adonizedek, ni fare pilung nu Jerusalem,[a] e rung’ag nike kol Joshua yu Ai ke kirebnag ma ke li’ e pilung riy, ni bod rogon ni rin’ nga Jeriko nge pilung riy. Miki rung’ag nike fal’eg e girdi’ nu Gibeon e thin ngak piyu Israel yad be par u fithik’rad. 2 Me ri rus e girdi’ nu Jerusalem, ni bochan e yu Gibeon e reb e binaw ni ba ga’ ni bod ga’ngin e pi binaw ni tafen e pilung, ma ka ba ga’ ko binaw nu Ai, ma pumo’on ni bay riy e yad boch e salthaw nda rir rusgad. 3 Me l’oeg Adonizedek e thin nge yan ngak Hoham ni ir e Pilung nu Hebron; nge ngak Piram ni Pilung nu Jarmuth; nge ngak Jafia ni Pilung nu Lakish; nge ngak Debir ni Pilung nu Eglon ni ga’ar, 4 “Mu ayuweged gag nggu fek e mael nga Gibeon, ya girdi’ riy e kar fal’eged e thin ngak Joshua nge piyu Israel.” 5 Re lal i pilung ko pi Amorite nem, ni aram e pilung nu Jerusalem, ngu Hebron, ngu Jarmuth, ngu Lakish, ngu Eglon e ra mu’ulunggad nge yu raba’ i salthaw rorad ngar longobiyed e binaw nu Gibeon miyad cham ngay.

6 Me l’oeg e pumo’on nu Gibeon e thin nge yan ngak Joshua nga Gilgal ko gin be par piyu Israel riy ni be lungurad, “Dab mu pagmad! Mu gur nigem ngamub ngam ayuweg e pogofan romad! Ya urngin e pilung ni yad bay ko pi binaw ni bay ngalan e burey e kar pethgad ni ngar maelgad ngomad!” 7 Me yan Joshua nge salthaw rok ni urngin u Gilgal ngaram. 8 Me ga’ar SOMOL ngak Joshua, “Dab mu rus ngorad, ya kug duwgiliy ni gur e ngam gel. Dariy ta’bagayad nrayag rok ni nge talegem.” 9 Reb e nep’ ni yan Joshua u Gilgal nge mada’ ngaram, me cham ngorad nib tomgin. 10 Me gagiyegnag SOMOL e pi Amorite ngar rusgad ngak e salthaw nu Israel ni kar guyed nike yib. Me li’rad piyu Israel u Gibeon, miyad lol’oeg e tin ke magey i yib nga p’ening ko wo’ ni yib u daken e burey nga p’ening u Beth-horon ngar chamgad ngar mada’gad nga Azekah nge nga Makkedah ni bay ko yimuch. 11 Nap’an ni yad be mil rok piyu Israel i yib nga p’ening u daken fare pa’ i kanawo’ ni yib u Beth-horon nga Azekah, me yin’ SOMOL e ayis ni gang’ yang u lang nga dakenrad ngarm’ad. Pire’ e tin ni yim’ ko re ayis nem ko tin i li’ piyu Israel.

12 Chirofen ni gagiyegnag SOMOL e pumo’on nu Israel ngar gelgad ngak e pi Amorite e non Joshua ngak SOMOL. I non u p’eowchen piyu Israel ni ga’ar,

“Yal’, mu tal u daken yu Gibeon;

pul, mu tal u puluwon e loway nu Aijalon.”

13 Me tal e yal’ ndaki yan, ma ku er rogon e pul nge yan i mada’ ko ngiyal’ nike gel piyu Israel ngak e pi to’ogor rorad. Pin’ey e ni yoloy ngalan e babyor rok Jashar. I par e yal’ u lukngun e lang, ma daki yan ni reb e rran. 14 Dawori yodorom reb e rran nga m’on riy, ara nga tomuren ni bod e re rran nem ni fol SOMOL rok be’ nib mo’on nge un ko mael ni bay u ba’ rok piyu Israel.

15 Me sul Joshua nge salthaw rok nga Gilgal ko gin be par piyu Israel riy.

Joshua ni kol fa lal i pilung ko pi Amorite

16 Fa lal i pilung ko Amorite, e ra milgad ngranod ra mithgad ngalan ba yiy u Makkedah. 17 Me pir’egrad be’ minog e gin yad be mith riy ngak Joshua. 18 Me ga’ar, “Mu lobbiyed boch e malang nib ga’ nga langan fare yiy. Mi gimed tay boch e matnag u rom, 19 machane gimed e dab mu pired u rom. Mu leked fapi to’ogor u wuryal ngam oggad ngorad; dab mu pagedrad ngar thapgad nga langgin fapi binaw rorad! I SOMOL ni Got romed e ke ta’med ni ngam gelgad ngorad.” 20 I Joshua nge pi’ pumo’on nu Israel e ra li’ed fapicha’ ngarm’ad, machane bochiyad e ra thapgad nga langgin e yoror ko binaw rorad mda kun li’rad ngarm’ad. 21 Nimu’ me sul urngin e salthaw rok Joshua i yib ngak nga langgin fa gin yad ma par riy u Makkedah ndariy ban’en nike buch rorad.

Dariy be’ u lan fare nam ni yag rok ni nge yog ban’en nib togopluw ngak piyu Israel.

22 Me’ere me ga’ar Joshua, “Mbinged langan fare yiy ngam feked fa lal i pilung nga wean i yib ngog.” 23 Ma aram min bing fare yiy, ma fapi pilung nu Jerusalem, ngu Hebron, ngu Jarmuth, ngu Lakish, ngu Eglon e ni fekrad u lan fare yiy nga wean 24 min fekrad i yan ngak Joshua. Me’ere me pining Joshua urngin e pumo’on nu Israel ni ngarbad ngak, me yog ngak e pi ga’ ko salthaw rorad ni ngar uned ngak ngar ted rifrifen ayrad nga daken belel’gun fapi pilung. Miyad rin’ ni aram rogon. 25 Ma aram me ga’ar Joshua ko fapi ga’ ko salthaw rok, “Dab mu rusgad ara mulan’med. Mu duwgiliyed lanin’med me pagan’med, ya ba’aray e n’en ni bayi rin’ Somol ngak urngin e to’ogor romed.” 26 Ma aram me li’ Joshua fapi pilung ngarm’ad me tiningrad nga l’ugun lal ke gek’iy, ni aram e gin i par e pi yam’ nem riy nge blayal’. 27 Ma nap’an ni aw e yal’ me yog Joshua ni ngan pilig fapi yam nga but’ nga nin’ nga langgin fare yiy ni ur mithgad u langgin kafram boch. Min tay e malang ni gagang’ nga langan fare yiy, ni kabay e pi malang nem u rom e chiney.

Joshua e ki kol yung i binaw nib milfan ko Amorite

28 I Joshua e cham nge kol yu Makkedah nge pilung riy ni krofen nem. Me thang e pogofan rok urngin e girdi’ u langgin fare binaw; dakriy ta’abe’ ni pag ni kabfos. Ma n’en ni rin’ ngak fare pilung nu Jeriko e ku aram e n’en ni rin’ ngak fare pilung nu Makkedah.

29 Nga tomuren e ren’ey, me yan Joshua nge fa raba’ i salthaw rok u Makkedah nga Libnah ni mael. 30 Miki tayrad SOMOL ngkur gelgad ngak fare binaw nge pilung riy. Dar paged ta’abe’, ya ra thanged e pogofan rok urngin e girdi’ u rom. N’en ni rin’ed ngak fare pilung nu Jeriko e ku aram e n’en rrin’ed ko fare pilung.

31 Ma nga tomuren e ren’ey, me yan Joshua nge salthaw rok u Libnah nga Lakish, mar longbiyed fare binaw ngar maelgad ngay. 32 Me tay SOMOL piyu Israel ngar gelgad ngak yu Lakish ko rofen ni gaman e l’agruw fen ngay nra maelgad. Nri ku bod rogon ni rrin’en u Libnah, dar paged ta’abe’, ya ra thanged e pogofan rok gubin e girdi’ nu langgin fare binaw. 33 Me yib Horan ni Pilung nu Gezer ni nge ayuweg yu Lakish, machane miki gel Joshua ngak nge salthaw rok ni dariy ta’abgayad nra paged ni kabfos.

34 Me migid me yan Joshua nge salthaw rok u Lakish nga Eglon, ngar longbiyed ngar maelgad ngay. 35 Ma ka rofen nem miyad kol fare binaw ngar li’ed gubin e girdi’ u rom ngarm’ad, nri bod rogon ni kar rin’ed u Lakish.

36 Ma nga tomuren e ren’ey me yan Joshua nge salthaw rok u Eglon ngar farthoggad nga fithik’ e burey nga Hebron, ngar chamgad ngay 37 ngar koled. Mar thanged e fan rok fare pilung nge gubin e girdi’ nu lan fare binaw ma ku’er i tay e pi yochi binaw nib chugur ngay. Me duwgiliy Joshua fare binaw ni ngan gathay nge aw ni dakuriy tulwen u but’, nri bod rogon ni kar rin’ned nga Eglon. Dariy ta’abe’ nra paged ni kabfos.

38 Are Joshua nge salthaw rok e ra sulod nga Debir ngar chamgad ngay. 39 Me kol fare binaw, nib mu’un e pilung riy ngay nge urngin e yochi binaw nib chugur ngay. Miyad thang e fan rok urngin e girdi’ u rom. N’en ni rin’ Joshua ngak yu Hebron nge yu Libnah nge pilung rorad e ri ku aram e n’en ni rin’ nga Debir nge pilung riy.

40 Miki kol Joshua fare nam ni ga’ngin. Me gel ngak fapi pilung ko fapi binaw ni go’ burey, nge pi binaw nu sigre’en e burey ko ngek, nge binaw u enggin e burey ko ngal, ma ku er rogon e tin bay ko pi binaw ndariy e ran riy ni bay ko yimuch. Dariy ta’abe’ ni digey; gubin e girdi’ nni thang e fan rorad. Irera’ e n’en nike yog SOMOL ni Got rok yu Israel ni ngan rin’. 41 Joshua nge pi salthaw rok e ra maelgad u Kadesh Barnea ni bay ko yimuch u Gaza u to’oben e day, nib mu’un gubin yang u Goshen ngay, ranod ko lel’och ngar mada’gad nga Gibeon. 42 Gubin e pilung ntaferad e yu ngin’ey ni go’ gel Joshua ngorad me fekrad nge binaw rorad ni bochan e SOMOL ni Got rok yu Israel e be cham ni pa’ yu Israel. 43 Ma nga tomuren e ren’ey me sul Joshua nge fare raba’ i salthaw rok ko fa gin be par piyu Israel riy u Gilgal.

<- JOSHUA 9 JOSHUA 11 ->