JEREMIAH 38

Jeremiah ni par u lan ba luwed nike m’ay e ran riy

1 I Shefatiah nib mo’on ni fak Mattan, nge Gedaliah nib mo’on ni fak Pashur, nge Jukal nib mo’on ni fak Shelamiah, nge Pashur nib mo’on ni fak Malkiah e rrung’aged ni gu be weliy ko girdi’ ni 2 ke ga’ar SOMOL, “En nra par u lan e re binaw nem e ra yim’ u fithik’ e mael, ara uyongol, ara liliy. Machane en nra yan nga wuru’ e re binaw nem nge pi’ ir nga pa’ piyu Babylon e dab ni li’ ngem’; me thay u pa’ e riya’ me fos.” 3 Ma kug weliy ngorad nike ga’ar SOMOL, “Bay gu pi’ e re binaw ney ngak e salthaw rok e pilung nu Babylon, ma aram e bayi kol.” 4 Me ga’ar e pi tolang ni yad bay u tan pa’ e en ni pilung ngak fare pilung, “Re mo’on ney e thingar nli’ ngem’. Ya ra i non ni aray rogon ma aram e be waernag e leam ko salthaw nu lan e re binaw ney, ma ku aray e n’en be rin’ ngak urngin e girdi’ nike magey u lan binaw. Re mo’on ney e gathi be guy rogon ni nge ayuweg e girdi’; kemus ni ba’adag ni nge gafgow nagrad.”

5 Me ga’ar Zedekiah ni Pilung, “Kefel’, mu rin’ed ngak e tin gimed ba’adag; ya dabiyag ni gu talegmed.” 6 Miyad fekeg ngar nguchruyed gag ngalan ba luwed ni fen Malkiah nib mo’on ni fak e pilung, re luwed nem e bay u lan e yoror u tafen e pilung. Ma dariy e ran u lan e re luwed nem, kemus ni rungdu’ e bay u t’ay, mu gu chur nga fithik’ e rungdu’.

7 Machane Ebedmelek, ni be’ nu Ethiopia, nib mo’on nib tolang nma maruwel u tafen e pilung e rung’ag ni kan nguchuruyeg ngalan fare luwed. Ma ngiyal’nem e aram e bay e en ni pilung ko garog ni Benjamin fithingan ni be puf oloboch. 8 Me yan Ebedmelek u tafen e pilung ngaram me ga’ar ngak fare pilung, 9 “Pilung, n’en ke rin’ e pi girdi’ ney e ba kireb. Kar nguchuruyed Jeremiah ngalan fare luwed, nike muduwgil ni nge yim’ ko uyongol, ya, dakuriy e ggan u lan e re binaw ney.” 10 Me yog fare pilung ngak Ebedmelek ni nge fek dalip fapi pumo’on ni yad bay u rom ngranod ngar girngiyed gag nggu chuw u lan fare luwed ndawor gum’. 11 Ma aram me fek Ebedmelek fapi pumo’on nge yan nga tafen e chugum u tafen e pilung nge fek boch e mad nike kaday me m’ag ko gaf nge nguchuruy ngog ngalan e luwed. 12 Me ga’ar Ebedmelek ngog, “Mu tay e pi mad nir nga tan alibem nge dabi th’abem e gaf.” Mu gu rin’ ni aram rogon, 13 miyad girngiyeg ngalang ngar chuweged gag u lan fare luwed. Tomuren e biney mi ni pageg nggu par u lan e yoror.

Zedekiah ni fith ngak Jeremiah ko mang e bfel’ ni nge rin’

14 Me mol’og Zedekiah ni Pilung nganib ni fekeg i yan ngak ko bin dalip e garog ko Tempel. Me ga’ar ngog, “Nggu fith bbugithin ngom, ma dabug ni ngam mithag ban’en rog.”

15 Mu gu fulweg nug ga’ar, “Ra gu weliy e tin riyul’ ngom, ma ga thang e fan rog, ma gu ra fonow nigem, ma gathi ga ra fol riy.”

16 Me micheg Zedekiah ni Pilung bbugithin ngog nde nang be’. I ga’ar, “Gu be micheg u fithingan SOMOL ni be par nib fos, ni ir e ke pi’ e yafos ngodad, nri dab gu thang e fan rom, ma dab gu pi’em nga pa’ fapi pumo’on ni yad baadag ni ngar thanged e fan rom.”

17 Mug ga’ar ngak Zedekiah, “I SOMOL ni Gubin ma Rayag Rok, ni ir e Got nu Israel, e ke ga’ar, “Fa’an ga ra pi’em nga pa’ e pi tolang ko salthaw rok e pilung nu Babylon, ma dab ni thang e pogofan rom ma dab ni urfiy e re binaw ney. Me gur nge girdi’ u tabinaw rom e dab ni thang e fan romed. 18 Machane fa’anra dab mu pi’em nga pa’rad, ma aram e bay ni pi’ e re binaw ney nga pa’ piyu Babylon ngar urfiyed ma dabiyag ni ngam mil rorad.”

19 Me fulweg Zedekiah ni Pilung ni ga’ar, “Gu be rus ngak e girdi’ nu Israel ni kar milgad ngak piyu Babylon. Ya richey mi ni pi’eg nga pa’rad ngu’ur gafgow nigedgag.”

20 Mug ga’ar, “Dab ni pi’em nga pa’rad. Wenig ngom mu fol ko thin nike yog SOMOL ni bod rogon ni kug weliy ngom; ma aram e dariy ban’en nra buch rom, ma dab kun thang e fan rom. 21 Ya SOMOL e ke piliyeg e changar rog kug guy e n’en nra buch rom ni fa’an ga ra duwgiliy ni nge dab mu pi’em nga pa’ e pi tolang ko salthaw nu Babylon. 22 Mu sap! Urngin e pi ppin nike magey u lan tafen e pilung nu Judah e ka ni fekrad i yan ko pi tolang ko salthaw rok e pilung nu Babylon. Mu telim ko thin ni yad be yan ma yad be yog ni be lungurad,

‘Pi fager rok fare pilung e ka ra lobochiyed,

ke mang yad e yad be gagiyegnag.

Ma chiney nike rich e rifrif u ay nga fithik’ e rungdu’,

me yan fapi fager rog ngar n’iged.’ ”

23 Mug ga’ar ngak, “Urngin e ppin rom nge bitir rom e bay ni fekrad i yan ngak piyu Babylon, me gur e dabiyag ni ga ra mil rorad. Bayi fekem fare pilung nu Babylon ni kam mang kalbus rok, ma re binaw ney e bay ni urfiy.”

24 Me fulweg Zedekiah ni ga’ar, “Ngam guy rogon nge dabi nang be’ e tin ni kad weliyew, ma aram e dariy ban’en nra buch rom. 25 Ra rung’ag e pi tolang ni kug non ngom, ma yad ra yib ngar fithed ngom e thin ni kad weliyew. Ma yad ra micheg ngom ndab ra li’ed gur nga mum’ ni fa’anra mu weliy ngorad urngin e tin ni kad weliyew. 26 Ma aram e ngamog ngorad ni nge lungum e um wenig ngog ni nge dab kug pi’em nga ni fulwegem nga kalbus u naun rok Jonathan ya ga ra yim’ u rom.” 27 Urngin fapi tolang nrabad ngog ngu’ur fithed gag, mu gog ngorad e tin keyog fare pilung ngog ni nggu gog. Miyad par ndakuriy ban’en ni yad ra rin’ ngog, ya dariy be’ nike rung’ag e tin ni ug weliyew. 28 Min teg u lan fare yoror ko tafen e pilung nge mada’ ko rofen nni kol yu Jerusalem.

<- JEREMIAH 37 JEREMIAH 39 ->