EZEKIEL 41

1 Me migid, me fekeg fare mo’on ngalan e bin ga’ e senggil, ni aram e Gin nib Thothup. Me foleg e gin yima yan riy nga langgin fare senggil nib ga’: Ma ragag e fit n’umngin 2 ma ragag nge meruk e fit radan, ni bay e rungrung u barba’ ngu barba’ ni meruk e fit dub’agin. Fare mo’on e foleg fare senggil nib ga’: ma n’umngin e nel’ i ragag nge meruk e fit ma guyey nge aningeg e fit radan.

3 Ma aram me yan ko bin lukngun e senggil. Me foleg e gin yima yan riy ngalan fare senggil ni lukngun: ma dalip e fit n’umngin ma ragag e fit radan, ma rungrung u l’agruw raba’ riy e ragag nge l’agruw e fit dub’agin. 4 Me gad e fol ko fare senggil, ma guyey nge aningeg e fit n’umngin ma ku aram rogon radan. Re senggil ney e bay nga wuru’ fare senggil nib ga’. Ma aram me ga’ar ngog, “Irera’ e Gin Th’abi Thothup.”

Senggil ni kan toy nga downgin e rungrung ko fare Tempel

5 Fare mo’on e foleg dub’agin e ba’ ni langgin e rungrung ko fare Tempel ni kan toy, ma ragag e fit. U dow e rungrung nib liyeg fare Tempel e ba k’af yochi senggil’ riy ni medlip e fit radan reb. 6 Pi senggil ney e dalip thal, nra bathal ma guyey e senggil ngay. Ra bathal make gif, ndani angkarnag nga, daken bathal e malang nib peth ko rungrung u wuru’ fare Tempel. 7 Ere rungrung ko Tempel e yira guy u ba’niyen, ma gowa ta’reb duba’gin u but’ nge mada’ ngalang. Ba gabad ko thal ni wuru’ e rungrung ko Tempel nge wuru’ fapi senggil, e ni tay l’agruw i tawo’ nib ga’ ngay, ya ra yag ni ngan yan u thal ni but’ ko thal ni lukngun nge thal ni lang. 8-11 Wuru’ e rungrung ko pi senggil ney e meruk e fit dub’agin; reb e mab e yib ngalan e pi senggil u ba’ ni lel’och fare Tempel, ma reb e yan ngalan e pi senggil ni bay u ba’ ni yimuch. Mug guy ni bay e baranda’ riy nib liyeg fare Tempel ni meruk e fit radan; ma ragag e fit tolngin u daken e but’ nib ta’abfoyen ko faraf ko fapi senggil ni bay u downgin e rungrung ko fare Tempel. Ma thilin e baranda nge fapi naun nma par e pi prist riy e yug bangi ban’en dariy ban’en riy ni guyey nge aningeg e fit radan e gin’em nga barba’, ni yan u ga’ngin yang u barba’ fare Tempel.

Naun u ba’ ni ngal

12 Aram u taban fa gin dariy ban’en riy ko ba’ ni ngal e Tempel e ba’ ba naun riy ni 150 e fit n’umngin ma 116 e fit radan; rungrung riy e mereb e fit dub’agin nib liyeg.

Gubin folen fare naun ko Tempel

13 Fare mo’on e foleg e ba’ ni wean ko fare Tempel, ma 168 e fit n’umngin. Ma ba’ ni tabgul ko fare Tempel nge yan nge pag fa gin dariy ban’en riy nge mada’ nga ba’nem fare naun ko ngal, ma pal’afngin e 168 e fit. 14 Pal’afngin aray u mit fare Tempel, nib mu’un fa gin dariy ban’en riy u barba’ ngu barba’, e 168 e fit. 15 Me foleg n’umngin fare naun ko ngal nib mu’un e bogbog riy u l’agruw raba’ ngay e ku 168 fit.

Rarogon fare Tempel

Fare senggil ni yima yan rin ngalan fare Tempel, nge Gin Nib Thothup, nge Gin Th’abi Thothup 16 e go’ palang e ni fanay ngay ni tabab ko faraf nge mada’ ko pi winda riy. Pi winda’ ney e rayag ni ngan ning. 17 Rungrung u lan fare Tempel e yan nge pag p’ebgul e mab riy, e go’ kan ker daken 18 nga ya’an e gek’iy ni palm nge bogi gamanman ni bay pon. Gek’iy ni palm e kan ker ya’an u thilin fapi gamanman, nib k’af nib liyeg fare senggil. Ra reb fapi gamanman ma l’agruw owchen: 19 bin ba owchen i girdi’ e ba sap ko fare ya’an e gek’iy ni palm nga barba’, ma bin nib owchen i layon e ba sap ko kaen ni bay u barba’ i charen e gek’iy. Yi go’ arogon ya’an i yan nike liyeg fare rungrung, 20 ni tabab u daken e faraf nge mada’ nga daken p’ebgul fapi mab. 21 Rumog u barba’ ngu barba’ e mab ko fa Gin Nib Thothup e ta’reb ga’ngin radan nga n’umngin.

Fare Altar nni ngongliy ko ren

U mit langan e mab ko Gin Th’abi Thothup e bay ban’en riy ni bod ya’an 22 ba altar ni ren. Ni lal e fit tolngin ma aningeg e fit radan. Duga’ ko pi tabthung riy, pi ta’ riy, nge gubin raba’ riy e go’ ni ngongliy ko ren. Me ga’ar fare mo’on ngog, “Irera’ e re tabel ni be par u p’eowchen SOMOL.”

Pi mab

23 Bay reb e mab u tungun ba senggil nib n’uw ni yima yan riy ko fa Gin Nib Thothup nge ku reb e mab u charen fa binem e mab ni yima yan riy ko Gin Th’abi Thothup. 24 Gal mab nem e ra reb ma l’agruw raba’ ni yima bing u lukngun. 25 Bay ya’an e gek’iy ni palm nge fapi gamanman ni bay pon ni kan ker nga daken fa gal raba’ i mab ko Gin Nib Thothup, nri ta’reb ya’an ko fa tin nu daken e rungrung. Ma bay bang i ren ni upong u p’ebgul e ba’ ni wuru’ e mab ko gin yima yan riy nga senggil. 26 U barba’ ngu barba’ e re senggil ney e bay bogi winda’ riy, ma pi rungrung riy e kan fal’eg ya’an ko gek’iy ni palm.

<- EZEKIEL 40 EZEKIEL 42 ->