1 Nap’an ni ka fini pag David p’ebugul fare burey ke yan boch nga orel, mi yow mada’ Ziba ni fare tapigpig rok Mefiboseth, ma bay boch e gamanman ni dongki nike fek nike suguy daken keru’rad nga 200 yal’ e flowa ni gang’, nge 100 punug e grape ni ka ni gilk’ad, nge 100 punug wom’ngin e gek’iy ni yima kay ni ka fin nt’ar, nge ba tutuw ni keru’ e gamanman nike suguy ko wayin. 2 Me fith David ni Pilung ngak ni ga’ar, “Mang e ngam rin’ ko pin’ir ni er urngin?”

5 Fa’ani taw David ni Pilung nga Bahurim, me yib be’ nib mo’on ni be’ rok Saul ngak ni Shimei fithingan, ni Gera e chitamngin, nike yib ni ngar mada’gow; nap’an ni be yib ma be yog e thin nib kireb ngak David. 6 Ma be pag Shimei e malang ngak David nge pi tolang rok, ni yugu aram rogon nib sug e salthaw rok David u charen nge pi’in yad be matanagiy David. 7 Me yog Shimei e thin nib kireb ngak David ni ga’ar, “Mman ngam chuw! Mman ngam chuw! I gur e re tathang e pogofan nir! I gur e re kireb nir! 8 I gur e kam fek e nam rok Saul, mi SOMOL e be gechig nigem ni bochan e pire’ e girdi’ ko tabinaw rok Saul ni kam li’ ke yim’. Ere chiney e ke pi’ SOMOL e nam nu Israel ngak Absalom ni fakam, me gur e ka ni kireb nigem, i gur e re tathang e pogofan nir!”

9 Mi Abishai, ni Zeruyah e chitiningin e ga’ar ngak David ni Pilung, “Pilung, mang ni kam pag e re pilis nem be yog e thin nib kireb ngom? Mol’ogeg nggu wan gu th’ab k’angan!”

10 Me ga’ar David ni Pilung ngak Abishai nge Joab ni walagen Abishai, “Gathi gimew e ngam leam nigew e tinir. Fa’anra yog e thin nib kireb ngog ni SOMOL e ke gagiyegnag, me mini’ e bay mat’wun ni nge fith ko mangfan nike rin’?” 11 Me ga’ar David ngak Abishai nge ngak urngin e pi tolang rok, “Fakag e be guy rogon ni nge li’eg nggum’; ere mang ni ngad gin gad ngak e cha’ney ni be’ ko genong ni Benjamin! Mu paged ngi i yog e thin nib kireb, ya SOMOL e ke gagiyegnag be yodor ngog. 12 Ya sana ra guy SOMOL e gafgow ni kug tay me pi’ e tin ni bfel’ ngog nge yan nga luwan e thin nib kireb ni be yog ngog.” 13 Ma aram me yan David nge salthaw rok. Me yan Shimei u sigre’en e burey ni be lekrad ni be yog e thin nib kireb ma be pag e malang nge but’ ngorad. 14 David ni Pilung nge urngin e salthaw rok e nap’an nra tawgad ko lul’ ni Jordan ma ke aw porowrad, miyad toffan u rom.

15 Me yan Absalom nge urngin piyu Israel ni kar uned ngak ngalan yu Jerusalem, ni bay Ahithofel rorad. 16 Hushai ni fa’anem nib pagan’ David ngak me ir e fager rok e mada’nag Absalom, me ga’ar, “Nge n’uw nap’an e en pilung! Nge n’uw nap’an e en pilung!”

17 Me ga’ar Absalom ngak, “Mang e ke rin’ e yul’yul’ rom ngak e tafager rom i David? Mangfan nda mu’un ngak ngam marow?”

18 Me fulweg Hushai ni ga’ar, “Uw rogon ni ngug un ngak? Ya gub fol ngak e en ni SOMOL e ke turguy, nge pi girdi’ ney, nge urngin e girdi’ nu Israel. Nggu par rom. 19 Fa’anra dab gu pigpig ngak e re mo’on ni fak e masta rog, me ere mini’ e nggu pigpig ngak? Ere bay ug pigpig ngom e chiney, ni bod rogon ni ug pigpig ngak e chitamam.”

20 Me cheal Absalom ngak Ahithofel nge ga’ar ngak, “Mog ngog e tin ni ngad rin’ed.”

21 Me ga’ar Ahithofel, “Mman ngam moleg fapi ppin rok e chitamam nike pagrad u roy ni ngu’ur ayuweged e naun ko pilung. Ma aram e urngin e girdi’ nu Israel ni bay ra nanged ni kam par ni gur e to’ogor rok e chitamam, ma aram me yib e athamgil nga laniyan’ e pi’in kar folgad ngom.” 22 Ma aram miyad n’uf ba tent u daken e chigiy u tafen e pilung, me yan Absalom ngalan ni yibe guy nge moleg fapi ppin rok e chitamngin.

23 Tin ni i yog Ahithofel u lan e pi rran nem e un fol riy ni gowa thin rok Got; i fol David nge Absalom riy.