1 Tomuren nel’ e duw nike son Jehoyada ni prist me t’aruwan’ ni aram e ngiyal’ ni nge rin’ ban’en. Aram me fal’eg rogon nge fek lal e tolang ko salthaw: Azariah nib mo’on ni fak Jeroham, Ishmael nib mo’on ni fak Jehohanan, Azariah nib mo’on ni fak Obed, Maaseyah nib mo’on ni fak Adayah, nge Elishafat nib mo’on ni fak Zikri. 2 Mranod ngalan gubin e pi binaw nu Judah ngar feked nga Jerusalem e pi Levite nge urngin e pi’in lolgen e yuke girdi’.

3 Go’ ra mokun gad ngalan e Tempel, nu rom e ra ngongliyed bm’ag u thilrad Joash riy, ni fare fak e pilung. Me ga’ar Jehoyada ngorad, “Ba’aray fare mo’on ni fak e bin tomur e pilung. Ni ir e chiney e nge pilung, ni bod ni micheg SOMOL ngak David ni pi’in owchen e yad e ngu’ur pilunggad 4 ba’aray e n’en ni ngad rin’ed. Nap’an nra yib e pi prist nge piyu Levi ko maruwel e rofen ni Sabbath, ma ngar dalip ulung gad ma reb ko dalip i ulung nem e nge matanagiy e pi garog ko Tempel, 5 ma reb e ulung rorad e nge matanagiy tafen e pilung, ma pi’rorad nike magay e ngar pired ko fare Garog ko Def. Urngin e girdi’ ma nge mu’ulung ngalan e yoror ko Tempel. 6 Dariy be’ nra yib ngalan e Tempel ya kemus ni prist nge pi Levite ni yad be maruwel. Rayag ni ngarbad nga naun ni bochan e ka ni tabgul nagrad, machane tin kabay e girdi’ e thingar rafolgad ko n’en keyog SOMOL ngar pired u wean. 7 Pi Levite e ngar pired ni yad ba sak’iy ni kar liyeged fare pilung, ni bay e saydon rorad u pa’rad, ni demturug e gin nge yan fare pilung ngay ma yad bay rok. Ma en nra guy rogon ni nge thum’ ngalan fare Tempel e yira thang e fan rok.”

8 Piyu Levi nge girdi’ nu Judah e ra pired nri yad be tay ngagil’ e tin be yog Jehoyada ni ngan rin’. Dar paged fapi pumo’on ni kar mu’gad ko maruwel e rofen ni Sabbath, ere fapi tolang e yugur ted fapicha’ u rom ni pi’rorad nike mu’ ko maruwel nge pi’in karbad ni ngar marwelgad. 9 Me pi’ Jehoyada ngak fapi tolang e sarey nge yuyang i shield ni fen David ni Pilung ni un cha’riy u lan e Tempel. 10 Me tay fapi pumo’on ni kar liyeged mit fare Tempel ni bay e saydon rorad u pa’rad, ni ngar yororiyed fare pilung ni dabi buch ban’en rok. 11 Ma aram me pow’iy Jehoyada i Joash nga wean, me tay fare te’elyaw ko pilung nga lolugen, me pi’ ngak ba kan e babyor ni rogon e pilung ni ngi i par. Ma aram mi ni pilungnag. Jehoyada ni prist nge pifak ni pumo’on e ra gapgep niged Joash, me tolul gubin e girdi’ ni yad be ga’ar, “Nge n’uw nap’an ni ngi i gagiyeg e en pilung!”

12 Me rung’ag Athaliah laman e girdi’ ni yad be garusnag fare pilung me gurnag ir i yib nga Tempel, ko gin ke mu’ulung e girdi’ ngay. 13 U rom e guy riy fare pilung ni kab be’ech u langan e Tempel, nib sak’iy u to’oben fare duga’ ni ka ni tay ni fan ngak e pilung ma ke liyeg e pi tolang ko salthaw nge girdi’en e musik ko rappa. Gubin e girdi’ ni yad be garusnag e felfelan’ ma yad be thoy e rappa, ma girdi’en e musik u Tempel ni bay talin e musik rorad e yad e yad be tay langin fare madnom. Me guchthiy fare pin e mad rok me tolul ni ga’ar, “Ka mu liyab nigedgag! Ka mu liyab nigedgag!”

14 Ma dabun Jehoyada ni ngan li’ Athaliah nge yim’ u lan e yoror ko fare Tempel, ma aram me pining fapi tolang ko salthaw nga wean me ga’ar ngorad, “Mu feked e re bpin ney nga wean u thilin e gal raba’ i girdi’en e matnag nir migmed thang e fan rok e en nra guy rogon ni nge ayuweg.”

15 Miyad kol fare pin ngar feked i yan ko fare naun ko pilung, mu rom ko fare Garog ni Os e ra thanged e fan rok riy.

16 I Jehoyada ni prist nge Joash ni Pilung nge fapi girdi’ e ra chagilgad ngak Jehoyada ngar ngongliyed ba m’ag u thilrad ni ngar pired ni yad e girdi’ rok SOMOL. 17 Ma aram miyad yan ni yad gubin ko fare tempel rok Baal ngar buthuged nga but’. Miyad bilig fapi altar nge fapi liyos u rom miyad li’ Mattan ni prist rok Baal nge yim’ u mit fapi altar. 18 Me tay Jehoyada fapi prist nge pi Levite nge milfan e maruwel u Tempel ngorad. Yad e ngar rin’ed e maruwel ni ka David ni Pilung e pi’ ngorad ma ngu’ur urfiyed e maligach ngak SOMOL nrogon ni bay ko Motochiyel rok Moses. Ma kuyad e ba milfan e musik nge pi madnom ngorad. 19 Miki tay Jehoyada e matnag ko fapi garog ko Tempel ni maruwel rorad e ngu’ur ted u wean e girdi’ nib alit nrogon ni kan turguy.

20 Pi tolang ko salthaw, nge pi mit e thin, nge pi tayugang’, nge urngin e tin kabay e girdi’ e go’ ru’uned ngak Jehoyada ngar feked fare pilung u lan fare Tempel ngar thelapgad ko fare naun ko pilung. Ranod nga naun ko fare garog nth’abi ga’, me yan fare pilung i par nga daken fare chiya’ ni tagil’ e pilung. 21 Gubin fapi girdi’ nike sug nagrad e felfelan’, ma ke’aw e cho’ u lan fare binaw e ngiyal’ney ni kan li’ Athaliah ke yim’.