1 SAMUEL 28

1 Ma fa’ani bingyal’ me ulunguy piyu Filistia e salthaw rorad ni ngar maelgad ngak piyu Israel, me ga’ar Akish ngak David, “Ngam nang ni gur nge salthaw rom e ngam uned ngog ko mael.”

2 Me ga’ar David, “Kefel’ ni arogon. I gag e tapigpig rom, me gur e bay mu guy e tin bay gu rin’.”

Me ga’ar Akish, “Kefel’! Bay gu tem ni gur e ngu’um par ni pos rog ndariy n’umngin nap’an.”

Saul ni fith lanyan’ ba sothiw

3 Re ngiyal’ i n’em e ke yim’ Samuel, ma urngin e girdi’ nu Israel nra mowaw niged nge mu’ miyad k’eyag u Ramah ni aram e binaw rok. Mi Saul e ke chuweg urngin e tamanbey nge sothiw u lan yu Israel.

4 Me mu’ulung e salthaw rok e pi Filistine ngarbad ra pired nga to’oben e binaw nu Shunem; me ulunguy Saul piyu Israel ngranod ra pired ko burey ni Gilboa. 5 Fa’ani guy Saul e salthaw rok piyu Filistia me yib e marus ngak, 6 ma aram me fith ngak SOMOL e n’en ni nge rin’. Machane de fulweg SOMOL lungun, nde fulweg u malik’ay, ara ni guy ko Urim, ara Thummim, ara u l’ugun e pi profet. 7 Me ga’ar Saul ngak e pi tolang ni yad bay u tan pa’, “Mu guyed be’ ni bpin nib sothiw nggu wan ngak ko bay.”

Miyad fulweg ngak ni lungurad, “Bay reb u Endor.”

8 Me piliyeg Saul ya’an; i yin’ e mad nga daken nib thil ya’an, ma fa’ani aw e lumor me un l’agruw e salthaw rok ngak ni ngranod ra guyed fare pin. Me ga’ar Saul ngak, “Mu fith e pi kan ngrogned ngom e n’en ni bayi buch ngamog ngog. Mu pining ya’an e re mo’on ni bay gog fithingan.”

9 Me ga’ar fare pin, “Rib mudugil ni ga manang e tin ke rin’ Saul ni Pilung, nga rogon nike chuweg e pi tamanbay nge pi sothiw u lan yu Israel. Ere mang ni ga be guy rogon ni nggu aw ko wup rom ngan thang e pogofan rog?”

10 Ma aram me micheg Saul bbugithin ni ga’ar, “Rogon nib riyul’ ni bay SOMOL ni be par nib fos e aram rogon ni gu be micheg ngom ni ga ra rin’ ma dab ni gechig nigem.”

11 Me fith fare pin ngak ni ga’ar, “I mini’ e nggu pining ya’an?”

Me ga’ar Saul, “I Samuel.”

12 Me guy fare pin Samuel me k’ad fare pin e tolul. Me ga’ar ngak Saul, “Mangfan ni kam ban nigeg? Ya gur Saul ni Pilung!”

13 Me ga’ar fare pilung ngak, “Dab mu rus! Mang e ga be guy?”

Me ga’ar fare pin, “Gu be guy ba ya’al ni be yib ngalang u fithik’ e but’.”

14 Me fith Saul ni ga’ar, “Uw rogon ya’an?”

Me fulweg fare pin ni ga’ar, “Be’ nib mo’on nib pilibthir e be yib ngalang. Bay ba wuru’ e mad nib n’uw u daken.”

Me nang Saul ni Samuel eram, me siro’ ni aram e ke tayfan.

15 Me ga’ar Samuel ngak Saul, “Mangfan ni gu be toffan ma ka mub mmagawon nigeg? Mangfan ni kam piningeg ku gub?”

Me fulweg Saul ni ga’ar, “Ke yib e gafgow ngog ni ba ga’! Pi Filistine e kar m’aged e mael ngog, ma ke n’igeg Got. Ra gu fith ban’en ngak ma dakir fulweg, ndakir fulweg taban u l’ugun e pi profet ara u malik’ay. Aray fan ni kug piningem ni ngamog ngog e n’en nthingar gu rin’.”

16 Me ga’ar Samuel, “Mangfan ni kam piningeg, ni er rogon nike n’igem SOMOL ma kam par ni gur e to’ogor rok? 17 I SOMOL e ke rin’ ngom e tin yog ngom u l’ugunag: Ke fek rom e gagiyeg ni ga be tay ngak piyu Israel ke pi’ ngak David. 18 Da mfol ko tin ni yog SOMOL ngom ni ngam rin’, ya da mu thang e fan rok e pi Amalek ni gubin nge gamanman rorad. Aram fan nike yodoro’ nigem SOMOL e chiney. 19 Bayi pi’em nge piyu Israel nga pa’ e pi Filistine. Gabul e gur nge fapi pumo’on ni fakam e bay mbad ko bin gu bay riy e tamilang, ma ku bayi pi’ SOMOL e salthaw nu Israel nga pa’ piyu Filistia.”

20 Kachingiyal’ nem me thig Saul nga but’ me par u daken e but’ nib k’iy, ni kari rus ko tin keyog Samuel. Ma kem’ay gelngin, ni bochan e de kay ban’en ni reb e rran nge reb e nep’ ni polo’. 21 Me yan fare pin ngak me guy ni kari rus, me ga’ar fare pin ngak Saul, “Wenig ngom, kug dow ko pogofan rog kug rin’ e tin kam wenignag ngog. 22 Ere wenig ngom, mu rin’ e tin nggu wenignag ngom. Ba’aray e ggan ni ganam. Mu koy nge yib gelngim ngam milekag.”

23 Me ga’ar Saul e dabi kay ban’en. Machane pi tolang ni yad bay u tan pa’ e ur tawasergad ngak ni nge kay ban’en. Aram me fol rorad, me suwon nge par nga daken e chob. 24 Me gurnag fare pin ir nge li’ ba pifak e garbaw ni i duruw’iy ke sugsug. Me fek boch e flour nge ngongliy rogon, me lith boch e flowa nde tay e is ngay. 25 Me tay fapi ggan nga p’eowchen Saul nge pi tolang ni yad bay u tan pa’, miyad kay. Miyad chuw u rom ni ka re nep’ nem.

<- 1 SAMUEL 27 1 SAMUEL 29 ->