1 KINGS 3

Solomon ni meybilnag e gonop

(2 Kronicles 1:3–12)

1 Solomon e fal’eg e tha’ u thilrow e pilung nu Egypt ni le’engiy be’ nib pin ni fak. Me yib i tay ngalan fare Binaw rok David[a] nge mada’ ko ngiyal’ ni m’ay i toy e naun rok, nge fare Tempel, nge yoror ko binaw nu Jerusalem. 2 Girdi’ e yad be pi’ e maligach u daken yungi n’en nib tolang, ni bochan e dariy reb e naun ni kan toy ni fan nga fithingan SOMOL. 3 Solomon e ba t’uf SOMOL rok, ma i fol ko thin rok David ni chitamngin, machane ki i pi’ e gamanman ni maligach miki i urfiy e incense ko yungi n’en nib tolang.

4 Me yan fare pilung nga Gibeon ni nge pi’ e maligach u rom, ni aram e gin th’abi tolang; ma ka e urfiy bbiyu’ e maligach u rom kafram.[~2~] 5 U rom u Gibeon e yib i m’ug SOMOL ngak Solomon u malik’ay nnep’; me ga’ar ngak, “Mang e ga ba’adag ni nggu pi’ ngom?”

6 Me ga’ar Solomon, “Gubin ngiyal’ ni um dag nrib t’uf rom e chitamag i David ni tapigpig rom, ma i par ni bfel’, ma ba yul’yul’, ma mmat’aw u p’eowchem. Ma ka ga be dag nrib t’uf rom ya kam pi’ be’ nib mo’on ni fak ni ir e be gagiyeg e daba’ u tagil’. 7 SOMOL ni Got, kam gagiyeg nigeg kug wan nga luwan e chitamag kug pilung, ni yugu aram rogon ni ku gub pagel nda gu nang rogon e gagiyeg. 8 Ere kug par u fithik’ e girdi’ ni gur e mturguyrad ni ngar manged girdi’em, ni yad pire’ ndabiyag i the’egrad. 9 Ere mpi’ e gonop ni nge yag ngog ngu’ug gagiyegnag e girdi’ rom nrogon nib yal’uw ma ngug nang e n’en nib thil ko tin ni bfel’ nge tin nib kireb. Ya ra dariy e gonop rog ma uw rogon ni ngu’ug gagiyegnag e pi girdi’ rom ney ni aray feni yo’or?”

10 Me fel’ u wan’ SOMOL nike wenignag Solomon e re bugithin nem ngak, 11 me ga’ar ngak, “Bochan e kam wenig ngog ni nggu pi’ e gonop ngom nge yag ni mu gagiyeg nib yal’uw, ma da mu wenignag ni nge n’uw nap’am ara yo’or ban’en rom, ara nge yim’ e pi to’ogor rom, 12 ma aram e nggu pi’ ngom e tin kam wenignag ngog. Bay gu pi’ e gonop ngom nge tamilangan’ ndariy be’ nga m’on rom ni immoy rok ara be’ ni bay fini yib nga tomrem. 13 Ma ku bay gu pi’ ngom e n’en ndawor mu ning ngog, bayi fel’ rogom mu’un tayfam u n’umngin nap’an e yafos rom, nib gel e thil romed yugu boch e pilung. 14 Fa’anra um fol rog ma ga be tay nga tagil’ e pi motochiyel rog nge pin’en kugog ni ngam rin’ ni bod ni i rin’ e chitamam i David, ma bay gu gagiyeg nigem nge n’uw nap’am.”

15 Me od Solomon me nang nike non Got ngak u malik’ay. Me yan nga Jerusalem nge yan i sak’iy nga m’on ko fare Kahol ko M’ag rok SOMOL me pi’ e maligach ni mo’oruf ngak SOMOL nge maligach nma gapaseg thilin Got nge girdi’. Me ngongliy ba mur ni fan ngak urngin e pi tolang ni bay u tan pa’.

Solomon ni pithig ba pa’ i oloboch nib mo’maw’

16 Reb e rran me yib l’agruw i ppin ni yow ma chuway’ ngorow nga p’eowchen Solomon ni Pilung. 17 Bagayow e ga’ar, “Pilung, re pin ney e gamow ma par u lan ta’ab naun, ma gamow u rom mu gu gargel ni bochi pagel. 18 Dalip e rran nga tomuren miki gargel ni bochi pagel. Go’ gamow u rom u naun, ndariy be’ ni immoy romow. 19 Me reb e nep’ me pig nga daken e birok e bitir nge yim’. 20 Me od e re nep’ nem, nge fek e birog e bitir u to’obeg ni kug be mol mefek nge tay nga chob rok; me tay fa binem e bitir nike yim’ nga chob rog. 21 Fa’ani kadbul ni gu od ni gu wan ni nggu tathuthnag e bitir rog, mu gu pir’eg nib yam’. Mu gu fal’eg i yaliy mu gguy ni gathi fa birog e bitir.”

22 Machane me ga’ar fa bin ba’aram e bpin, “Danga’! Bin ni kabfos e bitir e birog, ma bin nike yim’ e birom!”

Me fulweg fa binem e bpin ni ir e som’on ni non ni ga’ar, “Danga’! Bin nike yim’ e bitir e birom, ma bin ni kabfos e birog!”

Aram rogon ni ur lu’agew e thin u p’eowchen Solomon ni Pilung.

23 Me ga’ar Solomon, “Ra bigimew ma be ga’ar e bin ni kabfos e bitir e birok, ma bin nike yim’ e bitir e gathi birok e bitir.” 24 Me yog ni ngan fek ba saydon i yib, ma fa’an nni fek i yib 25 me ga’ar, “Re tir nir ni kabfos e ngan th’ab u lukngun, nge bagayow e gali ppin ney mi ni pi’ ba ley ngak.”

26 Bin ba’aram e bpin nri ir e chitiningin fare tir e rib t’uf rok e re tir nem, me ga’ar ngak fare pilung, “Wenig ngom, dab kun li’ e re tir ney! Mpi’ ngak!”

Me ga’ar fa bin ba’aram e bpin, “Dab mpi’ ngak bagamow; mu th’ab nge ruw ley.”

27 Me ga’ar Solomon, “Dab kun li’ e re tir ney! Nga ni pi’ ngak e bin be’er ni som’on e bpin, ya ri ir e chitiningin e re tir ney.”

28 Fa’ani rung’ag piyu Israel e tin ke duwgiliy Solomon, miyad par nike yib madgun u wun’rad, ya kar nanged ni Got e ke pi’ e gonop ngak ni nge pithig e oloboch nge yan i aw ni tin ke turguy e ba yal’uw.

<- 1 KINGS 2 1 KINGS 4 ->