1 Alatala yi a fala n xa, a naxa, “Walaxa belebelena nde tongo, i yi sɛbɛnla ti a ma naxan nɔɛ xaranɲɛ, i naxa, ‘Nafunle Suxu Keden Na. A Tongo Mafurɛn.’ ” 2 N yi walaxan yita sereya tinxinxi firin na: Saraxarali Yuriya nun Sakari, Yeberekiyaa dii xɛmɛna.
3 Na xanbi ra, n yi n ma ɲaxanla kolon ɲaxanla ra, nabi ɲaxalanmana. A yi fudikan, a yi dii xɛmɛn bari. Nayi, Alatala yi a fala n xa, a naxa, “A xili sa, ‘Nafunle Suxu Keden Na. E Tongo Mafurɛn.’ 4 Amasɔtɔ, benun i ya diin xa fatan a falɛ ‘baba’ hanma ‘n na,’ Asiriya mangana muxune Damasi taan nun Samari taan nafunle tongoma yɛngɛni nɛn.”
11 Alatala bata a yii sɛnbɛ gbeen sa n ma, a yi n maxadi, a n nama yamani ito raliga. A yi a fala n xa, a naxa:
12 Yamani ito feen naxanye yatɛma yanfan na
ɛ tan nama ne birin yatɛ yanfan na de!
Ɛ nama gaxu e gaxu feene yɛɛ ra
ɛ nama xamin ne fe yi de!
13 Ɛ xa Alatala Sɛnbɛn Birin Kanna nan tun kolon sariɲanden na,
ɛ lan ɛ xa na nan binya,
ɛ lan ɛ xa gaxu a tan nan yɛɛ ra.
14 Amasɔtɔ Ala findima nɛn yire sariɲanxin na
e nun gɛmɛna Isirayila yama firinne xa,
yamana e sanna radinma gɛmɛn naxan na,
a findi e rabira gɛmɛn na.
A findima nɛn luti ratixin na
Yerusalɛn kaane yɛɛ ra,
a e suxu.
15 E wuyaxi e sanna radinma nɛn,
e bira, e fe yi kala.
E suxuma nɛn lutin na,
e mi nɔɛ e fulunɲɛ.
Nabiin yigina fe
16 N yi na sereyaan namara n yi,
n yi xaranni ito balan,
n na fala n ma xarandiine nan tun xa.
17 N na Alatala mamɛma
naxan bata a yɛtagin luxun Yaxuba bɔnsɔnna ma.
N nan n yigi sama Ala nin.
18 Nxu nun n ma diine nan ito ra,
Alatala naxanye fixi n ma.
Nxu findixi taxamasenne nun marakolon seene nan na
Isirayila yi, fata Alatala Sɛnbɛn Birin Kanna ra
naxan dɔxɔden Siyon geyaan fari.
19 Ndee a falama, e naxa, “Ɛ barin kiine nun yiimatone maxɔdin, naxanye wundo feene kɔyɛkɔyɛnma, e falan ti e dɛ bun ma. A mi daxa yamaan xa e gbee alane maxɔdin ba? Muxune mi barinne xan maxɔdinma ɲɛɲɛ muxune xa ba?” 20 Ɛ ne yabima nɛn, ɛ naxa, “Fɔ en xa xɛtɛ Alaa sariyan nun a fala xuine nan ma.” Xa naxan mi falan tima na kiini, na kanna mi kɛnɛnna toma.
Ɲaxankata dimina
21 Muxune yigitɛgɛxin nun e kamɛtɔne
e masiga tima nɛn yamanan xun xɔn ma.
Kamɛn na e suxu ɲaxi ra,
e xɔlɔma nɛn,
e sa e mangan nun e Ala danga.
E yɛɛn tima nɛn koren na,
22 na xanbi ra e yi bɔxɔn mato.
Koni e tɔrɔn nun dimin nun bɔɲɛ rafɔrɛ gbeen nan tun toma.
a Arami kaane mangan nan Resin na. b Heburu xuini, a sɛbɛxi, “Ɛmanuwɛli.” Na feen mato Esayi 7.14 nun 8.10 kui.
c Heburu xuini, a sɛbɛxi, “Ɛmanuwɛli.” Na feen mato Esayi 7.14 nun 8.8 kui.
