San Juan 10

Currali tkachi Ianyuux

1 ʼXandaa kuu xa jaꞌan‑r. Ɨɨn seyɨɨ, nux kuyatni‑s currali tkachi, ko ña kɨu ndaa‑s yeꞌe currali, ko xido‑s dɨkɨ currali, te xini‑ro xa ñaduꞌu kuu‑s, xini‑ro xa juini‑s xa duꞌu‑s tkachi jan. 2 Se kɨu ndaa yeꞌe currali, mee‑s kuu se ñunuu tkachi. 3 Mee‑s, ña tnɨɨ ñaꞌa ti‑ina, te tnuꞌu mee‑s ka najini tkachi‑s. Kana‑s dɨu ɨɨn ɨɨn tkachi‑s, te ka natuꞌa ñaꞌa‑tɨ, te kineꞌe‑s‑tɨ currali. 4 Kana‑s ntdaa tkachi‑s, te xe juindodo nuu‑s nuu‑tɨ. Xndijun ñaꞌa‑tɨ, chi naꞌa‑tɨ tnuꞌu xtoꞌo‑tɨ. 5 Ko ma nkuitandijun‑tɨ setoꞌo. Kunu koio‑tɨ, chi ñatu ka xini‑tɨ tnuꞌu setoꞌo.

6 Tnuꞌu yaꞌa n‑jaꞌan Jesús xa dakuaꞌa‑ia se fariseu ijan, ko ña n‑ka kutnuni ini‑s nax n‑jaꞌan‑ia.

N‑jaꞌan Jesús: “Mee‑r kuu Se ñunuu vaꞌa tkachi.”

7 Te n‑jaꞌan Jesús ɨnka vuelta:

—Xandaa kuu xa jaꞌan‑r. Mee‑r kuu yeꞌe currali tkachi. 8 Se n‑ka kixi antecas xa kixi mee‑r, ntdaa‑s ka kuu ñaduꞌu, n‑ka juini‑s xa duꞌu‑s tkachi. Ko ñayo tkachi n‑ka teku tnuꞌu‑s. 9 Yeꞌe currali kuu mee‑r. Nux jandixa ñaꞌa ɨɨn ñayiu mee‑r, te taxkanu ini Ianyuux kuechi‑i, te kutuu vaꞌa‑i xiꞌin‑ia. Ka kuu ñayiu jan ná kuu tkachi ndɨu yeꞌe currali. Kee‑tɨ xa kaxi‑tɨ, te ndɨu‑tɨ xa kutuu vaꞌa‑tɨ.

10 ʼKixi ñaduꞌu, xa duꞌu‑s tkachi. Kaꞌni‑s‑tɨ te danaa‑s‑tɨ. Ko vaxi mee‑r, xa kutuu vaꞌa koio‑tɨ. Vaa‑r, xa ñayiu ka jandixa ñaꞌa mee‑r, vaꞌa xa vaꞌa kutuu koio mee‑i vitna xiꞌin kuia ma jɨn ndɨꞌɨ. 11 Mee‑r kuu Se ñunuu vaꞌa tkachi. Juejoon‑r xa kaꞌni ñaꞌa koio ñayiu mee‑r, xa kutuu vaꞌa koio tkachi‑r. 12 Duꞌa ma kada koio se ka juini xa niꞌi ni‑s tvini. Ña kuu‑s ɨɨn se ñunuu vaꞌa tkachi, chi tkachi, ña ka kuu‑tɨ tkachi mee‑s. Se ijan, na ndeꞌa‑s xa vaxi ñaña, te dandoo‑s tkachi te kunu‑s. Te tnɨɨ ñaña tkachi jan, te xate niꞌna ñaꞌa‑tɨ. 13 Xino se ijan, chi kidatniu‑s xaxeꞌe xa niꞌi‑s tvini, te ña tuu nax viꞌi‑s tkachi jan. 14-15 Mee‑r kuu Se ñunuu vaꞌa tkachi. Nani xini ñaꞌa Taa‑r mee‑r, te xini mee‑r mee‑ia, dani xini‑r ñayiu ka jandixa ñaꞌa mee‑r, te mee‑i ka xini ñaꞌa mee‑r. Juñaꞌa‑r mee‑r, xa kaꞌni ñaꞌa koio seyɨɨ xaxeꞌe tkachi‑r. 16 Ko io ɨnka ñayiu ta jandixa ñaꞌa koio ka. Ná kuu tkachi yɨꞌɨ ɨnka currali, ka kuu ñayiu jan. Io xa kandeka‑r mee‑i kixi tuku. Kunini koio ñayiu jan tnuꞌu mee‑r, te mee‑i xiꞌin ñayiu ka jandixa ñaꞌa mee‑r vitna, nduu‑i, ku kuu koio‑i tkachi yɨndiꞌu kaꞌnu idini currali, te junuu vaꞌa‑r‑yɨ ntdaa‑i.

17 ʼXijan kuu xa xemani ñaꞌa Taa‑r, chi juñaꞌa‑r mee‑r xaxeꞌe tkachi‑r. Kuú‑r xa nandoto‑r ɨnka vuelta. 18 Ni ɨɨn ñayiu ña kida xa kuú‑r. Kaꞌni ñaꞌa koio‑s, ko duꞌa koo xaxeꞌe xa duꞌa koo. Xiꞌin xa taxnuni mee‑r kuú‑r, te xiꞌin xa taxnuni mee‑r nandoto‑r. Duꞌa n‑taꞌu tniu Taa‑r, te duꞌa koo.

19 Xaxeꞌe tnuꞌu yaꞌa, te ɨnka vuelta ña n‑ka xani ini ɨɨn nuu se Israel. 20 Kueꞌe‑s n‑ka jaꞌan:

—Tachi uꞌu ñuꞌu anu‑s, n‑nduloko‑s. ¿Nakuenda ka chinuu‑n tnuꞌu jaꞌan‑s?

21 Ko dava ka‑s n‑ka jaꞌan:

—Vaꞌa jaꞌan‑s, ñatu ñuꞌu tachi uꞌu anu‑s. Chi ña kuaꞌa tachi uꞌu kada‑i xa kundeꞌa ñayiu n‑xo kukuaa nde na n‑kaku‑i.

Na n‑ka teku se Israel tnuꞌu Jesús, n‑ka tnɨɨ‑s yuú xa kaꞌni‑s‑ia

22 Te n‑xio ɨɨn viko ñayiu Israel. Ñuu nani Jerusalén n‑ka xo najaꞌan ñayiu nanda n‑ka kida ii taxaꞌnu tnetnu‑ro veñuꞌu ñayiu Israel. Te yoo vixi kuu daa. 23 N‑xikonuu Jesús xiti veñuꞌu Jerusalén. N‑xikonuu‑ia nuu nani Portal Salomón. 24 Ijan n‑ka dukunduu se Israel Jesús, te n‑ka jaꞌan‑s:

—Io xa jaꞌan kaxi‑n. Nux mee‑n kuu Cristu, Ia n‑tundaꞌa ñaꞌa Ianyuux, kachitnuñaꞌa‑n.

25 N‑jaꞌan Jesús:

—Xá n‑jaꞌan‑r, te ñayo‑n ka jandixa. N‑tundaꞌa ñaꞌa Taa‑r, te kida‑r tniu n‑taxi‑ia, te tniu kida‑r jaꞌan ndaa xaxeꞌe‑r. 26 Ko ñayo‑n ka jandixa, chi ña ka kuu‑n tkachi mee‑r. Nani n‑jaꞌan‑r nuu‑n, duꞌa kuu. 27 Tkachi mee‑r ka chinuu tnuꞌu‑r. Xini‑r mee‑i, te xndijun ñaꞌa‑i mee‑r. 28 Te kada‑r xa kutuu vaꞌa koio‑i, xiꞌin Ianyuux kuia ma jɨn ndɨꞌɨ. Ni ɨɨn‑i, nuncas ma kuú‑i xiꞌin kuechi‑i. Te ni ɨɨn ñayiu ma kuaꞌa xa tnɨɨ‑i tkachi‑r yɨndaꞌa‑r. 29 Taa‑r n‑taxi tkachi‑r, te kunxaꞌnu ka mee‑ia dada ntdaa xa io. Mayo ñayiu kuaꞌa, te ni kuiꞌna ma kuaꞌa, xa dita‑i tkachi mee‑r nevaꞌa Taa‑r ndaꞌa‑ia. 30 Te ɨɨn nuu kuu mee‑r xiꞌin Taa‑r, idini ka kuu‑r.

31 Te ɨnka vuelta n‑ka tnɨɨ se Israel yuú xa kaꞌni‑s‑ia. 32 N‑jaꞌan Jesús:

—N‑taxi Taa‑r kueꞌe tniu vaꞌa, te n‑dandeꞌa ñaꞌa‑r tniu jan nuu mee‑n. ¿Xaxeꞌe ndeda ɨɨn tniu n‑kida‑r, ka juini‑n xa kaꞌni ñaꞌa‑n yuú?

33 N‑ka jaꞌan‑s:

—Ñayo‑r ka janñaꞌa xaxeꞌe tniu vaꞌa kida‑n. Kaꞌni ñaꞌa koio‑r xaxeꞌe xa kuiꞌa jaꞌan‑n Taa‑ro Ianyuux. Seyɨɨ kuu‑n, ko jaꞌan‑n xa Ianyuux kuu‑n.

34 N‑jaꞌan Jesús:

—¿Nax jaꞌan tnuꞌu n‑chidotnuni Moisés? Yodotnuni xa n‑jaꞌan Ianyuux: “Mee‑n ka kuu ianyuux.” 35 N‑danani‑ia se ijan ianyuux, chi n‑ka tnɨɨ‑s tnuꞌu Ianyuux. Tnuꞌu Ianyuux n‑chidotnuni Moisés kuu, te io xa chinuu‑ro tnuꞌu jan. 36 Xijan kuu xa, ¿nax kuu xa ka jaꞌan‑n xa kuiꞌa jaꞌan mee‑r nuu Ianyuux, hora n‑jaꞌan‑r xa kuu‑r Daꞌya Yɨɨ Ianyuux? Kuu‑r Ia n‑kaxí ñaꞌa‑ia, kuu‑r Ia n‑tundaꞌa ñaꞌa‑ia vaxi‑r ñuñayiu. 37 Nux ña kida‑r tniu Taa‑r, te maxku jandixa ñaꞌa koio‑n. 38 Ko nux kida‑r tniu Taa‑r, te io xa jandixa koio‑n tniu‑r. Juini ma jandixa ñaꞌa koio‑n mee‑r, ko io xa jandixa koio‑n tniu kida‑r. Xijan jini koio‑n xa kunduu Taa‑r xiꞌin mee‑r te kunduu mee‑r xiꞌin Taa‑r. Xijan kutnuni ini koio‑n xa Taa‑r xiꞌin mee‑r, idini xa kuu‑r nduu‑r.

39 Xijan kuu xa ɨnka vuelta n‑ka kixeꞌe‑s xa tnɨɨ presu koio‑s‑ia, ko n‑kaku‑ia ndaꞌa‑s.

40 Te juaꞌan Jesús ɨnka vuelta, n‑yaꞌa‑ia deꞌva Jordán, nde nuu kiꞌna nuu n‑dajuendute Sua ñayiu. Ijan n‑xo tuu Jesús. 41 Ijan n‑ka kixee kueꞌe ñayiu, te n‑ka jaꞌan‑i:

—Ni ɨɨn milagru ña n‑kida Sua, ko ndaa n‑jaꞌan‑s xaxeꞌe se yaꞌa. Ntdaa xa n‑jaꞌan‑s kuu xandaa.

42 Te ijan n‑ka jandixa kueꞌe ñayiu jan Jesús.

<- San Juan 9 San Juan 11 ->