Hechos 23

N‑ka xijan tnuꞌu juxtixia Israel Spalu nuu nax n‑kida‑s

1 N‑xo ndeꞌa Spalu juxtixia Israel, te n‑jaꞌan‑s:

—Dito, Ñani, ñatu nujani‑da xa kida‑da xa taꞌu tniu Ianyuux nuu‑da. Kida‑da xaꞌa vaxi, te ñatu kune ini‑da.

2 Dutu taxnuni ka nani Ananías. N‑taꞌu tniu‑s nuu se xnii yatni nuu nujuiin Spalu xa na jani koio‑s yuꞌu‑s. 3 Te xiaꞌan Spalu nuu dutu jan:

—Mee‑n janñaꞌa Ianyuux. Nukoo‑n dian xa kadandaa‑n ná yodotnuni. ¿Nakuenda ña jandixa‑n ley jan xa daa taꞌu tniu ka‑n xa janñaꞌa koio ñayiu ya u? Kida nga‑n xa jandixa‑n ley n‑chidotnuni Moisés.

4 N‑ka jaꞌan dava se xtuu ijan nuu Spalu:

—¿Nakuenda dadavatnaꞌa‑n xiꞌin dutu taxnuni ka?

5 Xiaꞌan Spalu:

—Ña xini‑da xa se dian kuu dutu taxnuni ka. Maxku daa kada‑da n‑kuu chi ka xini‑ro xa yodotnuni: “Maxku kuiꞌa jaꞌan‑n juxtixia ñuu‑n.”

6 Xaxeꞌe xa xini Spalu xa dava se Israel ka kidandaa kuechi ka kuu se saduceu, te se fariseu ka kuu dava‑s; xijan kuu xa xee n‑jaꞌan‑s:

—Se fariseu kuu‑da, te ñayiu fariseu n‑ka kuu tadɨꞌɨ‑da. Xaxeꞌe xa jandixa‑da xa nandoto ndɨyɨ, xndeka ñaꞌa‑n vaxi yaꞌa xa kajan tnuꞌu ñaꞌa koio‑n nax kuu kuechi‑da.

7 Nu duꞌa n‑jaꞌan Spalu tnuꞌu yaꞌa, n‑ka nukuita se fariseu xiꞌin se saduceu ka jantnaꞌa tnuꞌu‑s, te tuku n‑ka xani ini dava ñayiu xyuku ijan, te tuku n‑ka xani ini dava ka‑i. 8 Ka jaꞌan se saduceu xa ma nandoto ndɨyɨ. Dɨuni ka jaꞌan‑s xa ñayo ángel io, ni espíritu, ko se fariseu ntdaa xaꞌa ka jandixa‑s. 9 Ntdaa‑s n‑ka kana, te n‑ka ndojuiin dava se fariseu ka kuu maestru ka tuꞌa vaꞌa tnuꞌu n‑chidotnuni Moisés, te n‑ka jaꞌan‑s mudu kutnuni ini‑s tnuꞌu Ianyuux xa daxino ini‑s se ka kuu saduceu. Ka xiaꞌan‑s:

—Se yaꞌa, ña tuu nax n‑kida‑s. Va ɨɨn espíritu a ɨɨn ángel duꞌa n‑jaꞌan nuu‑s —ka kuu‑s, ka xiaꞌan‑s.

10 Xaxeꞌe xa loko ka jantnaꞌa tnuꞌu se yuku ijan, n‑yuꞌu comandante xa kada kuechi koio‑s Spalu. Xijan kuu xa n‑taꞌu tniu‑s nuu dava soldado‑s xa na jɨn nundeka ñaꞌa koio‑s veꞌe nuu xtuu‑s.

11 Xakuaa ijan n‑kɨu Ianyuux nuu tuu Spalu te n‑jaꞌan‑ia:

—Maxku yuꞌu‑n xa jaꞌan‑n nuu ñayiu xa n‑jaꞌan‑r. Nani n‑jaꞌan‑n xa kida‑r nuu ñayiu Jerusalén ya, dani jaꞌan‑n nuu ñayiu Roma.

N‑ka kida ɨnuu‑s xa kaꞌni koio‑s Spalu

12 Kɨu kuu uu n‑ka kida ɨnuu se Israel xa kaꞌni koio‑s Spalu. N‑ka chinaa‑s xa ni ɨɨn xa ña tuu nax kaxi koio‑s, ni ña tuu nax koꞌo koio‑s. Nde na kaꞌni‑s Spalu, ijan dada kaxi koio‑s. N‑ka jaꞌan‑s xa nux ma duꞌa kada koio‑s, na kaꞌni ñaꞌa Ianyuux. 13 Viꞌi ka uu diko‑s duꞌa n‑ka chinaa. 14 N‑ka xe juñaꞌa‑s nuu dutu ka taxnuni xiꞌin nuu juxtixia Israel xa n‑ka chinaa‑s. Ka xiaꞌan‑s:

—N‑ka chinaa‑da xa ni ɨɨn ña tuu nax kaxi koio‑da. Nde na kaꞌni koio‑da Spalu, ijan dada kaxi koio‑da. 15 Juñaꞌa koio ndixi xiꞌin dava ka juxtixia Israel nuu comandante vitna xa na kandeka‑s Spalu kixi nuu‑n ya tnee. Tnuꞌu ni nga juñaꞌa‑n xa juini‑n xa jini‑n nax kuu kuechi‑s chi ta jini ndaa ka‑n nax kuu kuechi‑s. Na kuyatni‑s yaꞌa te xá koo tuꞌa koio‑da xa kaꞌni‑da‑s —ka kuu‑s, ka xiaꞌan‑s.

16 Kaꞌni koio‑s Spalu n‑kuu, ko n‑teku daꞌya kuꞌa Spalu tnuꞌu yaꞌa te n‑xeꞌen‑s nuu xtuu soldado xa n‑xian tnuꞌu‑s Spalu xijan. 17 N‑kana Spalu ɨɨn centurión te xiaꞌan‑s:

—Kandeka‑n solteru ya juaꞌan nuu comandante chi io ɨɨn xa juña tnuꞌu‑s‑sɨ.

18 Ndeka centurión solteru jan juaꞌan nuu comandante jan, te xiaꞌan‑s:

—Se yɨndiꞌu nani Spalu n‑kana ñaꞌa, te n‑jaꞌan‑s xa na kandeka‑da solteru ya kixi nuu‑n chi io ɨɨn xa jaꞌan‑s nuu‑n ne.

19 N‑tnɨɨ comandante jan ndaꞌa solteru jan, te ndeka dɨɨn ñaꞌa‑s juaꞌan ɨɨn lado, te n‑xijan tnuꞌu ñaꞌa‑s:

—¿Nax juini‑n xa jaꞌan‑n nuu‑r?

20 Xiaꞌan solteru jan:

—N‑ka kida ɨnuu se Israel xiꞌin juxtixia‑s xa jaꞌan juxtixia jan nuu‑n xa kandeka‑n Spalu jɨꞌɨn tnee nuu ka nataka‑s xa tnuꞌu ni nga kajan tnuꞌu‑s‑sɨ nuu nax n‑kida‑s xa jini ndaa‑s nax kuu kuechi‑s. 21 Maxku jandixa‑n xa jaꞌan koio‑s chi viꞌi ka uu diko se Israel xyɨvaꞌa ichi yaꞌa Spalu. Xndetu‑s xa yaꞌa‑s ijan, te kaꞌni ñaꞌa koio‑s. N‑ka chinaa‑s xa ña tuu nax kaxi‑s ni ña tuu nax koꞌo‑s. Nde na kaꞌni ñaꞌa koio‑s, ijan dada kaxi koio‑s. Diko nga xndetu‑s nuu janda na jaꞌan‑n —kuu solteru jan, xiaꞌan‑s nuu comandante.

22 Ijan dada n‑jaꞌan comandante jan xa na nuꞌu‑s, te maxku nde ku jaꞌan‑s xijan.

N‑ka tundaꞌa‑sɨ Spalu; vaxi‑s Cesarea

23 Ijan dada n‑kana comandante jan uu centurión, te n‑taꞌu tniu‑s xa na kada tuꞌa koio‑s uu cientu soldado ka xika xeꞌe xiꞌin uni diko uxi soldado xyodo caballu xiꞌin uu cientu soldado xneꞌe lanza te na jɨꞌɨn koio‑s Cesarea kaa ɨɨ́n xakuaa. 24 Dɨuni n‑taꞌu tniu‑s xa na kada tuꞌa koio‑s caballu kodo Spalu. N‑taꞌu tniu‑s xa na junuu vaꞌa koio‑s‑sɨ, te na xee vii na xee vaꞌa‑s nuu gobernador nani Skueli. 25 N‑kidavaꞌa‑s ɨɨn carta xneꞌe soldado jan juaꞌan nuu gobernador. Duꞌa yodotnuni:

26 “Daña kuu Claudio Lisias. Vaꞌa nga taꞌu kuu‑n, Dito. Tnuꞌu yaꞌa jaꞌan‑da nuu ndixi xa kuu‑n gobernador. 27 N‑ka tnɨɨ se Israel se yaꞌa xa kaꞌni koio‑s‑sɨ, ko nu n‑teku‑da xa io tutu‑s xa se romano kuu‑s, n‑xeꞌen‑da xiꞌin soldado‑da nuu n‑ka tnɨɨ‑s‑sɨ, te n‑dakaku‑da‑s. 28 Xaxeꞌe xa n‑juini‑da xa jini‑da nax kuu kuechi‑s ndeka‑da‑s n‑xeꞌen nuu juxtixia Israel, 29 te n‑ka jaꞌan‑s xa kuechi‑s kuu xa ñatu jandixa‑s ley‑s ɨɨn ɨɨn‑s ná ka jandixa mee‑s, ko ñatu kuu xijan ɨɨn xa vaꞌa viꞌi xa kuú‑s a xa kɨndiꞌu‑s vekaa. 30 Nu n‑teku‑da xa n‑ka kida ɨnuu se Israel xa kaꞌni koio‑s‑sɨ, nuniꞌno ni n‑tundaꞌa‑da‑s juan xee nuu‑n. Te dɨuni xiaꞌan‑da nuu se n‑ka xajan kuechi‑s xa na xee koio‑s nuu‑n de na jaꞌan‑s nuu‑n nax n‑kida‑s. Xaꞌa kuu xa kachitnuꞌu ñaꞌa‑da, Dito.”

31 Xakuaa ijan xndeka soldado jan Spalu vaxi ñuu nani Antipatris ná n‑taꞌu tniu comandante. 32 Kɨu kuu uu, n‑ka nangondita soldado ka xika xeꞌe, te soldado xyodo caballu, dani ka kixi‑s xiꞌin Spalu. 33 Nu n‑ka kixee‑s Cesarea, xndeka‑s Spalu juaꞌan nuu gobernador, te n‑ka xiaꞌan‑s carta jan. 34 Nu n‑yaꞌa xa n‑kaꞌu gobernador carta jan, n‑xijan tnuꞌu‑s nde se kuu Spalu. Nu n‑teku‑s xa se Cilicia kuu‑s, 35 xiaꞌan‑s nuu‑s:

—Na kixi koio se n‑ka xajan kuechi‑n, ijan dada kadandaa‑r kuechi‑n —kuu‑s.

Ijan dada n‑taꞌu tniu‑s xa kɨndiꞌu Spalu ɨɨn cuartu veꞌe Herodes, se n‑taxnuni, te na kundee ñaꞌa soldado.

<- Hechos 22 Hechos 24 ->