Exodus - Oputawanana 17

Waira kirei i opu

1 [a]Mai Israel mutulua Sin i netawanei, ma mepa Bada i ririweia nanare kampa i mae-nae. Taui au Rephidim i rauḡaravu, wate kampa eḡa waira da rava ita uma. 2 Anina ma taui Moses maiteni i viparipariniḡai i pa, “Waira ma verelai da ana uma!”

Ma Moses i paribelei, “Aiwai aubaina o paripariniḡaieu? Aiwai aubaina Bada o raraudadani?”

3 Wate rava nuanuai i arelana-kauei waira aubaina ma Moses i eni i pa, “Aiwai aubaina Egyptei u tere-opunelai da natunatuiai ma ai ḡamoḡamo maiteni nuarelana ana iraḡelei?”

4 Ma Moses i paritoutou Bada awarina i pa, “Aiwai ana kauei wei ravai awarii? Taui ḡaimei marina ina viraḡeniu.”

5 Bada Moses i paribelei, “Israel babadai ḡelaui ma taravaini ma kwapu taunei Nile u raviravia ma vaia ma ma vinao. 6 Tau kampa au naom au kira ana maimairi au Horeb. Kira ma ravi da waira ina opu da rava ina uma.” Ma Moses nanare i kauei Israel babadai au matai. 7 Moses wei dobuna i ḡorei Massah [b]ma Meribah, [~3~] aubaina weka mai Israel Moses maiteni i viparipariniḡai ma Bada i raudadani maranai i riwa, “Bada weka tauta maiteni bo eḡa?”

Mai Israel ma mai Amalek i viḡaiḡaiawa

8 Mai Amalek i nei ma Mai Israel maiteni i viḡaiḡaiawa au Rephidim. 9 Moses Joshua i riwei, “Rava ma vinei da ona nae mai Amalek maiteni ina viḡaiḡaiawa. Au maratom tau ola au tepana ana mairi ma God ana kwapu ana vovojijini.”

10 Ma Joshua mai Amalek maiteni i viḡaiḡaiawa me Moses i ririweia nanare. Moses, Aaron ma Hur i ḡae ola au tepana. 11 Maranai Moses urana ana kwapuna i voepai mai Israel i vivirewapana wate maranai urana i teretere-ḡairei mai Amalek i vivirewapana. 12 Moses urana i garigari ma Aaron ma Hur ḡaima i neiai da i terei ma au tepana Moses i kiala. Aaron ma Hur, Moses au ririvana i mae, tagogi au navanavana ma ḡelauna au navanavana ḡelauna ma urana i voepai ma i vojijini da madeḡa i neulai. 13 Ma Joshua ana sorodia maiteni Amalek ai sorodia sodiei i vovaiubai.

<- Exodus - Oputawanana 16 Exodus - Oputawanana 18 ->