Samuel Viruaina 7

Bada parivainuaḡana i kauei David maiteni

1 Ma Bada David i gagaloei ma nanare ana ḡavia anatapui i vovaiubai. Ma ana nuaubana i mae. 2 Ma David peroveta Nathan i riwei i pa, “Tau numa vigulauna, ai cedei voavoana a maemaeni wate God ana parivainuaḡana bokisina au numa gara e mamae.”

3 Nathan i paribelei, “Aiwai e notanotaia ma kauei aubaina Bada i mae-ratuim.”

4 Wate lamna waguvaraina Bada Nathan i riwei i pa, 5 “Ma nae ma au taunola David ma riwei ma pa, Bada wei e ririwei ‘Eḡa tam numa ma voai da Tau au animae.”

8 Bada i riwa me, i pa, “Au taunola David ma riwei, ‘Bada vivirewapana kaukauana wei i riwei:

Tam au naona ravarava ota sipu u paipaini au wapu, wate Tau a terepaim da mai Israel ai bada. 9 Mepa u nenelana, Tau tam a mae-ratuim ma au matam am ḡavia anatapui a pupuna-pai. Ma marina wavam ana voepai, me rava wavai naenaei au dobu. 10-11 Ma au rava Israel dobu ana verei da ina raunuma ma ana nuaubai ina mae. Au naona i vivikareiana da marina babada a terei da mai Israel ita vibadei, wate rava apoapoei taui i viḡaviei ma marina amapo ega ina kauana-melei. Tau Bada a ririwem da am epaepaia ana vimaḡai ma tam ma am epaepaia ona vivigulau.

12 [~1~]Ma am epaia tagogi ana vinei, tam natuoim tagogi da ina vigulau maranai tam am mara damona ina ḡetai da amamam ma votagoi. Ma tauna ana kauei da ina vibada ḡaeḡaena, 13 ma ega aiai ana vigulau ina vaitawanei. Ma tauna tempol ina voai Tau aubaiu, 14 Tau ina viamaneu ma tauna ana vinatunei. Ma maranai i kauana-boai, ana kovoḡi me ama natuna e kovokovoḡi nanare. 15 Wate eḡa melanai au nuavaina awarina ana vaitawanei me Saul awarina a vaitawanei, tauna ana vigulau a vaitawanei ma epaiana tam a terem. 16 Am numa ravai rereḡana eḡa melanai ina kwa ma am epaepaia ina vigulau ma ina vibada nonoa.”

17 Ma Bada aiwai Nathan ana au rauboni i riwei anatapuna David i pariverei.

<- Samuel Viruaina 6 Samuel Viruaina 8 ->