17 Maranai tauna Elijah i ʼnanai ma i riwa, “Wei tam bo, mai Israel rauaḡaiḡaii amai?”

18 Elijah i paribelei, “Tau eḡa ata rauaḡaiḡai au Jerusalem, wate tam, ma amam ana numa ravai maiteni o rauaḡaiḡai. Taumi Bada ana tarawatu o geduaiei, ma Baal kokoitaui o viviborumei.” 19 Marina mai Israel anatapui ma ḡorei da ina nae au ola Carmel ina nebeleu. Baal ana peroveta 450 ma Asherah god wavinena ana peroveta 400 Jezebel ana au aboma e amam, anataputapui ma neiai.

20 Ma Ahab mai Israel anatapui ma Baal ana peroveta i ḡorei da au ola Carmel ina vinenebelana. 21 Elijah patara au naoi i mairi ma i riwei, “Wei vinua-raḡaraḡai mara aiwai ina kwa, ona vinuanaina nae ma ona vianuanaina nei, metauna notana ona vaia? Mepa da Bada God, tauna ona raudunelei. Mepa da Baal god, tauna ona raudunelei.” Wate rava eḡa aiwai ita riwei.

22 Ma Elijah taui awarii i riwa, “Bada ana peroveta anina tau a mamae. Wate Baal ana peroveta 450.[a] 23 Aubaita bull ruaḡa ona neiai, ma taui ai sia ina rautani ma ina bori muomuoi ma ai au tepana ina terei, wate eḡa ina ravivoai. Ma tau nanare ana kauei. 24 Ma taumi ona raupari ami god awarina, ma tau ana raupari Bada awarina. Metauna godna ai araratanei i paribelana tauna God ririwa kauana!” Ma rava anatapui i vianina.

25 Elijah Baal ana peroveta i riwei, “Taumi o maḡa aubaina ona vinao, Bull tagogi ona vinei ma ona vokaukauei. Ami god awarina ona raupari ma eḡa ai ona ravivoai.” 26 Ma taui ai bull i vaia ma i vokaukauei. Anina ma Baal awarina i raupari, ubaubanai i vikarei da i raviaubenai. Taui i garagarara, “Oo Baal, ma paribelelai!” Ma pulo aniapuna i arara kwaviviroi, Wate eḡa paribelana; eḡa aiai ita paribelei.

27 Aubenai Elijah i vikarei da i vimarumarui i pa, “Ona raupari guratana! Tauna god! Mepa da e rarauboni bo i nae au ririva bo e vaḡavaḡai bo e matamatave! Ona ravidagudagui!” 28 Ma taui garara i voguraguratei ma me ai au kaua nanare, naipiei ma aierei tupuai i boribori-melei ma tara i toitoi. 29 Taui i garagarara da i garagarara da aubigai pulo apuna ana mara. Wate amapo da eḡa paribelana, eḡa aiai ita paribelei, eḡa aiwai ita nonori.

30 Ma Elijah rava i riwei, “Ona nei awariu.” Ma anatapui i nei ma Elijah i mae-kwaviviroi, tauna Bada ana pulo aniapuna i voavoa-melei. 31 [~2~]Elijah ḡaima 12 i vaia, ḡaima tagogi da Israel ana dam tagogi aubaina. Wava Israel Bada taui noii Jacob i verei. 32 Ma ḡaimanei pulo aniapuna i voa-melei Bada viborumana aubaina. Ma au adana doba i ḡarai da waira ana ruva 14 Ltr nanare ina vojijini. 33 Pulo aniapuna au tepana ai i vatari, bull i bori-naiei ma siana ai au tepana i terei. Ma i riwa, “Nau 4 ḡaeḡaei waira ona vioai, ma sia ma ai au tepana ona iwaḡi.”

34 Ma nanare i kauei, ma i riwei, “Ona kauana-melei.” Ma nanare i kauei. Ma i riwei, “Mara vitonuina ona kauana-melei.” Ma nanare mara vitonuina i kauei. 35 Waira i toi ḡaira da dogo maiteni i vioai.

36 Ma aubigai pulo apuna ana mara i ḡetai, Elijah i babara-ḡae pulo aniapuna au ririvana ma i raupari i pa, “Oo Bada, Abraham, Isaac ma Jacob ai God, amadodo rava ma viatataiei da tam God au Israel ma tau am taunola, ma anatapuna u ririwei a kauei. 37 Bada ma paribeleu, Oo Bada ma paribeleu da rava ina aramei da tam, au Bada, tam anina God, ma marina rava orai e taitaina-melei awarim.”

38 Maratagogi Bada ana ai marei i ḡairai ma pulo bull, ai, ḡaima ma doa i aragibui. Ma waira i ʼwaiwaḡia i ḡuḡuva-pai.

39 Maranai rava wei i ʼnanai taui i mae-ḡaira au doa da i matave-taitaina ma i garara Bada awarina, “Bada anina God! Bada ainelana anina God!”

40 Ma Elijah rava i egari, “Baal ana peroveta ona vojijini; Eḡa tagogi ona voterei da ina ruba!” Peroveta anatapui i vojijini ma Elijah taui i riwei da i ḡairei au Kishon gaugaubana ma anatapui i viraḡeni.

41 Ma Elijah gulau Ahab i riwei, “Ma nae da ma am ma garewa ḡaeḡaena gugurana a nononori.” 42 Ma Ahab i nae da ita am ma Elijah i ḡae ola Carmel au tepana, ma i mae-ḡaira au doa ma kolana au ae-tutuna ma i raupari.

43 Ma ana taunola i riwei, “Ma nae ma au bogei ma inana.” Ana taunola i nae da i nememei Elijah awarina ma i riwei, “Eḡa aiwai ata inanai.” Anatapuna mara 7 i paritawanei da inana.

44 Ma mara vi-7-na i nememei ma i riwa, “Apau aburuna ana rata me oroto urana a inanai bogei i ḡeḡae.”