Ma nanare i mae. Madeḡa biaḡa garewa eḡa ita atuna, marapoi i ḡetai ma eḡa lam.

8 Ma Bada Elijah i riwei 9 “Laḡilaḡina ma nae au taon Zarephath, Sidon au ḡereḡerena‡ Bada Elijah i paritawanei au Sidon - kampa rava Baal i raudunelana-guratei. Wei lamna Ahab poiana orotona Ethbaal ana gabu, ma wei au marana, Elijah Ahab i raraugovaḡei. ma kampa ma mae. Kampa kaiababa e mamae, a riwei da ina viambagibagim.”

10 Ma Elijah i nae au Zarephath. Maranai i ḡetai taon ana au anirui, ma kaiababa i ʼnanai ai i ḡunaḡuna, ma i riwei, “A vivibaḡaim da waira aburuna uta neiai da ata uma!” 11 Ma i nenae vainana aubaina ma orotona i garara me i pa, “Ma palawa apuapunana aburuna maiteni uta neiai.”

12 Kaiababa i paribelana i pa, “Riwa kaua! Am Bada God lawalawaina ma wavanei a ririwa, tau awariu eḡa palawa apuapunana. Awariu palawa aburu kaimojina ma monamona aburuna. Ai a ḡunaḡuna da ana nae au numa ma lam damona ana vitavi da natu maiteni ana am ma au murina ana raumolaḡau da ana iraḡe.”

13-14 Wate Elijah kaiababa i riwei, “Eḡa ma vinuabola! Bada Israel ana God e ririwa, ‘Am palawa abomana eḡa ma monamona wagina eḡa ina kwakwava ma Bada garewa ina paritawaneiai da wapu ina gogo me!’ Anina ma nae au numa ma u ririwa nanare ma kauei, wate au naona palawa aburuna ma apui aubaiu. Ma mae-terenana ma apui aubaimi.”

15 I nae ma menanare Elijah i ririwei, nanare i kauei. Ma awari lam i mae da aupom biaḡa i kwa. 16 Ma me Bada Elijah i parivainuaḡani nanare palawa au aboma eḡa ita kwa ma monamona au wagi eḡa ita kwa.

17 Muriai kaiababa natuna i doria ma ana doria i vovoguratei anina ma i ʼraḡe. 18 Ma wavine Elijah awarina i riwa, i pa, “God ana taunola, Aiwai aubaina wei u kauei awariu? U nei weka da au ḡoʼapoapoe uta vieḡai ma natu uta viʼraḡeni bo?” § Nai marana rava i vitumaḡana da doria ma iraḡe lamna God ana kovoḡa ḡoʼapoapoe aubaina. Kaiababa i vitumaḡana da Elijah tauna ana au numa i mamae ma lamna Bada matana i taini awarina ma lamna i kauei da natuna orotona i ʼraḡe.

19 Elijah i paribelei i pa, “Natum ma vereu.” Elijah taubeu, alona au urana i vaia ma i avara-ḡaiei au vatavatara mepa i mamae lana ma ana au animatave i vimataveni. 20 Anina ma ponana i rata ma i raupari Bada awarina, “Oo Bada au God, aiwai aubaina kaua apoapoe kaukauana u kauei kaiababa awarina? Tauna i taravainiu da ana au numa a mamae, ma u kauei da natuna i ʼraḡe?” 21 Anina ma Elijah i taduru ma mara tonuḡa taubeu au tepana i matave ma ponana i rata ma i raupari Bada awarina i pa, “Oo Bada au God, A vibaḡaim da tevera ana lawana ma veremelei!”

22 Bada Elijah ana pari i nonori ma tevera lavutu i vikarei ma i lawana. 23 Elijah tevera i voepai ma i avara ḡairei alona awarina ma i riwei, “Ma inanai natum lawalawaina.”

24 Wavine i riwa, “Marina aramana-kauei da tam God ana taunola, ma Bada ana riwa gamomei e opuopu lamna riwa kaua!”

<- 1 Kings - Gulagulau Naona 161 Kings - Gulagulau Naona 18 ->