Israel ana Gulau Ahab

30 Omri natuna Ahab, ana ḡoʼapoapoe i rata guratana Bada awarina eḡa me gulau anatapui au naona i vivibada nanare. 31 Tauna i notai da lamna kaua labalababa da i ḡoʼapoapoe me Nebath natuna Jeroboam i kaukauei nanare. Wate tauna i kauana-guratei maranai mai Sidon ai Gulau Ethbaal natuna Jezebel i ravaḡi ma i vikarei da ai god Baal i raudunelei. 32 Ma Baal ana voepaepa gabuna pulo tauapuna au Samaria i voai ma au orana pulo aniapuna i voai. 33 Ahab god wavinena Asherah kokoitauna i vituramairini[a]. Ma kaua maḡamaḡaui i kauei da Bada, mai Israel ai God ita viamloḡaiḡaini, me mai Israel ai gulau au naona i kaukauei nanare.