Link to home pageLanguagesLink to all Bible versions on this site
4
Satan ŋondolꞌme Jisas
(Mak 1.12-13, Luk 4.1-13)

1 [~1~]Miꞌe pe, Yohe Yirise nal yerme Jisas nenge kin nal moi gungurar ŋaiye mitiŋ pakai pe, Satan ŋondolꞌme kin. 2 Jisas yukur ŋono ŋai nal tatame ŋup 40 pe, kin ŋasande nimbot. 3 Miꞌe pe, Satan natme kin pe, kin ŋaname Jisas na, “Ŋaiye nin talah tikin Got pe, ini lenge ŋeser eꞌe ka yimbilme yil tuꞌe ŋaiye kakah.” 4 [~2~]Kom Jisas nungwisme wusyep kin na, “Wusyep tikin Got ŋanange taꞌe leꞌe,

Lenge miyeꞌ tuweinge yukur ka yono ŋai ilyehme no,
ka yurp laip, pakai,
ka junde wusyep tikin Got topoꞌe.”
5 Miꞌe pe, Satan nambaꞌe kin nenge nal moi yirise Jerusalem pe, kin nember kin nanah yukoh yirise hlaꞌ supule. 6 [~3~]Pe kin ŋaname Jisas na, “Ŋaiye nin talah tikin Got pe, ni papalai e guh. Taꞌe na, wusyep tikin Got ŋanange taꞌe leꞌe,
Got se ka ini lenge walip hlaꞌ kin ŋaiye ka bepsime nin.
Tinge se ka syep yurpe nin yenge yunuh hlaꞌ,
pe yukur ŋeser ende ka se gere ŋihip nin.”
7 [~4~]Jisas nungwisme wusyep kin na, “Wusyep tikin Got ŋanange taꞌe leꞌe,
Yukur na ondolꞌme Got, kin Lahmborenge nin.”
8 Miꞌe pe, Satan nambaꞌe Jisas nenge nanah hwate dininde nanah hlaꞌ supule pe, kin ŋasambe Jisas moiye moiye lalme ŋaiye sai kekep eꞌe, topoꞌe ŋaiꞌe ŋaiꞌe bwore bwore titinge. 9 Satan ŋaname Jisas na, “Ŋaiye na asarꞌe ŋihipmbep risukwarme ŋam pe, ŋaiꞌe ŋaiꞌe lalme luku ma yule nin.” 10 [~5~]Jisas nungwisme wusyep kin na, “Satan! El angaꞌme ŋam. Wusyep tikin Got ŋanange taꞌe leꞌe,
Risukwarme Lahmborenge ŋaiye Got nin pe, ende wah me kin ŋilyeh.”
11 Taꞌe luku pe, Satan nasme Jisas nal pe, lenge walip hlaꞌ yate yungwisme kin.
Jisas ŋende wah ŋendehei kin ŋanar Galili ŋanange nalaŋatme wusyep kin
(Mak 1.14-15, Luk 4.14-15)

12 [~6~]Ŋupe ŋaiye Jisas ŋasande nange tinge si yarpe Jon yember yal yoto mwahupwaiꞌe pe, kin na ŋoto distrik Galili. 13 [~7~]Kin yukur narp nato Nasaret, kom kin nal narp Kaperneam. Moi Kaperneam kin sai sehei me pinip umun Galili nato kekep titinge bamtihei ŋaiye Sebulun hindi Naptali. 14 Ŋai uku kin ŋende bwore mise gande wusyep ende ŋaiye Got ŋanange nat mut profet Aisaia na,

15 [~8~]Lenge miyeꞌ tuweinge tikin kekep ŋaiye bamtihei Sebulun
topoꞌe lenge miyeꞌ tuweinge tikin kekep ŋaiye bamtihei Naptali pe,
kekep uku sai siheime ŋahwikin embere ŋaiye gande ŋoloh tikih,
topoꞌe kekep sai mih umbur Jordan. Luku kekep tikin distrik Galili pe,
lenge haiten syeꞌ yarp.
16 Lenge miyeꞌ tuweinge luku somohon yarp yepelmbe supule.
O tinge si yetekeꞌe yirise.
Lenge miyeꞌ tuweinge luku yarp yoto moi ŋaiye yepelmbe tikin nule,
kom yirise si naŋarꞌe gah tinge.
17 [~9~]Ŋup uku pe, Jisas ŋanange nalaŋatme wusyep ŋendehei kin nal lenge miyeꞌ tuweinge. Kin ŋanange na, “Yimbilme ŋoihmbwaip yip yusme hwap mune ŋaiye yip yende. Detale, lemame tikin Got si nat sehei miꞌe!”
Jisas gal lenge miyeꞌ hoye hoye pe, tinge jande kin

18 Jisas nanga pinip umun tikih Galili nal pe, kin ŋetekeꞌe lenge miyeꞌ toꞌ tataime hoi ŋaiye jite ŋuyoꞌ. Naŋ tinge hindi pe, Saimon ŋaiye tinge jalme Pita, topoꞌe toꞌ kin Andru. Tinge hindi yiche tem yal jah pinip umun ŋaiye ka jite ŋuyoꞌ pe, luku wah wuhyau tinge. 19 Jisas ŋana lenge hindi na, “Hindi yut topoꞌe ŋam. Ma yasam yip yaŋah ŋaiye pa yambaꞌ lenge miyeꞌ tuweinge.” 20 Nilyehe sai tinge yasme tem tinge jah yanar pe, tinge yal topoꞌe Jisas. 21 Jisas plihe nanga nal sikirp topoꞌe pe, kin ŋetekeꞌe lenge miyeꞌ toꞌ tataime hoi. Naŋ tinge Jems hindi Jon, tinge talah tikin Sebedi. Tinge yarp yal yoto loumbil pinip yotop yai tinge Sebedi. Tinge jerenge tem tinge ŋaiye ginir yarp pe, Jisas gal lenge. 22 Pe nilyehe sai tinge yasme loumbil pinip topoꞌe yai tinge pe, tinge jande Jisas yal.

Jisas ŋanange nalaŋatme wusyep, topoꞌe kin ŋende miꞌme wahriꞌ epwa lenge miyeꞌ tuweinge

23 [~10~]Jisas nalꞌe nalꞌe nato Galili distrik ŋanange nasamb lenge wusyep nal lenge miyeꞌ tuweinge gan nato yukoh jahilyeh wula wula. Kin ŋanange nalaŋatme wusyep bwore mise tikin lemame tikin Got, topoꞌe kin ŋende miꞌme wahriꞌ epwa lalme, topoꞌe ŋaimune pupwa ŋaiye ŋende yumbune wahriꞌ lenge miyeꞌ tuweinge. 24 Wusyep ŋaiye wah kin sisil nalꞌe nalꞌe nato provins Siria. Taꞌe luku pe, lenge miyeꞌ tuweinge yenge lenge mitiŋ ŋaiye wahriꞌ epwa tetehei ŋende yumbune tinge no, tinge yasande syohe pupwa. Lenge miyeꞌ tuweinge ŋaiye yipihinge pupwa gahanahme tinge, topoꞌe lenge mitiŋ ŋaiye yambaꞌe wahriꞌ epwa ŋaiye ŋihip syep dolndol no, tinge tambe. Topoꞌe lenge mitiŋ ŋaiye lupu tinge nule. Pe Jisas ŋende miꞌme wahriꞌ epwa tinge lalme. 25 Lenge miyeꞌ tuweinge wondoh embere titinge Galili, topoꞌe titinge distrik Dekapolis, topoꞌe titinge Jerusalem, topoꞌe Judia, topoꞌe titinge kekep ŋaiye sai nal umbur ŋaiye mih Jordan pe, tinge lalme jande kin yal.

<- MATYU 3MATYU 5 ->