HIBRU 3

Naŋ embere Jisas pe, kin taharꞌe naŋ embere Moses

1 Lenge Kristen toꞌ tatai ŋam, Got ŋaiye narp nanah moihlaꞌ si nalaŋatme yip pe, yip pa ŋoiheryembe Jisas, ŋaiye Got nember kin nat taꞌe aposel topoꞌe pris ondoh ŋaiye ŋoihmbwaip poi teŋeime no, poi manange moworꞌe member kin mal halhale. 2 [~1~]Kin naŋaꞌe ŋoihmbwaip kin supule nalme Got ŋaiye nalaŋatme kin nange ka ende wah uku. Pe ki ŋende wah bwore bwarme gande ŋasande tikin Got taꞌe ŋaiye somohon Moses ŋende wah ŋotop lenge miyeꞌ tuweinge tikin Got. 3 Miyeꞌ ŋaiye ŋahraꞌe yukoh bwore pe, kin nambaꞌe naŋ embere, kut yukoh yukur nambaꞌe naŋ embere, pakai. Kin ŋahilyeh taꞌe naŋ embere ŋaiye Got naŋaꞌe Jisas pe, ki ŋembere nengelyembe naŋ embere ŋaiye Moses nambaꞌe. 4 Yukoh ilyeh ilyeh pe, lenge miyeꞌ ilyeh ilyeh juhurꞌe. Kut Got ki ŋende ŋaiꞌe ŋaiꞌe lalme. 5 Ŋoihmbwaip Moses teŋeime Got pe, kin narp taꞌe miyeꞌ wah kin, ŋaiye ŋende wah bwore bwarme nal lenge miyeꞌ tuweinge tikin Got. Pe wah ŋaiye kin ŋende, ki nalaŋatme wusyep ŋaiye mindemboi Got ka ininge. 6 Kom Krais kin Talah bwore bwarme tikin Got ŋaiye ka bepteme lenge miyeꞌ tuweinge tikin Got. Poi eꞌe pe, poi miyeꞌ tuweinge tikin Got, ŋaiye ŋoihmbwaip poi ka teŋeime kin bongol, topoꞌe nye nyermbe poi ya mini lenge mitiŋ syeꞌ ŋaiye poi hriphrip marp meseperhme Got ŋaiye ka ende poi ya murp bwore.

7 [~2~]Taꞌe luku pe, Yohe Yirise ki ŋanange taꞌe leꞌe,

Ŋaiye pa yusyunde wonge tikin Got tukwini pe,

8 yukur pa yupwaiꞌe ŋoihmbwaip yip bongol tuꞌe lenge mwankaꞌ yip

ŋaiye somohon yende bwiliꞌe bwulaꞌe yengelyembe wusyep Got.

Ŋup uku ŋaiye tinge yarp moi gungurar pe,

tinge yondolꞌme Got yaŋaꞌe teket yalme kin.

9 Pe Got ŋanange na,

Nato wahtaip 40 ŋaiye tinge yarp moi gungurar pe,

ŋam mende mirakel wula wula ŋaiye tinge si yetekeꞌe,

kom tinge pwale teket topoꞌe tinge yondolꞌme

ŋoihmbwaip ŋumwaiye ŋam Got.

10 Taꞌe luku pe, ŋam tuhwarme lenge miyeꞌ tuweinge luku pe,

ŋam manange na,

Ŋoihmbwaip tinge yukur sai me ŋam.

Topoꞌe tinge jarnge ŋaiye ka junde wusyep ŋam.

11 Ŋam tuhwar pe, ŋam mana lenge taꞌe leꞌe,

Bwore mise, yip yukur pa yi yoto moi bwore ŋam

ŋaiye pa yambaꞌe yohe.

12 Lenge Kristen toꞌ tatai ŋam, ŋoihme ŋaiye lahende yip iki, ŋoihmbwaip kin ka pupwa supule, topoꞌe ka osme ŋoihmbwaip mise kin ŋaiye teŋeime Got no, ka el wohme Got ŋaiye narp laip nye nyermbe. 13 Nye nyermbe ŋup ilyeh ilyeh pa yininge wusyep yende bongolme yiptip yile yut junde wusyep ŋaiye Got ŋanange na, “Ŋup tukwini leꞌe.” Taꞌe luku pe, ŋoihme ŋaiye ŋoihmbwaip pupwa yip ka ende yumbune yip no, ka upwaiꞌe ŋoihmbwaip yip bongol no, pa yaŋaꞌe teket me Got. 14 Ŋup ŋendehei ŋaiye ŋoihmbwaip poi teŋeime Krais pe, ka teŋeime kin bongol supule. Topoꞌe poi ya mende ŋoihmbwaip poi uku ka teŋeime Krais bongol el tutume ŋaiye ya mule.

15 [~3~]Wusyep uku ŋaiye sai nato tup ŋanange na,

Ŋaiye pa yisyunde wonge tikin Got tukwini pe,

yukur pa yupwaiꞌe ŋoihmbwaip yip bongol

tuꞌe ŋaiye mwankaꞌ yip yende

ŋupe ŋaiye tinge yende wachaih yalme Got.

16 [~4~]Lenge miyeꞌ tuweinge ŋaiye Moses nenge lenge tas nasme Isip pe, tinge yisande wonge tikin Got, kom tinge yende wachaih yalme kin. 17 Lenge miyeꞌ tuweinge ŋaiye tinge yende hwap pe, Got tuhwarme tinge nal tatame wahtaip 40 pe, tinge yule yanar moi gungurar. 18 Kom Got ŋanange wusyep bongol uku nalme lenge miyeꞌ tuweinge ŋaiye yengelyembe wusyep kin, nange yukur tinge ka yil yoto kekep uku ŋaiye kin si nangang lenge ŋaiye ka yambaꞌe yohe. 19 Taꞌe luku pe, poi metekeꞌe taꞌe ŋaiye lenge miyeꞌ tuweinge luku yukur yaŋaꞌe ŋoihmbwaip tinge yalme Got no, ka yi yoto moi uku ŋaiye Got si nalaŋatme ŋaiye ka yambaꞌe yohe.

<- HIBRU 2 HIBRU 4 ->