KURINṮH̱UUS SU/ 9

To jin C̱inu mo gom Imandhunu ki She/ ki Dhelel Dhelel mo

1 A’di yisa ta gwo jin miga/ mii i’kwar mo gom um mo gom to jin c̱inu ki me’d mo gom uni kun dhunu ki she/ ki dhelel dhelel mo. 2 Haali/ aha/ mishkina miim bum jin iskina um mo, a’di jin karkika/ ’ba/ ki ca mo gom um mo ibwambori ’Kwani gi Pam Makiduniyya mo mmo/o gwo mo ki ’Kwani gi Pa Aḵaa/iya uni ’kokin mo mmothoson is buni mo ’peni yil kagush mo. Dhali miim bum jin shwa uma nyor ki thiṯẖ tani a’di merki unin tiya is ka woho/ mo be. 3 Hili aha/ hashkina iwaḵ mo, wakan ki ’bam bam gun dhuna aman ki ca mo gom um mo tani minu ’koki nyo/ ki p̱e’th eya yir yansan mo be, wakan ki um mini thoson is mo me’d gwo jin okika/ gom um mo jin midi ’taki di moyi. 4 Isi ciki/ waḵki/ ’kwanin tiya ’peni Pam Makiduniyya mini p̱u’dku/ mo nyaḵki/ aha/ mo dhali gam um ki um ’koki thoson is mo tani aman minu dhu ki mon’the is mo, mmomol ’twaŋ kamu/ o mo gom um mo, gom mo jin wuna aman um jwa i is kan mo be. 5 Wakan aha/ ṯoshkina ki a’di ta mii jin minu mii mii mo mmodhuki iwaḵ ’pen mo mmo/ii mo e um mo nṯwa/a/ ki aha/ mo dhali thoson nṯwa/a/ mo gom to jin c̱inu ki me’d mo jin ona um gwo is mo, wakan ki a’di minu thoson is mo, yisa mmoḵana ḵan ki ’bi’th mo gom a’di mo hili ki bwa jin c̱iki to ki me’d mo be.

6 ’Kup̱ gwo a’dihe/ be. A’di jin siki to ki gwa’d gwa’d mo tani a’di si’da/ midi ’ciṯẖ to jin gwa’dagwa’d mo dhali a’di jin siki to ka enthus mo tani a’di si’da/ midi ’ciṯẖ to ka enthus mo be. 7 Aris ’kwani ’baar ka ’deṯe/ ’deṯe/ mo mini mii to gun dhukina uni eya dum buni mo, yisa ki is jin iriŋkunu mo walla ki mo jin rukunykunuwa rukuny mo haali/ Arumgimis enki uni gun c̱i to ka ’ka’d me’di is mo be. 8 Dhali Arumgimis mishi um ṯe mo ka ris mom’bor mii e mo jin isha to ka enthus mo be. Wakan ki um isa yempa/ takin gi to jin ’koshi jwa mo ’pena ris to ’baar mo dhali wakan si’da/ um mini ṯe aris mii gun ishin ka enthus goma ris miim ’borga/ mo be. 9 Me’d gwo jin ’kwarkunu mo ki:

A’di yeḵki to mo isa dhana/ mo, a’di c̱iki to mo gom uni gun hatha’ko’d mo.

Momii ma ḵar/em piti a’di ’dimki ’kup̱ mo gom mii jin ’konu ki sule/ mo be.

10 A’di jin c̱iki’da ḵa’bany to ka mansi to mo dhali tonṯe/ goma manshwa to mo tani a’di midi thip̱a thip̱ mo dhali mara ḵa’bany bum is mo dhali ganan mondhe’d bum jin ta mii ma ḵar/e mo be. 11 Dhali um minu saka’th mo eya ris bwayi ’baar mo ki ’twaŋkal kuku/ mo gom dhan tony caaga/ kun c̱ina um ki me’d mo, a’di jin minu wagas ki am mo gom mo jin c̱inu a’bor bwa i is mo goma Arumgimis mo be. 12 Haali/ gom mii yansan jin miikunu mo tani yisa jasi goma thip̱ kun thip̱u ki to gom uni gun dhunu ki she/ gom to gun hara uni mo yisa hili si’da/ gom mo ka ris kun c̱inu a’bor bwa i is mo goma Arumgimis mo kun sokin ki sho’k buni mo be. 13 E bwaŋ’kwariny mo yansan jin nyo/u mo gom mo jin miinu to mo tani um mini kara Arumgimis ki ca mo gom gwo jin hana um e mo mmomii mo gom monyiṯẖ jin nyiṯẖkina um gwom ’borga/ ma Ḵrisṯẖos mo dhali gom to jin c̱ina um ka ’ka’d me’di is mo gom uni mo dhali gom cin tiya ’baar mo si’da/. 14 Dhali me’d jin ’kosha ḵwa/a/ uni gom um mo dhali ’tho gom um mo haali/ goma ’the ma Arumgimis jin bononi mii mo jin di e um mo. 15 Mom’bora ’bor bwa i is mo eya Arumgimis mo gom to jin c̱iyunu ki me’d mo jin c̱ina a’di mo a’di jin molu kolol mo be.

<- KURINṮH̱UUS SU/ 8 KURINṮH̱UUS SU/ 10 ->