LIPA ORA SIRIMU 5

5:1-5

Jonone Boku Se Tambu Siringimu Kanorumu Semanemo

1 Pe na kanorundu kinia ye nokoli kingimunga polona molorumu yemo yunga ki-lomekondo boku kimboli se lierimu kanorundu, akumunga olakondo maniakondo pea imbi mare molopa, wale yopoko-pakara wakaya leko tambu siringi. 2 Kanorundu kinia angello enge nili se molorumu kanumuni tondolo ru nimba nimbale: “Yombo nawe molopa kondolemomone boku wakaya leko tambu siringima manda wendo limbaye?” nirimu. 3 Aku-na-kolo mulu-koleana kepe mana kepe mana sukundu kepe yombo sene manda wendo lipa, sukundu imbi molorumuma manda kanomba yombo se molopa paa kondolemo yombo se naa molorumu. 4 Kanu-kinia yombo molopa kondopale manda bokumu wendo lipa kanomba yombo se naa molorumumunga kanopole na kola awisili serindu. 5 Kanu-kinia ye nokoli towapu selu moloringimanga sene nando nimbale: “Kola naa séa! Piliei! Juda Talapemonga Lopa-Posi LLayono, ye nokoli kingi Depitini kalopa liltimu yemo, yuni enge nimba opa-toumu ⸤kamu⸥ topa mania mundorumu. Ye akumu molopa paa kondolemomone boku wakaya lieli yopoko-pakara manda wendo lipa sukundu kanomba.” nirimu.

5:6-10

Jonone Sipisipi Walomo Kanorumu Semanemo

6 Kanu-kinia na kanorundu kinia Kongi Sipisipi Walo se ⸤gilierimu⸥ kanorundu. Yu kongi sipisipi toko kondoko taltolemele mele yu aku sipa molopa, yu ye nokoli kingi polona awi-suku-singina gilierimu. Méle konde mololi kise kinia ye nokoli towapu kinia yu liku sukundu munduku ono molko makaye seringi. Yunga pengena ola kongi kao ungú mele yopoko-pakara wendo omba gilipa, mongo yopoko-pakara gilierimu, kanu mongoma Pulu Yemo yunga mini yopoko-pakara yuni ma-koleamanga pali lipa mundorumu akuma. 7 Kanu Kongi Sipisipi Walomo yu omba ye nokoli kingi polona molorumu yemonga ki-lomekondo lierimu bokumu liltimu. 8 Liltimu kinia méle konde mololi kise kinia ye nokoli towapu kinia yunga kumbikerena mania pungu tamalu peringi. Ono yu-mele-mele gita mele mare ambolko, pellete kou-gollone seli, akuna paura kaloringi kinia muna paa torumu pauramo peke liepili amboloringi. Aku paurama Pulu Yemonga yombomanga pali Pulu Yemo popo toko mawa selemele unguma. 9 Onone konane konde se ningu ninguli:

“Nu toringi kinia

yombo ungu lupa lupa lielima kinia,

kangi lupa lupa gilielima kinia,

talape lupa lupama kinia,

kolea lupa lupa molemelema kinia,

nunga mememone

Pulu Yemo kinia kopu seko molonge aulkamo

akisinderinu akumunga

nuni boku manda liku wakaya lielima wendo lini.

10 Nuni ‘Kanu yomboma olionga Pulu Yemonga

kongonomo sendangi!’ ningu

‘Pulu Yemonga popo tondoli yombo

Pulu Yemo ononga ye nokoli kingimu molopa

ono nokomba yombo talapemo molangi!’

ningu serinu, akumunga

ono ye nokoli kingima molko

ma-koleana mélema nokoko molonge.”

niringi.

5:11-14

Sipisipi Walomonga Imbi Ambolko Paka Tondoko Kape Niringi Semanemo

11 Pe kelepo kanorundu kinia angello paa awisili ungu niringi unguma pilierindu. Angelloma kambu tolemolánje tausini kelepo olandopa tausini nimbu, milliono kelepo olandopa milliono nilimolá. Akuma ye nokoli kingi polomo kinia méle konde mololi kise kinia ye nokoli towapu kinia liku kakapu seko sukundu munduku moloringi.

12 Aku angellomane tondolo munduku ninguli:

“Sipisipi Walo u toko kondoringimundu

yombomane pali ninguli:

“Yu yomboma nokomba tondolomo kinia

yu kamako molomba méle peanga-peanga

awisili kinia pilipa kondolimu kinia engemo kinia

yu-kinia pepa manda sepa,

yunga imbimu paa ola molopa,

tondolo pa sélimu yu-kinia pelemo.” ningu

yu ange ningu kape ningí kinia papu.”

niringi.

13 Kanu-kinia mulu-koleana molemele mélema kepe, mana molemele mélema kepe, mana sukundu molemele mélema kepe, nomu-kusana molemele mélema kepe, koleamanga pali molemele mélemane niringi mele pilierindu. Onone ninguli:

“Ye nokoli kingi polona molemo yemo kinia

Sipisipi Walomo kinia olondo

“ ‘Molko kondangili!’ nimbu alieli kape nimbu

imbimu paa olandopa molopa,

tondolo pa sélimu kinia

yomboma nokomba tondolomo kinia

kamu alieli-alieli olo-kinia pepa mindi pulimú pumbá.”

nimbu molamili!”

niringi. 14 Aku niringi kinia méle konde mololi kisene ninguli: “Paa aku sipa wendo opili!” niringi. Ye nokoli towapuni mania molko tamalu peko kape ningu olonga imbi ambolko paka tondoringi.

<- LIPA ORA SIRIMU 4 LIPA ORA SIRIMU 6 ->