HEBREOS 3

Ti Jesuse jaꞌ más tsots yabtel yichꞌoj, jaꞌ mu sta ti Moisese

1 Jaꞌ yuꞌun un, Quermanotac, ti lecubtasbiloxuque, ti icꞌbiloxuc yuꞌun ti Dios yoꞌ jech ta xacꞌotic ta yuꞌuntaque, tucꞌulanic lec ti Cristo Jesuse, ti jaꞌ jcholcꞌope, ti jaꞌ banquilal pale yuꞌun ti cꞌusi jchꞌunojtique. 2 Ti Jesuse jun yoꞌnton ta stojol ti Diose, jaꞌ ti Buchꞌu iꞌacꞌbat ti yabtel yoꞌ jech iꞌoch ta banquilal palee jech chac cꞌu chaꞌal ti Moisese jun yoꞌnton laj sventainbe scotol sna ti Diose. 3 Jaꞌ yuꞌun un, ti Jesuse jaꞌuc ti más to ichꞌbiluc ta muqꞌue. Jaꞌ me yamaluc scꞌoplal ti Moisese. Yuꞌun ti jun jmeltsanej nae jaꞌ más ichꞌbil ta mucꞌ. Yan ti nae yamal scꞌoplal. 4 Yuꞌun ti jujubej nae, scꞌan ti oy buchꞌu ta smeltsan. Jaꞌ noꞌox jech xtoc, scotol ti cꞌusitic oye, jaꞌ laj xa smeltsan ti Diose. 5 Jaꞌ jech ti Moisese, lequil jtunel laj sventainbe scotol sna ti Diose. Ti jech itun taje, jaꞌ ti ta scꞌajꞌalbe scꞌoplal ti cꞌusi tsꞌacal to ta xal ti Diose. 6 Pero ti Cristoe, lequil Nichꞌonil laj sventainbe sna ti Diose. Ti sna taje, jaꞌ ti voꞌotique mi jun coꞌntontic oe, mi mu xijchibaje, mi xijmuyubaj noꞌox ta smalael ti cꞌusi jmalaojtique.

Ti scuxobil yoꞌntonic ti snichꞌnab Diose

7 Jech o xal un, scꞌan ta xatsꞌetan achiquinic ta yaꞌyiel ti cꞌusi ta xal ti Chꞌul Espíritu ti tsꞌibabil ta scꞌop Diose:

Ti mi voꞌoxuc ta xavaꞌiic ti cꞌusi ta xal ti Dios avi tana lie,

8 mu xayijubtas avoꞌntonic jech chac cꞌu chaꞌal laj spasic ti amolmucꞌtotic ta voꞌnee,

ti jaꞌ noꞌox lic scꞌacꞌal yoꞌntonique,

ti laj sqꞌuelbeic yoꞌnton ti Dios ta xocol banomile.

9 Yuꞌun jech laj yal ti Diose: “Tey laj sqꞌuelbeicun coꞌnton ti amolmucꞌtotic ta voꞌnee,

acꞌo mi chaꞌvinic jabil tey laj yilic ti cꞌusi laj jpase.

10 Jech o xal un, tey liꞌilin yuꞌun ti cristianoetic taje.

Jech laj cal: Tey onoꞌox chꞌacal ti yoꞌntonic ta xanavique.

Mu scꞌan stamic ti jbee.

11 Jech o xal un, liꞌilin yuꞌunic.

Jaꞌ jech xtoc laj cacꞌ que ti mu xchiꞌinicun ta cux oꞌntone”,

xi ti Diose, xi ti Chꞌul Espiritue.

12 Quermanotac, qꞌuelo me abaic ti mu me buchꞌu junucal avuꞌunic ti toj chopol yoꞌnton ti ta xchꞌac sbaic ta stojol ti cuxul Diose ta scoj ti mu xchꞌune. 13 Jaꞌ tscꞌan ti ta xatsatsubtasbe aba avoꞌntonic ta jujun tal ti jujun cꞌacꞌale yoꞌ to yorail avi liꞌe. Jaꞌ jech ta scꞌan taje, yoꞌ jech muꞌyuc buchꞌu junucal avuꞌunic ta xlajic ta loꞌlael yuꞌun ti mulile, ti tey xlic ti scꞌacꞌal yoꞌntonique. 14 Yan ti mi staoj yav jpatoj coꞌntontic xijcham xijlaje jech chac cꞌu chaꞌal ta sliquebale, jech o xal umbi, ta xijꞌacꞌbatotic jech chac cꞌu chaꞌal laj yichꞌ ti Cristoe.

15 Jech o xal jech ta xal ti Chꞌul Espíritue:

Ti mi voꞌoxuc ta xavaꞌiic ti cꞌusi ta xal ti Dios avi tana liꞌe,

mu xayijubtas avoꞌntonic jech chac cꞌu chaꞌal laj spasic ti amolmucꞌtotic ta voꞌnee ti jaꞌ noꞌox lic scꞌacꞌal yoꞌntonique,

xi. 16 ¿Buchꞌu scꞌoplalic xcaltic yaꞌyel taje ti laj yaꞌiic ti scꞌopojel Diose, ti tsꞌacal to lic scꞌacꞌal yoꞌntonique? Jaꞌic ti buchꞌutic iloqꞌuesatic talel yuꞌun ti Moisés ta Egipto banomile. 17 ¿Buchꞌu scꞌoplalic xcaltic yaꞌyel taje ti ilinem ti Dios ta stojolic chaꞌvinic jabile? Jaꞌic ti buchꞌutic laj saꞌic ti smulique. Jaꞌ yuꞌun un, tey chamic ta xocol banomil. 18 ¿Buchꞌu scꞌoplalic ti iꞌalbatic yuꞌun ti Diose ti mu xꞌochic ta cux oꞌnton schiꞌuque? Jaꞌic ti buchꞌutic laj stoy sbaique. 19 Ta xquiltic xtoc un ti muꞌyuc xꞌochic ta cux oꞌntonale, yuꞌun muꞌyuc laj xchꞌunic ti Diose.

<- HEBREOS 2 HEBREOS 4 ->