ROMANOS 3

1-2 Ti xꞌelan icale, mu me xanopic ti mu cꞌusi balotic o ti juriootique, ti quichꞌojtic circuncisione. Bal tajmec yuꞌun voꞌotic baꞌyi icaꞌitic li scꞌop Rioxe. 3 Acꞌu mi oy bu mu xchꞌunic li jqꞌuex jchiꞌiltactic lavie, pero oy to jlom ta xchꞌunic ti tsꞌacal jchꞌieletique yuꞌun yech onox yaloj ti Rioxe. 4 Ti Rioxe mu snaꞌ snop cꞌop. Voꞌotic li jnopcꞌopotique. Ti Rioxe tsꞌibabil onox scꞌoplal:

Ta onox xvinaj ti yech li cꞌusi chavale.

Mu xuꞌ tsaꞌ amul li crixchanoetique,

xi tsꞌibabil.

5 Oy jlom chalic mi ta la jsaꞌ jmultique, yuꞌun la chcacꞌtic iluc ti más lec yoꞌon ti Rioxe. Mi más ivinaj ti lec yoꞌone, mu xa la yechuc smelol mi chacꞌ casticoe. Yan mi chacꞌ casticoe, yuꞌun onox la chopol sjol biꞌa. 6 Pero mu yechuc. Ti yechuc li cꞌusi chalique, ti Rioxe mu xal ti oy jmultic ti yechuque yuꞌun coꞌol xchiꞌuc lec chaꞌi yaꞌel li mulil biꞌa.

7 Ti yechuc li cꞌusi chalique, mi ta jnoptic cꞌope, más to chcacꞌtic iluc ti yech ti cꞌusi chal Riox ti yalojique. Ti jaꞌuc yech ta jpastique, mu xuꞌ chal ti Rioxe ti oy jmultic mi ta jnoptic cꞌope. 8 Ti jaꞌuc yeche, acꞌu jpastic li cꞌusi chopole yoꞌ jtatic o cꞌusi lec ti yechuque. Oy jlom chalic ti jaꞌ yech chichanubtasvanoticotique, pero naca noꞌox tsaꞌ jmulticotic. Ti muchꞌutic jaꞌ yech chalique ta onox xichꞌic castico.

Jaꞌ liꞌ yaloj ti muc muchꞌu lec yoꞌone

9 Yechꞌo un mu xuꞌ xcaltic ti voꞌotic más lecotic ti juriootique. Yuꞌun ical xa avaꞌiic ti jcotoltic jmulavilotique, acꞌu mi voꞌotic, acꞌu mi yan crixchanoetic. 10 Jaꞌ yech tsꞌibabil ta scꞌop Riox chac liꞌi:

Mi jun crixchano muc bu lec cꞌusi tspas.

11 Muc muchꞌu pꞌij,

muc muchꞌu ti oy ta yoꞌon ti Rioxe.

12 Chꞌaybeijemic yaꞌel scotolic.

Jaꞌ noꞌox tspasic li cꞌusitic chal yoꞌonique.

Mi jun muc muchꞌu ti lec cꞌusi tspase.

13 Muc muchꞌu ti lec cꞌusi chale.

Li yeique tu yaꞌel, coꞌol xchiꞌuc muquenal mi muc bu lec macbile yuꞌun jaꞌ chloꞌlovanic o.

Oy yaꞌlel yeic yaꞌel, coꞌol xchiꞌuc yaꞌlel ye quiletel chon.

Yuꞌun chmilvanic o yaꞌel li cꞌusitic chalique.

14 Naca chopol li cꞌusitic chlocꞌ ta yeique.

Jaꞌ chvinaj o ti tol xacꞌ scꞌacꞌal yoꞌonique.

15 Batsꞌi jtijic ta cꞌop, mu stsꞌic yuꞌunic.

Xuꞌ xa chaꞌiic ti xmilvanic ta orae.

16 Buyuc noꞌox baticuc ta sliquesic cꞌop.

Abol sba yuꞌunic li crixchanoetique.

17 Mu snaꞌ xcꞌuxubinvanic.

18 Mu xiꞌic o ti Rioxe,

xi tsꞌibabil.

19 Ti xꞌelan tsꞌibabil ta scꞌop Rioxe, jnaꞌojtic ti jaꞌ jcꞌoplaltic uque, voꞌotic li juriootique, yuꞌun jaꞌ yechotic uc acꞌu mi voꞌotic quichꞌojtic comel li smantaltac Rioxe. Yechꞌo ti muc muchꞌu xuꞌ chal ti chꞌabal smule. Jcotoltic oy jmultic ta stojol ti Rioxe. 20 Li smantaltac Rioxe maꞌuc chꞌabal o jmultic chiyilotic ti Rioxe yuꞌun jcotoltic mu xchꞌun cuꞌuntic. Ti iyal smantaltac ti Rioxe, jaꞌ yoꞌ xquiltic o ti oy jmultique.

Jaꞌ liꞌ yaloj ti chꞌabal smul ch-ileic yuꞌun Riox li muchꞌutic xchꞌunojic ti jaꞌ istoj jmultic ti Jesuse

21-22 Li smantaltac Rioxe jnaꞌojtic xa ti maꞌuc chꞌabal o jmultic chiyilotic ti Rioxe. Istsꞌibaic onox comel ti Moisese xchiꞌuc ti yan yajꞌalcꞌop Riox ti ta más voꞌnee ti ta xtal ti muchꞌu ta stoj li jmultique. Scotol ti muchꞌutic ta xchꞌunic ti jaꞌ istoj jmultic ti Jesucristoe, jaꞌ chꞌabal o smul ch-ileic yuꞌun ti Rioxe. Muchꞌuuc noꞌox, muc ta alel. 23 Yuꞌun jcotoltic oy jmultic. Mi jun muc muchꞌu lec yoꞌon. Stuc noꞌox lec yoꞌon ti Rioxe. 24 Yechꞌo un ta slequil noꞌox yoꞌon ti Rioxe ti ta matanal noꞌox ti chꞌabal jmultic chiyilotique. Jaꞌ ti istoj jmultic ti Jesucristoe. 25 Ti Rioxe snopoj onox ti jaꞌ tstojbe smul scotol crixchanoetic ti Xchꞌamale. Ti muchꞌutic ta xchꞌunique chꞌabal smul ch-ileic yuꞌun ti Rioxe. Ti xꞌelan snopoj onox ti Rioxe, muc xꞌacꞌbat stoj smulic ti muchꞌutic ixchꞌunic ti cꞌalal mu toꞌox chtal chamuc ta cruz ti Xchꞌamale. Ti cꞌalal istoj scotol jmultic ti Xchꞌamale, iyacꞌ iluc ti Rioxe ti lec onox ti cꞌusi ispase ti muc xꞌacꞌbat stoj smulique. 26 Jaꞌ noꞌox yech lavie chvinaj ti lec cꞌusi tspas ti Rioxe ti chꞌabal xa jmultic chiyilotic voꞌotic ti jchꞌunojtic ti jaꞌ istoj jmultic ti Jesuse.

27 Yechꞌo ti mu xuꞌ jtoy jbatique yuꞌun mu cꞌusi ijpastic, jaꞌ noꞌox ijchꞌuntic ti jaꞌ istoj jmultic ti Cajvaltic Jesuse. 28 Yuꞌun ical xa ti jaꞌ chꞌabal o jmultic chiyilotic ti Rioxe ti jaꞌ yech jchꞌunojtique, muc ta alel mi lec, mi chopol ti cꞌusi jpasojtique.

29 Ti Rioxe mu jtucticuc noꞌox cajvaltic voꞌotic li juriootique; jaꞌ yajval scotol crixchanoetic. 30 Yuꞌun jun noꞌox Riox chisqꞌuelotic ta jcotoltic. Muchꞌuuc noꞌox ta xchꞌun ti jaꞌ istoj jmultic ti Cajvaltic Jesuse, chꞌabal smul ch-ile yuꞌun ti Rioxe, acꞌu mi yichꞌoj circuncisión, acꞌu mi chꞌabal. 31 Lavi chꞌabal xa jmultic chiyilotic Riox ti jchꞌunojtic ti jaꞌ istoj jmultic ti Cajvaltic Jesuse, mu xa cꞌu stu li smantaltac Rioxe cheꞌe, mu xuꞌ xichiotic, yuꞌun xchꞌun xa cuꞌuntic. Jaꞌ chiscoltaotic ta xchꞌunel ti Cajvaltic Jesuse.

<- ROMANOS 2 ROMANOS 4 ->