HEBREOS 8

Jaꞌ liꞌ yaloj ti jaꞌ scuentainoj ti Jesucristoe ti cꞌusi tsꞌacal to iyal ti chiyacꞌbotic ti Rioxe

1 Jaꞌ yech xꞌelan ti totil pale ti tey chtun cuꞌuntic ta vinajele. Tey xa chotol ta sbatsꞌicꞌob ti Rioxe. Tey xa ichꞌbil ta mucꞌ. 2 Ti templo yoꞌ bu chtun ti paleetique spasoj crixchanoetic, seña noꞌox. Yoꞌ bu chtun ti Jesuse mu crixchanouc spasoj. Jaꞌ spasoj ti Rioxe, jaꞌ li vinajele.

3 Scotol li totil paleetique jaꞌ yabtelic chacꞌulanic chꞌichꞌ, jaꞌ smoton ti Rioxe. Jaꞌ noꞌox yech ti totil pale ti chtun cuꞌuntic ta vinajele iyacꞌ chꞌichꞌ uc. 4 Ti liꞌuc ta sba balamil ti Cristoe, muc xtiqꞌue ta totil paleal ti yechuque. Yuꞌun oy muchꞌutic ch-ochic ta totil paleal yuꞌun li jchiꞌiltactique ti chacꞌulanic chꞌichꞌe chac cꞌu chaꞌal chal li smantal Rioxe ti iyal ti Moisese. 5 Li templo liꞌ ta sba balamile yoꞌ bu chtunic li paleetique, seña noꞌox yuꞌun jaꞌ yech li vinajele. Jnaꞌojtic ti seña noꞌoxe yuꞌun jaꞌ yech iꞌalbat yuꞌun Riox ti Moisese: “Jaꞌ yech xameltsan chac cꞌu chaꞌal icacꞌ avil ta jol vitse”, xꞌutat. 6 Ti Cristoe más lec yabtel; mu xcoꞌolaj xchiꞌuc li totil paleetic liꞌ ta sba balamile. Yuꞌun jaꞌ scuentainoj ti cꞌusi tsꞌacal to iyal ti chiyacꞌbotic ti Rioxe.

7 Ti chꞌunuc onox cuꞌuntic ti cꞌusi baꞌyi iyal ti Rioxe, mu xa persauc cꞌusi iyal ta tsꞌacal ti yechuque. 8 Ti Rioxe iyil ti mu xchꞌun yuꞌunic mantaletic ti voꞌne moletique, yechꞌo ti jaꞌ yech iyal chac liꞌi:

Ta to la sta yora oy cꞌusi achꞌ ta xꞌalbatic ti amomique,

voꞌoxuc ti liꞌ nacaloxuc ta Judae xchiꞌuc ta Israele.

9 Ti cꞌusi ch-albatique, mu xa la xcoꞌolaj chac cꞌu chaꞌal iꞌalbatic ti voꞌne moletique ti cꞌalal iloqꞌuesatic tal ta mozoil ta Egiptoe.

Acꞌu la mi iyilic cꞌu xꞌelan icoltaatic loqꞌuel tal,

pero muc la xchꞌunic ti cꞌusitic iꞌalbatique,

yechꞌo la ti “tey acꞌu sqꞌuel sbaic”, xi ti Rioxe.

10 Ti cꞌalal sta yorae, jaꞌ la yech ch-albatic ti amomique:

“Ta avoꞌon xa noꞌox atuquic chachꞌunic li jmantale.

Voꞌon Avajvalicon, voꞌoxuc jchꞌamaloxuc.

11 Quichꞌtic ta mucꞌ ti Rioxe, mu xa xachiic

yuꞌun acotolic avichꞌojicon ta mucꞌ, ta biqꞌuit ta mucꞌ.

12 Chacaqꞌuic ta pertonal.

Jꞌechꞌel ta jchꞌay ta jol lamulique”, xi ch-albatic yuꞌun ti Rioxe,

xi tsꞌibabil. 13 Ti cꞌalal iyal ti oy cꞌusi achꞌ chale, yuꞌun mu xa xtun ti cꞌusi baꞌyi yaloje. Ti cꞌusi mu xa xtune, ta onox xchꞌay.

<- HEBREOS 7 HEBREOS 9 ->