Revelesen 7

Masxaxa xil laling simeleleen tei de rut mol‑Isrel xil

1 Dutou ni holesok xil ak, napus masxaxa hat (4) xa di lasoh ladi e rin hat (4) te ut etan. Xatel di latsikoe xol votiang hat (4) tengan linahui lelen ti holesok xil te ut etan, mu te tas, mu vatiei xil. [~1~] 2 E napus masxaxa sav teimun xa mea nggo rute xa meteneai di mistal en, e xi nggur xat siil xa his Hi xa meul da en. Xi mikei nggeih ba mi masxaxa hat (4) xa Hi tesa xeihen mi xil tengan lapurun ut etan del tas. 3 Masxaxa ak biteni bit, “Munapurun ti ut etan, tas mu vatiei xil ituxoh melele xa muling simeleleen e valnao moletin xil na Hi tengan ipisen ni xa labe nan.” [~2~]

4 E labiteni minou labit pupuluen na ngan xil xa latehur simeleleen na Hi latetuxoh moletin taosen be handred tei hanutap lu e hat mun (144,000). Labosei ngan xil ak langgo vatimol lu e le tei (12) na mol‑Isrel xil. [~3~] 5-8 Labosei moletin taosen lu e le tei (12,000) xa langgo vatimol xil kekes na mol‑Isrel xil ak: Sudah, Ruben, Kat, Aser, Navtali, Manase,[~4~] Simeon, Livae, Isekar, Sebiulon, Siosep, e Bensamin.

Moletin xil te rute xil vus te ut etan mei lamot mi Hi e lapet rat hisen

9 Di, naketeh ba, e napus vanut moletin xil xa labe holu xa labe holu pupu, xa moletin tovuol mikila vavuli sen xil vus. Xil lastal langgo hisit moletin savsav xil vus, langgo vatimol xil vus, langgo kantri xil vus, e langgo sepinien xil vus. Xil vus mei lasoh pe met ngan xa de von xeihen e pe met ngan xa nggoni sulut sipsip. Lasing ni eising xa mieh e laleh xat ut emeil xil di e hexil. [~5~] 10 E lakei be nesao labit, “!Mames Hi namem xa dotan de von xeihen e ngan xa nggoni sulut sipsip, vengan xalu di luteh meulien e xamem!” [~6~]

11 Melele taxa labiteni mak, masxaxa xil vus xa ladi xorelis von xeihen ak, elda xil, e neta hat (4) xa lameul ladi, xil vus lamot labe tan pe met Hi, valnaoxil ba duxoh tan e lamesi. 12 E melele xa masxaxa xil ak lamesi, xil vus labiteni labit,

“!Reitin li!

!Xamem mapet rat hisom,

e di masa memesien e merereen namem bat minuk!

Xouk obe eilep pupu e metisouen nam mahulong,

xeihen de hem e di olaxat kuh holesok xil vus.

Obe Hi namem

xosali e vehakut tang. !Reitin!”

13 Di, tei e elda xil ak mei misis nou bit, “?Moletin xil ak xa lasing ni eising xil xa mieh xiak, okila obit langgo xave?” [~7~]

14 E nabit rilomun ni mini, nabit, “Eilep navan, inou natakil ti. E xouk okila.” [~8~]

Ma xi biteni minou bit, “Moletin xil ak labe ngan xil xa latesoh texeih e neketen nae teha tetuxoh hoxalite te melele te xeih xil xa mahulong xa temei e ut etan. Xil latekas eising nae ni re ngan xa temat texoni sulut sipsip te sanien eo e eising nae mei temieh. 15 Ve rin ak, Hi maen xil mei lasoh pe meten. E vongien e melengien ladi e Nim Eo nan e di lamot mini. Reitin, di lamot mi ngan xa di dotan de von xeihen nan xa di milaxat kuh xil e di misikoe xol xil. [~9~] 16 Mae e maruru naxat ti mun xil, eai naxa pangas xil ti mun e upang teni napangei pupu ni xil ti, [~10~] 17 vengan xa ngan xa nggoni sulut sipsip xa di misoh de von xeihen ilaxat kuh xil. Itiamu ni xil ixoni ngan xa moletin tei di diamu kuhi ni sipsip san xil, e ipisen suse xa ba be vatit oei te meulien mi xil. E simetexil te longpangasien nae, Hi isihia ra metexil.”[~11~]

<- Revelesen 6 Revelesen 8 ->