JUECES 4

Débora, tojo nicã Barac, na Sísarare docaqueꞌacã weeꞌque niꞌi

1 Aod wẽ́rĩ́ca beꞌro Õꞌacʉ̃ ĩꞌorõpʉre Israe curuacjãrã apaturi ñaꞌarõ weeseticãrã niwã. 2 Tojo weegʉ Õꞌacʉ̃ narẽ Jabín, cananeo masã wiogʉ dutise doca tojacã weecʉ niwĩ. Jabín Hasor wãmetiri macãpʉ masãrẽ sʉꞌori dutigʉ nicʉ niwĩ. Cʉ̃ yarã surara wiogʉ Sísara wãmetigʉ nicʉ niwĩ. Cʉ̃ Haroset-goĩpʉ macãticʉ niwĩ. 3 Jabín novecientos cabayua wejesepawʉ, cõme meꞌrã weeꞌquepawʉre cʉocʉ niwĩ. Veinte cʉ̃ꞌmarĩ Israe curuacjãrãrẽ ñaꞌabutiaro dutipecʉ niwĩ. Tojo weerã Israe curuacjãrã Õꞌacʉ̃rẽ cʉ̃ weetamusere ʉpʉtʉ sẽrĩcãrã niwã.

4 Titare Débora wãmetigo Õꞌacʉ̃ yere weremʉꞌtãgõ Israe curuacjãrãrẽ na aꞌpepũrĩsere apo, sʉꞌori añurõ nisetiri masõ nico niwõ. Co Lapidot nʉmo nico niwõ. 5 Co, masãrẽ besego, niꞌcã ño docapʉ dujisetico niwõ. Tiño “Débora ya ño” wãmeticaro niwʉ̃. Ʉ̃rʉ̃pagʉ Efraĩ́ wãmetiri diꞌta, Ramá, Betel decopʉ tojacaro niwʉ̃. Israe curuacjãrã na aꞌpepũrĩsere apodutirã, co tiropʉ waꞌacãrã niwã.

6 Niꞌcã nʉmʉ Débora Barac wãmetigʉre pijidutico niwõ. Cʉ̃ Abinoam macʉ̃, Quedes wãmetiri macãcjʉ̃ nicʉ niwĩ. Quedes Neftalí ya curua nirĩ macã nicaro niwʉ̃. Cʉ̃rẽ aꞌtiro nico niwõ:

—Õꞌacʉ̃, Israe curuacjãrã wiogʉ, mʉꞌʉrẽ aꞌtiro dutimi: “Ʉ̃rʉ̃gʉ̃ Tabopʉ waꞌaya. Topʉ mʉꞌʉ meꞌrã diez mil ʉmʉa Neftalí, tojo nicã Zabulṍ ye curaricjãrãrẽ miaña. 7 Sísara, Jabín yarã surara wiogʉ, cʉ̃ yepawʉ, cʉ̃ yarã surara meꞌrã mʉꞌʉ meꞌrã aꞌmewẽjẽato nígʉ̃, dia Cisṍpʉ waꞌacã weegʉti. Topʉ cʉ̃rẽ docaqueꞌacã weegʉti”, mʉꞌʉrẽ aꞌtiro ni weredutiami Õꞌacʉ̃, nico niwõ.

8 Barac Déborare aꞌtiro yʉꞌticʉ niwĩ:

—Mʉꞌʉ yʉꞌʉre baꞌpaticã, waꞌagʉti. Mʉꞌʉ waꞌaticãma, waꞌasome, nicʉ niwĩ.

9 —Añurõsaꞌa; mʉꞌʉ meꞌrã waꞌagoti, nico niwõ Débora. “Mejõ mʉꞌʉ tojo níꞌque buꞌiri, masã ‘Mʉꞌʉ meꞌrã Õꞌacʉ̃ Sísarare docaqueꞌacã weeapʉ’ nisome. Numio meꞌrã pũrĩcã Õꞌacʉ̃ Sísarare docaqueꞌacã weeapʉ” nirãsama, nico niwõ.

To beꞌro Débora Barac meꞌrã Quedespʉ waꞌaco niwõ. 10 Topʉ Barac Zabulṍ, Neftalí ya curuacjãrã ʉmʉarẽ pijineocʉ niwĩ. Diez mil surara cʉ̃ meꞌrã aꞌmewẽjẽtamurã waꞌacãrã niwã. Débora quẽꞌrã cʉ̃rẽ baꞌpatico niwõ.

11 Cedes pʉꞌtopʉ, yucʉgʉ pajicjʉ encina wãmeticjʉ Zaanaípʉ nicaro niwʉ̃. Topʉ Heber, quenita masʉ̃ cʉ̃ ya wiꞌi suꞌti caseri meꞌrã wééca wiꞌi nicaro niwʉ̃. Cʉ̃ ãpẽrã quenita masã meꞌrã níꞌcʉ wijawãꞌcãcʉ niwĩ. Na quenita masã Hobab, Moisé mañecʉ̃ pãrãmerã nituriarã nicãrã niwã.

12 Sísara peꞌe “Barac ʉ̃rʉ̃gʉ̃ Tabor wãmeticjʉre mʉjãpʉ” nicã tʉꞌogʉ, 13 cʉ̃ novecientos tũrũsepawʉ, cõme meꞌrã weeꞌquepawʉre, tojo nicã nipeꞌtirã surarare neocũucʉ niwĩ. Neo, Haroset-goĩpʉ níꞌcãrã wija, Cisón wãmetiri maapʉ waꞌacãrã niwã.

14 Cʉ̃ tojo weecã ĩꞌagõ, Débora Barare aꞌtiro ni wereco niwõ:

—Waꞌaya. Niꞌcãcã Õꞌacʉ̃ marĩ wiogʉ mʉꞌʉrẽ Sísarare wiagʉsami. Marĩ wiogʉ mʉsã dʉporo ʉꞌmʉtãtojacʉ niami, nico niwõ. Co tojo nicã, Barac cʉ̃ yarã surara diez mil ʉmʉa ʉ̃rʉ̃gʉ̃ Tabopʉ níꞌcãrã Sísara yarã surara meꞌrã aꞌmewẽjẽrã waꞌarã dijaacãrã niwã. 15 Barac yarã surara Sísara yarã meꞌrã aꞌmewẽjẽrã dijááticã, Õꞌacʉ̃ Sísara yarã surarare ʉcʉacã weecʉ niwĩ. Sísara peꞌe cʉ̃ yawʉ tũrũpjʉ cõme meꞌrã wéécawʉpʉ sãñaꞌcʉ dijaa, omaduꞌtia waꞌacʉ niwĩ. 16 Cʉ̃ tojo weeri cura Barac yarã surarare, na yepawʉre téé Haroset-goim wãmetiropʉ narẽ wẽjẽsirutucʉ niwĩ. Nipeꞌtirã Sísara yarã surara wẽrĩpeꞌtia waꞌacãrã niwã. Ne niꞌcʉ̃ yʉꞌrʉwetiticʉ niwĩ.

17 Sísara peꞌe Jael, Heber ceneo masʉ̃ nʉmo ya wiꞌi, suꞌti caseri meꞌrã wééca wiꞌipʉ duꞌticʉ niwĩ. Heber, cʉ̃ acawererã, Sísara wiogʉ Jabín, Hasor macã wiogʉ meꞌrã añurõ aꞌmesʉꞌacʉ niwĩ. Tojo weegʉ Sísara ti wiꞌipʉ ejacʉ niwĩ. 18 Cʉ̃ etacã ĩꞌagõ, Jael cʉ̃rẽ nico niwõ:

—Sãjãtia, yʉꞌʉ wiogʉ. Ne uiticãꞌña.

Co tojo nicã, Sísara ti wiꞌipʉ sãjãacʉ niwĩ. Sãjãa, cʉ̃ ejaqueꞌacã, omacãjĩrõ meꞌrã cʉ̃rẽ omaco niwõ.

19 —Acowʉosaꞌa. Yʉꞌʉre aco cãꞌrõacã tĩaña, nicʉ niwĩ.

Tojo weego cabra õpẽcõrẽ cabra casero meꞌrã poseyéca ajurore pão, cʉ̃rẽ tĩaco niwõ. Tĩatoja, cʉ̃rẽ omaco niwõ tja.

20 Sísara core aꞌtiro weeduticʉ niwĩ:

—Sopepʉ nuꞌcũña. Ãpẽrã yʉꞌrʉarã, mʉꞌʉ tiro “¿Ãpẽrã marĩti?” ni sẽrĩtiñaꞌcã, “Marĩma” niña, nicʉ niwĩ.

21 Sísara, ʉpʉtʉ ñujũꞌcʉ niyugʉ, cãrĩyʉꞌrʉacʉ niwĩ. Cʉ̃ tojo weecã ĩꞌagõ, Jael, Heber nʉmo bʉsʉro marĩrõ ti wiꞌi cjase niꞌcãgʉ̃ yucʉgʉ ti wiꞌire tʉ̃apuanʉꞌcõꞌcʉre míí, cʉ̃ diapoare diꞌtapʉ paabiꞌpe wẽjẽco niwõ. Tojo wee wẽrĩa waꞌacʉ niwĩ.

22 Beꞌro Barac Sísarare aꞌmagʉ̃ etacã, Jael co ya wiꞌipʉ níꞌco wijaa, cʉ̃rẽ põtẽrĩgõ waꞌaco niwõ.

—Sãjãtia. Mʉꞌʉ aꞌmagʉ̃rẽ ĩꞌogõti, nico niwõ.

Co tojo nicã, Barac ti wiꞌire sãjãacʉ niwĩ. Ti wiꞌipʉ Sísara wẽrĩꞌcʉpʉ cũñacʉ niwĩ. Ti wiꞌire tʉ̃apuanʉꞌcõꞌcʉ meꞌrã cʉ̃ diapoare paabiꞌpeyʉꞌrʉtẽrĩnoꞌcʉre ĩꞌacʉ niwĩ.

23 Ti nʉmʉrẽta Õꞌacʉ̃ Jabín, cananeo masã wiogʉre docaqueꞌacã weecʉ niwĩ. 24 Israe curuacjãrã Jabĩ́rẽ, cananeo masã wiogʉ meꞌrã aꞌmewẽjẽrã, nemorõ tutuarã waꞌacãrã niwã. Tojo wee siapeꞌe meꞌrã narẽ wẽjẽpeꞌobutiacãrã niwã.

<- JUECES 3 JUECES 5 ->