—Marĩrẽ Õꞌacʉ̃ Egiptopʉ wẽrĩcã weecã, añu nibopã. Topʉre marĩ baꞌase waꞌicʉ diꞌi doꞌaꞌqueparʉ waꞌtero dujimiwʉ̃. Marĩ baꞌasĩꞌrĩrõ ejatuaro baꞌa yapiwʉ. Mʉsã peꞌe ʉ̃sã nipeꞌtirãrẽ masã marĩrõ, yucʉ marĩrõpʉ ʉjʉaboase meꞌrã wẽrĩdutirã, miitiwʉ.

4 Na tojo ucũcã tʉꞌogʉ, Õꞌacʉ̃ Moisére nicʉ niwĩ:

—Yʉꞌʉ mʉsãrẽ ʉꞌmʉse cjase baꞌase acoro pejaro weronojõ dijaticã weegʉti. Masã ʉmʉcorinʉcʉ̃ te baꞌasere miirã waꞌarãsama. Na niꞌcã nʉmʉrẽ baꞌatje ejatuaro seerãsama. Te meꞌrã “¿Noanojõ yʉꞌʉ dutiꞌquere queoro weeti, noa yʉꞌrʉnʉꞌcãti?” nímasĩgʉ̃saꞌa. 5 Niꞌcãmocʉse nʉmʉrĩ beꞌro cja nʉmʉrẽ, na pʉa nʉmʉ baꞌatjere seero weronojõ weeato, nicʉ niwĩ Õꞌacʉ̃.

6 Tojo weerã Moisé, Aarṍ Israe curuacjãrãrẽ werecãrã niwã:

—Niꞌcãcã naꞌiqueꞌari cura mʉsã marĩ wiogʉ Õꞌacʉ̃ta mʉsãrẽ Egiptopʉ níꞌcãrãrẽ miiwijaꞌquere masĩrãsaꞌa. 7 Ñamiacã ñamicure peꞌere Õꞌacʉ̃ cʉ̃ asistesere ĩꞌarãsaꞌa. Mʉsã cʉ̃rẽ ũrũsãsere tʉꞌoami. ¿Deꞌro weerã ʉ̃sãrẽ ũrũsãti? Ʉ̃sã mejõ nirã niꞌi, nicãrã niwã.

8 Moisé apeye narẽ ninemocʉ niwĩ:

—Ñamicaꞌa nicã Õꞌacʉ̃ mʉsã baꞌatji diꞌirore oꞌogʉsami. Boꞌreacãma mʉsãrẽ peje baꞌase pã́ weronojõ nisere oꞌogʉsami. Mʉsã cʉ̃rẽ ñaꞌarõ ucũ, ũrũsãsere tʉꞌoami. Mʉsã ũrũsãrã, ʉ̃sã mejẽtare ñaꞌarõ ucũrã weeapʉ. Õꞌacʉ̃ peꞌere ñaꞌarõ ucũrã weeapʉ. Ʉ̃sã mejõ nirã niꞌi.

9 Beꞌro Moisé Aarṍrẽ nicʉ niwĩ:

—Nipeꞌtirã Israe curuacjãrãrẽ Õꞌacʉ̃ ĩꞌorõpʉ aꞌtidutiya. Na ñaꞌarõ ũrũsãsere tʉꞌoami, nicʉ niwĩ Moisé.

10 Aarṍ na meꞌrã ucũrĩ curata nipeꞌtirã Israe curuacjãrã masã marĩrõ, yucʉ marĩrõpʉ ĩꞌaquejocãrã niwã. Wãcũña marĩrõ Õꞌacʉ̃ asistese oꞌmecurua poꞌpeapʉ bajucaro niwʉ̃. 11 Õꞌacʉ̃ Moisére aꞌtiro nicʉ niwĩ:

12 —Israe curuacjãrã na ñaꞌarõ ũrũsãsere tʉꞌoapʉ. Narẽ aꞌtiro ni wereya: “Naꞌiqueꞌari cura mʉsã waꞌicʉ diꞌi baꞌarãsaꞌa. Ñamiacã ñamicure peꞌere pã́ mʉsã baꞌasĩꞌrĩrõ põtẽorõ baꞌarãsaꞌa. Te meꞌrã mʉsã ‘Yʉꞌʉ mʉsã wiogʉ Õꞌacʉ̃ niꞌi’, nisere masĩrãsaꞌa”, niña, nicʉ niwĩ.

13 Ti nʉmʉ ñamicaꞌata putuá weronojõ bajurã pãjãrã na tiropʉ dijatacãrã niwã. Na nirõpʉre muꞌmua waꞌacãrã niwã. Ape nʉmʉ ñamicure nucũcãpʉre ñocõa ʉꞌseco na nirõpʉre cũñacaro niwʉ̃. 14 Beꞌro te ñocõa ʉꞌseco bopóca beꞌro, te diꞌa diaꞌcʉ̃ bʉꞌa bopoqueꞌaꞌque masã marĩrõ, yucʉ marĩrõpʉre nucũcãpʉ cũñacaro niwʉ̃. 15 Na Israe curuacjãrã tere ne ĩꞌamasĩtirã, “¿Ñeꞌenojõ niti?”, ni aꞌmerĩ sẽrĩtiñaꞌcãrã niwã.

Moisé narẽ nicʉ niwĩ:

—Aꞌte mʉsã pã́ weeatje Õꞌacʉ̃ cʉ̃ oꞌose niꞌi. 16 Õꞌacʉ̃ mʉsãrẽ aꞌtiro weedutiami: “Mʉsãnʉcʉ̃ mʉsã baꞌatjo ejatuaro seeya. Mʉsã ye wiꞌseripʉ nirãnʉcʉ̃ pʉa kilo cãꞌrõ seeya”, niami, ni werecʉ niwĩ Moisé.

17 Na cʉ̃ miidutiꞌcaronojõta weecãrã niwã. Ãpẽrã pajiro, ãpẽrã cãꞌrõacã seecãrã niwã. 18 Na seeꞌquere queocã, peje seeꞌcʉre yʉꞌrʉoticaro niwʉ̃. Pejeti seeꞌcãrã quẽꞌrãrẽ queoro ejacaro niwʉ̃. Dʉꞌsaticaro niwʉ̃. Nanʉcʉ̃ na baꞌaro ejatuaro seecãrã niwã.

19 Beꞌro Moisé narẽ nicʉ niwĩ:

—Ne niꞌcʉ̃ mʉsã ape nʉmʉ baꞌatjere dʉꞌaticãꞌña.

20 Moisé tojo nimicã, ãpẽrã cʉ̃ níꞌquere yʉꞌrʉnʉꞌcãcãrã niwã. “Ape nʉmʉpʉ baꞌarãti” nírã, dʉꞌacãrã niwã. Te na dʉꞌaꞌque becoa boa waꞌa, ʉ̃rĩa waꞌacaro niwĩ. Tere ĩꞌagʉ̃, Moisé na meꞌrã ua waꞌacʉ niwĩ.

21 Beꞌro ʉmʉcorinʉcʉ̃ ñamicurere nipeꞌtirã na baꞌaro ejatuaro seeneocãrã niwã. Mujĩpũ asiro meꞌrã te acoapeꞌtiacaro niwʉ̃. 22 Niꞌcãmocʉse nʉmʉrĩ beꞌro cja nʉmʉrẽ pʉa nʉmʉ baꞌatjere weronojõ seeneocãrã niwã. Baꞌparitise kilo niꞌcʉ̃ baꞌatjere seeneocãrã niwã. Na tojo weecã ĩꞌarã, Israe curuacjãrãrẽ sʉꞌori nisetiri masã Moisé tiropʉ waꞌa, cʉ̃rẽ werecãrã niwã. 23 Na tere werecã tʉꞌogʉ, Moisé narẽ nicʉ niwĩ:

—Õꞌacʉ̃ aꞌtiro dutiami: “Ñamiacã mʉsã sooatji nʉmʉ nirõsaꞌa. Yʉꞌʉre wãcũ, eꞌcatipeoatji nʉmʉ mʉsãrẽ cũuꞌu. Mʉsã baꞌase doꞌasenojõrẽ niꞌcãcã doꞌaweꞌocãꞌña. Mʉsã baꞌase pʉ̃osenojõrẽ pʉ̃oweꞌocãꞌña. Mʉsãrẽ baꞌase dʉꞌsacã, ‘Ñamiacãpʉ baꞌarãti’ nírã dʉꞌaya”, niami Õꞌacʉ̃, nicʉ niwĩ Moisé.

24 Moisé narẽ dutiꞌcaronojõta na baꞌadʉꞌaꞌquere ape nʉmʉ baꞌatjere dʉꞌacãrã niwã. Te baꞌase ne dojoti, ne becoa boꞌoticaro niwʉ̃. 25 Beꞌro Moisé narẽ nicʉ niwĩ:

—Niꞌcãcã mʉsãrẽ soodutiri nʉmʉ, Õꞌacʉ̃rẽ eꞌcatipeori nʉmʉ niꞌi. Tojo weerã tere baꞌaya. Mʉsã niꞌcãcãrẽ cãpũpʉre ne apeyenojõ baꞌase bocasome. 26 Mʉsã seis nʉmʉrĩrẽ baꞌase seeneorãsaꞌa. Siete nʉmʉrĩ waꞌari cura sauru, Õꞌacʉ̃ soodutíca nʉmʉ niꞌi. Ti nʉmʉma baꞌase seese marĩrõsaꞌa, nicʉ niwĩ.

27 Moisé tojo nimicã, ti nʉmʉrẽta niꞌcãrẽrã baꞌase seerã waꞌacãrã nimiwã. Ne bocaticãrã niwã. 28 Na tojo weecã ĩꞌagʉ̃, Õꞌacʉ̃ Moisére nicʉ niwĩ:

—¿Noꞌocãꞌrõ yoacã mʉsã yʉꞌʉ dutise, yʉꞌʉ buꞌese cũuꞌquere yʉꞌrʉnʉꞌcãrãsari? 29 Aꞌtere masĩña. Yʉꞌʉ, mʉsã wiogʉ, mʉsãrẽ soodutigʉ, niꞌcã nʉmʉ cũuapʉ. Tojo weegʉ seis nʉmʉ nirĩ nʉmʉrẽ pʉa nʉmʉ baꞌasere oꞌogʉti. Ape nʉmʉ peꞌe mʉsãrẽ soodutiri nʉmʉ nicã, nipeꞌtirã mʉsã ye wiꞌseripʉ tojayá. Ne wijaaticãꞌña, nicʉ niwĩ Õꞌacʉ̃.

30 Tojo weerã siete nʉmʉ nirĩ nʉmʉrẽ soocãrã niwã.

31 Israe curuacjãrã na baꞌase seeneosere maná[a] wãme pisucãrã niwã. Te cilantro wãmetise cape weronojõ butise peri bajucaro niwʉ̃. Pʉ̃ꞌarṍ ʉsemerĩseacã mumiaco meꞌrã weeꞌque weronojõ iꞌpitimeꞌrĩcãꞌcaro niwʉ̃.

32 Moisé narẽ aꞌtiro nicʉ niwĩ:

—Õꞌacʉ̃ aꞌtiro weedutiami: “Pʉa kilo ejatuaro see, nʉrõña. Tere mʉsã pãrãmerã nituriarãpʉre mʉsã masã marĩrõ, yucʉ marĩrõpʉ nícaterore yʉꞌʉ baꞌase oꞌoꞌquere ĩꞌarãsama. Yʉꞌʉ mʉsãrẽ Egiptopʉ miiwijacã oꞌoꞌquere ĩꞌarãsama”, niami, nicʉ niwĩ Moisé.

33 Beꞌro Moisé Aarṍrẽ aꞌtiro nicʉ niwĩ:

—Niꞌcãrʉ̃ miiti, tirʉpʉ pʉa kilo manárẽ miisãaña.[~2~] Beꞌro tere Õꞌacʉ̃ ĩꞌorõpʉ cũuña. Tere mʉsã põꞌrã, mʉsã pãrãmerã nituriarã ĩꞌato nígʉ̃, nʉrõbosaya.

34 Õꞌacʉ̃ Moisére tojo weedutiꞌcaronojõta, Aarṍ Õꞌacʉ̃ “Masã meꞌrã añurõ weegʉti” níꞌquere cʉori acaro dʉporo tirʉre nʉrõdutigʉ dʉpocʉ niwĩ.

35 Israe curuacjãrã cuarenta cʉ̃ꞌmarĩ manárẽ baꞌacãrã niwã. Canaá diꞌta sumuto etarãpʉ tere baꞌatʉocãrã niwã. Canaá na niatji diꞌta nicaro niwʉ̃.