HECHOS 4

Pedro, Juã wiorã tiropʉ na waꞌaꞌque niꞌi

1 Pedro quẽꞌrã na masãrẽ ucũrĩ cura paꞌia, apĩ Õꞌacʉ̃ wiꞌi coꞌterã surara wiogʉ, ãpẽrã saduceo masã na tiropʉ waꞌacãrã niwã. 2 Waꞌa, Pedro, Juã meꞌrã na masãrẽ buꞌese ye buꞌiri pũrõ uacãrã niwã. Pedro peꞌe aꞌtiro ni buꞌecʉ niwĩ:

—Õꞌacʉ̃ cʉ̃ macʉ̃ Jesure wẽrĩꞌcʉpʉre masõcʉ niwĩ. Tojo weerã marĩ masĩꞌi. Marĩ quẽꞌrã wẽ́rĩ́ca beꞌro tojota masãrãsaꞌa, ni werecʉ niwĩ Pedro.

Saduceo masã ne ẽjõpeoticãrã niwã masã wẽ́rĩ́ca beꞌro masãsere. Tojo weerã Pedro masãrẽ tojo nicã tʉꞌorã, pũrõ uacãrã niwã. 3 Ua, Pedro, Juãrẽ ñeꞌe, buꞌiri daꞌreri wiꞌipʉ sõrõduticãrã niwã. Narẽ ñeꞌecã, ñamicaꞌapʉ nicaro niwʉ̃. Tojo weerã ti ʉmʉcoreta paꞌia wiorãpʉre weresãmasĩticãrã niwã. Te ye buꞌiri Pedro quẽꞌrã ti ñamirẽ buꞌiri daꞌreri wiꞌipʉta dujicãꞌcãrã niwã. 4 Ãpẽrã Õꞌacʉ̃ wiꞌipʉ na buꞌesere tʉꞌoꞌcãrã pãjãrã Jesure ẽjõpeocãrã niwã. Todʉporopʉ Jesure ẽjõpeomʉꞌtãꞌcãrã meꞌrã nírã, ʉmʉa seꞌsarore baꞌpaqueocã, niꞌcãmocʉsetiri mil nicãrã niwã.

5 Ape nʉmʉ judío masã wiorã, ãpẽrã bʉcʉrã, tojo nicã Moisé ojaꞌquere buꞌeri masã Jerusalẽ́pʉre nerẽcãrã niwã. 6 Na meꞌrã ãpẽrã quẽꞌrã Anás paꞌia wiogʉ, apĩ Caifá, apĩ Juã, apĩ Alejandro, ãpẽrã paꞌia wiogʉ acawererã nerẽcãrã niwã. 7 Nerẽtoja, Pedro quẽꞌrãrẽ na tiropʉ pijiwãꞌcãduticãrã niwã. Na buꞌiri daꞌreri wiꞌipʉ níꞌcãrã na tiro etacã ĩꞌarã, “¿Noa dutiro meꞌrã mʉsã ãꞌrĩ sijamasĩtiꞌcʉre sijacã weeati?” ni sẽrĩtiñaꞌcãrã niwã.

8-9 Na sẽrĩtiñaꞌcã, Pedro Espíritu Santu tutuaro meꞌrã, cʉ̃ weetamuse meꞌrã narẽ yʉꞌticʉ niwĩ:

—Mʉsã judío masã wiorã, tojo nicã bʉcʉrã, ¿deꞌro weerã weresãti ʉ̃sãrẽ? ¿Mʉsã “¿Deꞌro wee cʉ̃rẽ sijacã weeati?” ni sẽrĩtiñaꞌti? 10 Yʉꞌʉ mʉsãrẽ nipeꞌtirãrẽ tere weregʉti. Jesucristo Nazarecjʉ̃ tutuaro meꞌrã ãꞌrĩ sijamasĩtimiꞌcʉ sijami. Mʉsã cʉ̃rẽ Jesure curusapʉ paabiꞌpewʉ. Cʉ̃ pacʉ pũrĩcã cʉ̃ wẽrĩꞌcʉpʉre masõcʉ niwĩ. Cʉ̃ tutuaro meꞌrã ãꞌrĩ sijamasĩtigʉ níꞌcʉ sijami. 11 Dʉporopʉ Jesure Õꞌacʉ̃ ye queti ojaꞌcʉ aꞌtiro ni ojamʉꞌtãcʉ niwĩ: “Masã ʉ̃tã pjĩrĩ meꞌrã wiꞌi yeeri masã niꞌcã pjĩ na ʉatica pjĩrẽ cõꞌarãsama. Na cõꞌáca pjĩ meꞌrã ãpẽrã peꞌe añurõ tutuari wiꞌi weerãsama.” Aꞌtiro nisĩꞌrĩrõ weeꞌe te ojaꞌque. Mʉsã Jesucristore ʉatiwʉ. Mʉsã cʉ̃rẽ ʉatimicã, cʉ̃ pacʉ cʉ̃ wẽrĩ masã́ca beꞌro wiogʉ sõrõcʉ niwĩ. 12 Aꞌti turipʉre Jesucristo diaꞌcʉ̃ nimi marĩrẽ yʉꞌrʉogʉ. Ãpẽrãpʉa marĩrẽ ne yʉꞌrʉomasĩtisama, nicʉ niwĩ Pedro.

13 Cʉ̃ tojo nicã tʉꞌorã, wiorã tʉꞌomarĩa waꞌacãrã niwã. Na basu aꞌmerĩ ucũcãrã niwã:

—Ãꞌrã mejõ nirã nima. Buꞌeꞌcãrã mejẽta nima. Na buꞌetiꞌcãrã nimirã, añurõ masĩse, wãcũtutuase meꞌrã ucũma. Na tojo weecã, marĩ narẽ ĩꞌamasĩꞌi. Ãꞌrã Jesú meꞌrã níꞌcãrã nima, nicãrã niwã. 14 Na yʉꞌrʉonoꞌcʉ Pedro, Juã tiro nuꞌcũcã ĩꞌatjĩarã, wiorã ucũnemomasĩticãrã niwã.

15-16 Beꞌro Pedro quẽꞌrãrẽ wiorã nerẽrĩ tucũpʉ níꞌcãrãrẽ aperopʉ wijaaduticãrã niwã yujupʉ. Na wijááca beꞌro na seꞌsaro aꞌmerĩ ucũcãrã niwã:

—¿Deꞌro weerãsari marĩ ãꞌrãrẽ? Nipeꞌtirã Jerusalẽ́cjãrã na sijamasĩtiꞌcʉre yʉꞌrʉocã tʉꞌopeꞌticãꞌsama. Tojo weerã “Yʉꞌrʉotiama, tojo nimaꞌacãrã weema”, marĩ narẽ nímasĩtisaꞌa. 17 Masã aperocjãrãpʉ tojo waꞌaꞌquere tʉꞌonemocã ʉatisaꞌa. Tojo weerã aꞌtiro nírã narẽ: “Jesú ye quetire ne ucũnemoticãꞌña majã” nírã, nicãrã niwã.

18 Ucũtojanʉꞌcõ, Pedro, Juãrẽ pijisõrõcãrã niwã tja. Na, na tiropʉ etacã, “Ãpẽrãpʉre Jesú ye quetire mʉsã ne werenemoticãꞌña” ni, duticãrã niwã.

19-20 Na tojo nicã tʉꞌorã, Pedro quẽꞌrã yʉꞌticãrã niwã:

—Ʉ̃sã mʉsã dutiro wéérã, Õꞌacʉ̃ dutiro peꞌere weetibosaꞌa. ¿Noa dutiro weecã ʉasari Õꞌacʉ̃? Mʉsã aꞌtere wãcũña. Ʉ̃sã ĩꞌaꞌquere, ʉ̃sã tʉꞌoꞌquere wereduꞌumasĩtisaꞌa, ni yʉꞌticãrã niwã.

21 Na tojo nicã tʉꞌorã, wiorã peꞌe tutuaro meꞌrã uise oꞌosĩꞌrĩrã, narẽ ninemocãrã niwã:

—Wereticãꞌña. Mʉsã Jesú ye quetire werenemocã, mʉsãrẽ buꞌiri daꞌrerãti, nicãrã niwã. Narẽ maata buꞌiri daꞌremasĩti, duꞌuwĩrõcãꞌcãrã niwã. Masã Õꞌacʉ̃rẽ narẽ yʉꞌrʉoꞌquere eꞌcatise oꞌocã ĩꞌarã, tojo weecãrã niwã.

22 Na yʉꞌrʉonoꞌcʉ cuarenta cʉ̃ꞌmarĩ yʉꞌrʉro cʉocʉ niwĩ.

Jesure ẽjõpeorã na Õꞌacʉ̃rẽ weetamuse sẽrĩꞌque niꞌi

23 Pedro, Juã topʉ níꞌcãrã wijaa, na meꞌrãcjãrã nirĩ wiꞌipʉ waꞌacãrã niwã. Ti wiꞌipʉ etarã, paꞌia wiorã, bʉcʉrã narẽ tojo níꞌquere werecãrã niwã.

24 Na tojo ni werecã tʉꞌorã, nipeꞌtirã ti wiꞌipʉ nirã́ niꞌcãrõnojõ wãcũseti, Õꞌacʉ̃rẽ sẽrĩcãrã niwã:

—Õꞌacʉ̃, ʉ̃sã wiogʉ, mʉꞌʉ nipeꞌtise aꞌti turi cjasere weecʉ niwʉ̃. Ʉꞌmʉse, maarĩ, nipeꞌtirã tepʉ nirãrẽ weecʉ niwʉ̃. 25 Dʉporopʉ Espíritu Santu wãcũse oꞌoro meꞌrã ʉ̃sã ñecʉ̃ Davire mʉꞌʉ macʉ̃ Jesure masã ñaꞌarõ weeatjere mʉꞌʉ weremʉꞌtãduticʉ niwʉ̃. Davi mʉꞌʉ dutisere weegʉ́ aꞌtiro nicʉ niwĩ:

Judío masã nitirã Õꞌacʉ̃ cʉ̃ beseꞌcʉ meꞌrã ʉpʉtʉ uarãsama.

Judío masã quẽꞌrã Õꞌacʉ̃ beseꞌcʉre ñaꞌarõ weesĩꞌrĩrãsama.

Tojo wãcũmirã, ne põtẽosome.

26 Aꞌti diꞌtacjãrã wiorã aꞌmerĩ nerẽrãsama Õꞌacʉ̃rẽ yʉꞌrʉnʉꞌcã, cʉ̃rẽ ñaꞌarõ weesĩꞌrĩrã.

Cʉ̃ beseꞌcʉ quẽꞌrãrẽ tojota ñaꞌarõ weesĩꞌrĩrãsama.

Mʉꞌʉ tojo ni wereduticʉ niwʉ̃ ʉ̃sã ñecʉ̃ Davire.

27 »Cʉ̃ tojo ni ojaꞌcaronojõta queoro waꞌawʉ. Aꞌti macãpʉre mʉꞌʉ macʉ̃ Jesú, mʉꞌʉ beseꞌcʉre wẽjẽrãtirã Herode, Poncio Pilato, ãpẽrã judío masã nitirã, judío masã meꞌrã aꞌmerĩ nerẽwã. 28 Tojo weerã wẽjẽcãꞌwã cʉ̃rẽ. Dʉporopʉ mʉꞌʉ macʉ̃rẽ wẽjẽatjere masĩtojacʉ niwʉ̃. “Tojo waꞌarosaꞌa”, nicʉ niwʉ̃. Mʉꞌʉ masĩꞌquere yujupʉta niꞌcãrõacã weerã weema. 29 Õꞌacʉ̃, ʉ̃sãrẽ paꞌia wiorã mʉꞌʉ macʉ̃ ye quetire weredutitiama. “Mʉsã werecã, mʉsãrẽ buꞌiri daꞌrerãti”, niama. Na ʉ̃sãrẽ tojo níꞌquere wãcũña. Mʉꞌʉ dutiro weesĩꞌrĩsaꞌa. Ʉ̃sãrẽ mʉꞌʉ tutuasere oꞌonemoña. Ʉ̃sã mʉꞌʉ tutuase oꞌocã, mʉꞌʉ macʉ̃ ye quetire ucũtutuarãsaꞌa. 30 Mʉꞌʉ macʉ̃ Jesú tutuaro meꞌrã ʉ̃sãrẽ masã dutitirãrẽ yʉꞌrʉocã, apeye quẽꞌrãrẽ weeĩꞌocã weeya. Mʉꞌʉ tojo weecã, masã mʉꞌʉ tutuasere ĩꞌarãsama, ni sẽrĩcãrã niwã Õꞌacʉ̃rẽ.

31 Na tojo ni sẽrĩ́ca beꞌro na nirĩ wiꞌi aꞌmeñaꞌcaro niwʉ̃. Tojo waꞌacã, ti wiꞌipʉ nirã́ Espíritu Santure cʉoyʉꞌrʉacãrã niwã tja. Tojo weerã cʉ̃ weetamuse meꞌrã Jesú ye quetire uiro marĩrõ werecãrã niwã.

Jesure ẽjõpeorã na cʉosere aꞌmerĩ dʉcawaaꞌque niꞌi

32-33 Jesú besecṹúꞌcãrã tutuaro meꞌrã Jesú wẽrĩꞌcʉpʉ masãꞌquere werenuꞌcũcãꞌcãrã niwã. Õꞌacʉ̃ narẽ pũrõ weetamucʉ niwĩ. Nipeꞌtirã Jesure ẽjõpeorã niꞌcãrõnojõ wãcũsetibʉrocãrã niwã. Na cʉosere “Yé diaꞌcʉ̃ niꞌi”, niticãrã niwã. Tojo weerã na cʉosere aꞌmerĩ dʉcawaacãrã niwã. 34-35 Wiꞌseri, diꞌta cʉorã duacãrã niwã ãpẽrãpʉre. Na duaꞌque wapare ñeꞌe, apeyenojõ moorãrẽ dʉcawaadutirã Jesú cʉ̃ besecṹúꞌcãrãrẽ oꞌocãrã niwã. Jesú besecṹúꞌcãrã tere ñeꞌe, apeyenojõ moorãrẽ dʉcawaacãrã niwã. Tojo weerã pajasecʉorã waro marĩcãrã niwã. Niꞌcãrõnojõ cʉobʉrocãrã niwã.

36 Niꞌcʉ̃ Jesure ẽjõpeogʉ José wãmetigʉ nicʉ niwĩ. Leví ya curuacjʉ̃ Chipre wãmetiri nʉcʉ̃rõcjʉ̃ nicʉ niwĩ. Jesú cʉ̃ besecṹúꞌcãrã peꞌe cʉ̃rẽ Bernabé pisucãrã niwã. Bernabé griego ye meꞌrã “Masãrẽ eꞌcatise oꞌogʉ” nirõ weesaꞌa. 37 Cʉ̃ diꞌta cãꞌrõacã cʉocʉ niwĩ. Ti diꞌtare ãpẽrãrẽ duacʉ niwĩ. Cʉ̃ duaꞌque wapare nipeꞌtisepʉta Jesú besecṹúꞌcãrãrẽ oꞌopeꞌocãꞌcʉ niwĩ.

—Marĩ meꞌrãcjãrã apeyenojõ moorãrẽ dʉcawaaya, nicʉ niwĩ.

<- HECHOS 3 HECHOS 5 ->