Lukas 2

Yesu tiina ipoopa

(Mt 1:18-25)

1 Elisabet ipoop Yoan ve saawe siriv ilam ila, ra Augustus tau kinik tiina to Rom na ighur saveeŋ pa nugh naol isov tau tileep ila i saamba na, ighe tila tighur ezazi. 2 Saawe tana, tipaburigin uraat to ghamuuŋ tamtamon ezazi ivot imin maata. Uraat tawe ivot indeeŋ Kirinius igham pooz pa taan sirivu to Siria. 3 Tauvene tamtamon tisov timuul tila pa nugh toz toz puughu, leso tighur ezazi.

4-5 Yosep puughu tooni ivot ila to kinik David. Tauvene igham Maria, livaa tau tisiigho pani na, ve yesuru tipul nugh Nasaret tau igheen ila taan sirivu to Galilaia na, ve tilaagh tila peria taan sirivu to Yudea. Ra malmalizi tila tivot nugh to kinik David, eeza Betelem. Leso tighur ezazi. Saawe tana, Maria i aapo. 6 Tilepleep ta sewe, ve Maria saawe tooni to popaaŋ ivot. [a]

7 Tauvene ipoop naatu aidaaba, ve ikaukauu pa uuli, ve ipagheena igheen ila ŋgai niazi to ghanghaniiŋ. Yes tileep ta sewe pasaa, ruum to loomba tisov tivoniir.

Aŋela tivot to yes ŋginiiŋa to sipsip

8 Mboŋ tana, ŋginiiŋa siriv to sipsip tileep izi nugh Betelem ziige, ve tiŋginŋgin sipsip toozi. 9 Malau mako, aŋela to Ŋeer Tiina izilam gha iyooz ila naghozi, ve Ŋeer Tiina mbonari isul livutin zi. Tauvene roiŋ tiina kat igham zi. 10 Eemon aŋela tawe isaav pazi ighe: “Yam aroi sov. Alooŋ. Yau nalam to napaesia vaaru poia payam. Vaaru poia tane pale igham tamtamon tisov lolozi poia le poia kat. [~2~]

11 Pasaa, mboŋ aazne, Uleeŋa tsiam, tiina ipoopa izi nugh to David wa. I Mesia, ve Tiina tsiam. [~3~]

12 Gabua tane pale itotoia payam: Ala, pale aghita marani ee tau tikaukauu pa uuli, ve tipagheena igheen ila ŋgai niazi to ghanghaniiŋ.”

13 Malau mako aŋela ndiŋndiŋ ndiŋndiŋ to nugh sambam timeke tizilam, gha tilup zi tomania aŋela tana, ve tipait Maaron eeza tighe:

14 “Tapait Maaron tau ileep saaŋa le saaŋa kat na eeza pa tapiri ve poia tooni.

Mboŋ aazne, luuma to Maaron izilam taan. Tauvene yes tau Maaron loolo poia pazi, ene pale luuma tooni izaa toozi ve tileep poi.” [~4~]

15 Yes aŋela tipul zi, ve timuul tizala pa sambam, ra yes ŋginiiŋa to sipsip tana tivasavo zi tighe: “Aiyo, taburig, ve tala pa Betelem. Leso taghita gabua tau Ŋeer Tiina ipaesia pait ne.”

16 Tauvene tilaan rekia tila, ve tindeeŋ Maria yesuru Yosep, ve marani tana. I ighengheen ila ŋgai niazi to ghanghaniiŋ. 17 Tighita le isov, ra tipaesia saveeŋ tau aŋela isavia pazi pa marani tana. 18 Tamtamon tisov tau tilooŋ saveeŋ toozi na, tirur ve tigham ŋgar naol. 19 Ve Maria ikis saveeŋ tana isov igheen ila loolo ve ighamgham ŋgar pani. [~5~]

20 Ra yes ŋginiiŋa to sipsip timuul tila. Tilaghlaagh, ve tipapait Maaron eeza pa gabua naol isov tau tilooŋa ve tighita. Pasaa, gabua tana ivot itaghon duduŋai saveeŋ tau aŋela isavia pazi na.

Maria yesuru Yosep tigham Yesu ila Rumei Tiina

21 Tilepleep ve mboŋ liim ve tol ilam ila, ra uraat to ravuuŋ natuzi waaro ivot, ve tiwaat eeza Yesu. Eeza tane, Maria aapo soone, ve aŋela iwaato pataghaaŋ wa. [~6~]

22-23 Maria gha Yosep tileep le saawe toozi ivot to tigharaat tauzi le tiŋgalaaŋ muul ila Maaron maata itaghon tutuuŋ to Mose. Ra tigham ŋeer marani tana, ve tizala Yerusalem. Leso tighuru imin Ŋeer Tiina le, itaghon saveeŋ tau tiboode ila Ŋeer Tiina tutuuŋ tooni. Isaav tauvene ighe:

“Natmimŋa aidabazŋa, aghur zi tisov timin Maaron le.” [~7~]

24 Tauvene yesuru tila tighur marani tana imin Ŋeer Tiina le, ve tirav mbuun ru imin watooŋrau itaghon tutuuŋ to Ŋeer Tiina tau ighe: “Arav mbuun ru, ma mbunumoor paghpaaghu ru imin watooŋrau.” [~8~]

Simeon ivotia ŋgar tau pale ivot pa Yesu

25 Ŋeer ee ileep izi Yerusalem, eeza Simeon. I ŋeer duduuŋa ila Maaron maata. Saawe isov, i maata iŋgalŋgal Maaron ve itaghon ŋgar tooni. I ighurghur maata pa saawe to Maaron igham mulin yes Israela ve tileep poia muul. Ve Avuvu Patabuyaaŋ ileep tomania. [~9~]

26 Avuvu Patabuyaaŋ ipaghazoŋaini wa, ighe: I pale ighita Mesia to Maaron le isov, o imaat. 27 Tauvene Yesu taama gha tiina tighamu tiloŋ tila sirsiir to Rumei Tiina loolo tighe tigham ŋgar tau tutuuŋ isavia na pani. Ve saawe duduuŋ tana, Avuvu Patabuyaaŋ ipaburigin Simeon paam gha iloŋ ila sirsiir to Rumei Tiina loolo. 28 I ighita ŋeer marani, ve ila iiti izaa imbaraara, ve ipait Maaron eeza ighe:

29 “O Tiina, yau besooŋa tsio. Ŋgarig gha ateg izi. Aazne, ighe yo ugham ghau napul taan ve nalat, yau aat nalat toman lolog poia.

Pasaa, saveeŋ tau yo umbua payau na, ighur anooŋa ivot wa. [~10~]

30-31 Eez tau yo pale ugham mulin tamtamon pani na, yo utotoia payau gha naghita pa matag wa. Eez tane, yo taum ugharaata ila nughmariŋ matazi. [~11~]

32 I pale imin ghazooŋa pa yes tau Yuda mako na, ve ipaghazoŋai zi payo.

Ve igham tamtamon tsio Israel ezazi ivot imin tiina paam.” [~12~]

33 Yesu taama gha tiina tilooŋ saveeŋ tau Simeon isavia pa Yesu na, le tigham ŋgar naol. 34-35 Ra Simeon ighur poia to Maaron izaa toozi, ve isaav pa Yesu tiina Maria ighe: “Ulooŋ. Ŋeer marani tane, Maaron ighuru pa valaghiiŋ tamtamon katini to Israel. Siriv pale tizori ve titap gha tilalez. Ve siriv, i pale igham zi tiburig tiyooz. Pasaa, i pale igham ŋgar tau igheen ila tamtamon lolozi na ivot ighazooŋ. Eemon tamtamon katini pale tizori. Ve ŋgar tau pale ivot pani na, yo pale uyamaana imin mbuzaagh maata iŋgal atem.” [~13~]

Propet livaa Anna ighita Yesu

36 Propet livaa ee ileep ila sirsiir to Rumei Tiina loolo paam, eeza Anna. Taama eeza Panuel, ve puughu tooni ivot ila to Aser. I imin kooŋ wa. Muuŋ, i ivai. Eemon yesuru azaawa tileep irau ndaman liim ve ru mon, ra azaawa imaat, ve i izi imin naar. 37 I ilepleep le ndaman tooni irau tamoot paaŋ geege paaŋ (84). I ipulpul Rumei Tiina mako. Saawe isov, mboŋ ve mataaz, ibesbees pa Maaron ta sewe. Ve iŋgunŋgun tauu pa ghaniiŋ aniiŋ ve isuŋsuŋ. [~14~]

38 Yosep yesuru Maria ve natuzi tilepleep ila sirsiir to Rumei Tiina loolo soone, ve Anna aana ilam ivot toozi, ve ipait Maaron eeza, ve ipaesia ŋeer marani pa yes eval tau tighurghur matazi pa saawe to Maaron igham mulin tamtamon to Yerusalem pa pataŋani toozi. [~15~]

39 Yosep gha Maria tigham uratoi gabua naol tau tutuuŋ to Ŋeer Tiina isavia na le isov, ra timuul tila pa nugh toozi Nasaret tau igheen ila taan sirivu to Galilaia. [~16~]

40 Natuzi itum imin olman rig ve tapiri ivot. Ve ŋgar tooni paam, ivot imin tiina ve ŋgar popoia katini igheen tooni. Ve poia to Maaron igheen tomania. [~17~]

Yesu ndaman tooni saŋavul ve ru ve ila Rumei Tiina

41 Ndaman isov, Yesu taama gha tiina tilala Yerusalem pa lupuuŋ tiina to Pasova. [~18~] [~19~]

42 Saawe tau Yesu ndaman tooni imin saŋavul ve ru, tighamu gha yesŋa tizala Yerusalem titaghon ŋgar tau monmon tighamghamu na. 43-44 Lupuuŋ tawe isov, ra Yosep yesuru Maria tipaburigin laghooŋ toozi tighe timuul tila pa nugh toozi. Eemon Yesu izi ileep Yerusalem. Ve taama gha tiina tiwataghi mako. Matazi iŋgal sorok tighe i yesŋa tamtamon siriv timuuŋ tila wa. Tilaagh tila le ravrav izi, ra tiilo. Tauvene tilaagh irau zetazŋa, ve tighason zi pani. 45 Eemon tindeeŋa mako. Tauvene timuul tila pa Yerusalem, leso tiilo ta sewe. 46 Tiilo le irau mboŋ tol ila, ra tindeeŋa ileep ila sirsiir to Rumei Tiina loolo. I yesŋa zeran ŋgara siriv to tutuuŋ tilepleep, ve i iloŋlooŋ zi, ve ighaghason zi pa saveeŋ siriv. 47 Tamtamon tisov tau tilooŋ saveeŋ tooni na, tirur pa ŋgar tooni ve saveeŋ tau i iyoli pa zeran ŋgara tawe. [~20~]

48 Taama gha tiina tighita le tirur. Ve tiina ila isaav pani ighe: “Wai natug, mindai ta yo ugham ŋgar tauvene payei? Yeiru tamam atemai iparav payo kat, ve nikaria ilooŋ ghom.”

49 Yesu iyol aliiŋa ighe: “Ne? Yamru ail ghau pasaa? Awatagh mako? Yau aat naleep ila Tamaŋ ruum tooni.” 50 Eemon yesuru tighilaal saveeŋ tau i isavia pazi na puughu mako. [~21~]

51 Ra yesŋa tiburig, ve timuul tila pa Nasaret. I monmon maata loŋloŋai pazi. Ve tiina ighur saveeŋ tomania gabua isov tau ivot pa naatu na ila loolo, ve ighamgham ŋgar pani. [~22~]

52 Yesu itum imin olman, ve ŋgar tooni imatuugh pa ŋgar popoia to Maaron. Tauvene Maaron loolo poia pani. Ve tamtamon paam, lolozi poia pani.

<- Lukas 1 Lukas 3 ->