Maaron Igham Mulin Yes Israela 24

Yes Israela timbua saveeŋ toman Yoova

1 Yoova isaav pa Mose ighaze: “Yamru togham Aron, toman ndinatu ru Nadap ve Abiu, ve daba tamoot tol saaŋgul (70) to yes Israela aza anim tiou to lolooz daba ne. Eemoghon anim agharau ghou kat malep. Aneep saguan ris, ve aput aghemim, ve asuŋ payou. 2 Le isob, ghoro yes pida tineep tonowe, ve yom eŋgengom unum ugharau ghou. Ve yes ival tiina to Israel tovene paam. Tiza tinim tigharau ghou malep. Tineep saguan.”

3 Tovenen Mose imuul izila to yes Israela, ve ipaes padi pa saveeŋ ve tutuuŋ tisob to Yoova isavia di. Isavsaav padi le isob, ghoro tilup avodi tighaze: “Saveeŋ isob to Yoova isavia, yei pale nitaghoni.” Igham 19:8

4 Ghoro Mose imbood saveeŋ isob to Yoova ila rau.

Mboŋ ndugizau, ghoro Mose imundig, ve indou yaam pida izi lolooz pughu inim artaal, ve ipayoon yaam saaŋgul ve ru tinim ghilalooŋ pa rumai saaŋgul ve ru to yes Israela. 5 Ghoro imbaaŋ ndipain todi pida tila tigham watooŋrau pa Yoova. Yes tigham mbeb pida ve tighur di tizala yab ve ighan suvun di. Ve timoz makau papaghu pida ve tighan di, leso yesŋa Yoova tilup di tinim ee moghon. 6 Mose iwato mbeb to tirab di tinim watooŋrau ne siŋidi, ve iliŋ pida ila oon pida lolodi, ve igham pida, ve itirtiri izala artaal. 7 Ghoro igham rau to saveeŋ mbuaaŋ todi toman Yoova ineep ila, ve iraava, ve iwaata, ve ival tiina tilooŋ. Tilooŋa le isob, ghoro tisaav tighaze: “Saveeŋ isob to Yoova isavia, yei pale nitaghoni kat.”

8 Ghoro Mose igham siŋ to ineep ila oon lolodi, ve itirtiri izala ival tiina poghodi, ve isaav padi ighaze: “Aazne, Yoova imbua saveeŋ toman gham, ve yamŋa alup gham anim ee moghon. Siŋ tonene ipariaaŋ saveeŋ mbuaaŋ tiam toman Yoova. Lupuuŋ toit toman Yoova, nene iyoon izala saveeŋ to ye igham pait. Ighaze tataghoni kat, nene pale lupuuŋ toit toman Yoova inepneep tovene itaghoni taghoni gha ila.” Mt 26:28; 1Kor 11:25; Hib 9:16+

9 Ghoro Mose igham Aron, Nadap, Abiu, ve daba tamoot tol saaŋgul (70) to yes Israela, ve yesŋa tizala pa lolooz. 10 Tila tivot tonowe, ghoro tighita Maaron to Israela. Ye iyoon izala mbeb eez pogho. Mbeb tonowen babaŋa, ve bibiliiŋa inimale tata. 11 Yes daba to Israela tineep toman Maaron, ve tighan ve tighun tonowe. Onoon kat, yes tighita Maaron. Eemoghon ye iwaghamun di maau. Mbnp 32:31

Mose izala pa lolooz Sinai daba

12 Muri pa mbeb tonenen, Yoova isaav pa Mose ighaze: “Malmalim uza unum tiou to lolooz daba ne, ve uneep izi sualen. Pasa, you naŋgeret saveeŋ ve tutuuŋ tiou ila yaam babaŋadi wa. Leso ipatooŋ yes Israela pa ŋgar to titaghoni. Ve naghaze naghur yaam tonene tilat nimam.”

13-14 Tovenen Mose isaav pa yes daba tonenen ighaze: “Yam aneep to sualen, ve asaŋan yeru Yosua. Aron yesuru Ur to tinepneep ne. Ighaze lemim pataŋani eta, yesuru irau tigharaata.” Isavsaav padi le isob ghoro igham ulaaŋa toni Yosua ve yesuru tinau tizala ris. Ghoro Mose ipul Yosua izi, ve eŋgeni malmali izala pa lolooz to Maaron daba.

15 Sawa tonenen, yaghur tae izi inim ikau lolooz Sinai daba. 16-17 Ve Yoova ŋguruba isul izala lolooz daba. Yaghur tae tonowen ikau lolooz irau mboŋ liim ve eez. Ival tiina to Israel to tineep sila, matadi izala pa lolooz, ve tighita Yoova ŋguruba isul inimale yab tiina ighanghan izala lolooz daba. Mt 17:5; Hib 12:18,29

Ndag inim liim ve ru, ghoro Yoova ineep yaghur tae lolo, ve isaav izila pa Mose ighaze izala toni. 18 Tovenen Mose izala lolooz daba kat, le ilooŋ ila yaghur tae lolo. Ve ineep tonowe irau mboŋ tamoot ru. Mt 4:2

<- Maaron Igham Mulin Yes Israela 23 Maaron Igham Mulin Yes Israela 25 ->