Link to home pageLanguagesLink to all Bible versions on this site
15
Yes Israela tipait Maaron iza ila mbouŋ

1 Ghoro Mose yesŋa Israela timbou mbouŋ tonene pa tipait Yoova.

“You pale nambou ve napait Yoova.
Ye iza tiina le tiina kat.
Ye iparab ariaŋa le ilib pa koia.
Ye ipiyaav hos todi toman yes to tilaan padi ne tizila te lolo ve tilaledi. Syg 15:3
 
2 You naghamgham tapirig ila to Yoova. Tovenen nambou mbouŋ pa napaiti.
You irau nalaleg. Eemoghon ye igham mulin ghou.
Ye moghon to Maaron tiou.
Tovenen naghaze napait iza pa poia toni.
Muuŋ, tamaŋ imbesmbees pani.
Ve you paam napait iza izala le izala kat. Mbo 118:14
 
3 Tiina tiou, ye ŋgeu ariaŋa to malmal.
Iza Yoova. Ye inepneep irau sawa isob. Igham 3:14
4 Ye ipiyaav kinik to Isip ndaaba toni toman karis todi tisob tizila te lolo ve tilaledi.
Ve yes daba to tiraua kat pa malmal, yes paam tighun te ve tisob timatmaat izi Te Kaviaaŋa.
 
5 Te itatab di ve tindal tizila tinimale yaam.
Tizila kat to mazovan bibiliiŋa lolo we.
6 O Yoova, nimam waan, nene tapiri tiina le tiina kat.
Nimam waan irab mbirisan koiamŋa le tilaledi.
 
7 Yom izam tiina kat. Ulib pa mbeb tisob.
Koiamŋa to timundig tighaze tizoor ghom, yom ureu mbirisan di.
Upatooŋ mbalmbali tiom padi, ve iwaghamun di inimale yab ighan kikiliiŋ gorgori.
 
8 Yom atem yabyab padi kat. Tauto ugham yaghur tiina imundig ve ivalag te. Pida ila pa ŋas, ve pida ila pa waan.
Dige ru tonowen tiŋgud tiza ve tiyoon kat tinimale didiiŋ.
Te to mazovan iyoon le iyaryaaŋ.
9 Koiamai tigham tinidi tighaze:
‘Yei pale nigham taghon yes Israela le nikis di.
Ghoro niyou mburuguuŋ todi tisob, ve nirei di irau ghei.
Sa pataŋani to nighaze nigham padi, nene pale nighami moghon.
Tovenen yei pale nipas buza tiei, ve nipatooŋ tapirimai padi, ve nireu mbirisan di.’
10 Eemoghon Yoova, yom uvib avuvum inim yaghur ve iviviir te.
Tauto itatab di le tisob tindal tizila mazovan lolo rikia moghon tinimale yaam to pataŋani le pataŋani kat.
11 Yoova, sa maaron to irau ghom? Eta maau.
Yom paghunam ve patabuaŋ kat.
Ve ugham uraat tintina toman mbeb gharatooŋadi.
Tauto tamtoghon timatughez payom, ve tipait izam. Igham 8:10; Mbo 86:8; Syg 4:8
 
12 Yom urab koiamŋa pa nimam waan, ve ugham taan avo ikaak, ve itoon di tisob.
13 Yoova, yom lolom ineep tuŋia ila to tamtoghon tiom, ve uluul di itaghon saveeŋ mbuaaŋ tiom.
Tauto uvool todi, ve ugham mulin di pa pataŋani todi.
Ve yom umuuŋ ve upatooŋ ataam padi.
Tovenen yom pale uŋgin di pa tapirim ve ugham pooz padi, le tila tivot izi inam patabuaŋ to nepooŋ.
 
14 Yes ndug ndug tilooŋ uraat tiom varu, le ruŋadi iza pani ve lolodi imbumbu.
Matughezaaŋ tiina igham yes Pilistia ve tisaŋeeŋ.
 
15 Ve daba tisob to Edom paam, matughezaaŋ tiina igham di.
Yes pooza to Moap tilooŋ varum, le tinidi irur, ve lolodi imbumbu.
Ve yes Kanaana tapiridi isob kat ve tinidi imatmaat.
 
16 O Yoova, yes tiwatag: Tapirim, nene tiina kat.
Tauto matughezaaŋ tiina igham di, ve lolodi imbumbu.
Yom taum ugham mulin yei Israela ve ninim lem kat.
Tovenen ndug ndug tineep moghon tinimale yaam,
ve timbatut ghei, ve nimbut naghodi ve nila nigham taan tiei.
Irau tigham mbeb eta payei maau.
 
17 O Yoova, yom ugham ghei ninim nineep pooi izi lolooz tiom. [a]
Lolooz tonene, nene inam patabuaŋ to nepooŋ.
Pasa, yom upayoon rumai tiom izala. Mbo 78:54+, 80:8
18 Yoova, ye kinik tiina kat.
Ye pale igham pooz itaghoni taghoni gha ila.”
Mbouŋ to Miriam

19 Tovenen Yoova ivalag Te Kaviaaŋa, ve pida ila pa ŋas ve pida ila pa waan, ve yes Israela titaghon taan mamaasa to ineep bodbodaaŋ, ve tivool tila pa dige ite. Eemoghon sawa to ndaaba to kinik tigham hos ve karis todi, ve titaghon di, Yoova igham te ila ivool muul, ve itatab di. 20 Aron livu Miriam, ye propet liva eez. Ye igham kakaap toni ve imuuŋ, ve ndiliva tisob to Israel anadi tigham kakaap todi ve titaghoni, ve yesŋa tigham narogho. 21 Ve Miriam iit mbouŋ tonene padi ighaze:

“Ambou ve apait Yoova.
Ye iza tiina le tiina kat.
 
Ye iparab ariaŋa le ilib pa koia.
Hos todi toman yes to tilaan padi, ye ipandalin di tizila te lolo ve tilaledi.”
Ya papaii

22 Muri ghoro, Mose isaav pa yes Israela, ve timundig tilaagh muul. Tipul naari to Te Kaviaaŋa, ve tilaagh tilooŋ tila pa ndug balim to tiwaata tighaze ‘Sur.’ Tilaagh izi tonowe irau mboŋ tol, eemoghon tindeeŋ ya eta maau. 23 Ghoro tivot ndug kainaŋen eez, iza Mara. Ndug tonowen, ya inepneep. Eemoghon ya tonowen papaii. Tovenen yes Israela irau tighuni maau. Pughu tonene to tiwaat ndug tonowen iza tighaze ‘Mara.’ [b]

24 Yes Israela timundig ve tiŋooŋ pa Mose tighaze: “Ai, ŋgarsuamai imamaas kat wa. Pale nighun sa?”

25 Tovenen Mose itaŋ roran Yoova pa ulaaŋ, ve Yoova ipatooŋ ai suruvu eez pani. Mose igham ai tonowen ve ipiyaava izila ya, le ya ipapa muul maau, ve yes irau tighun.

Tinepneep tonowe, ve Yoova ighur tutuuŋ pida padi ve ipatooŋ di pa ataam to titaghoni leso tilaagh deŋia ila mata. Ye igham tovene pa itoov di. Leso ighita: Pale titaghon katin aliŋa, ma maau? 26 Ye isaav padi ighaze: “You Yoova, Maaron tiam. Alooŋ aliŋag ve ataghoni, ve agham ŋgar to deŋia moghon ila matag. Ighaze aghur poian taliŋamim pa tutuuŋ tisob to naghur di, ve ataghon katin di, nene you irau naghur moroghooŋ samia eta payam inimale nagham pa yes Isipa ne maau. Pasa, you Yoova to nagharaat gham pa moroghooŋ tiam ve tinimim popoia.” Mbo 103:3

27 Ghoro yes Israela tilaagh tila tivot izi ndug Elim. Ndug tonowen, le taan saambu saaŋgul ve ru to ya ivotvot padi. Ve ai det tamoot tol saaŋgul (70) titub tonowe paam. Ai tonowen anoŋadi poia pa ghaniiŋ. Tovenen tigharaat inadi tonowe, ve atedi izi.

<- Maaron Igham Mulin Yes Israela 14Maaron Igham Mulin Yes Israela 16 ->